អភិបាលក្រុងភ្នំពេញព្រមានចាត់វិធានការលើអ្នករត់រ៉ឺម៉កកង់បីដែលបើកបរគ្មានសណ្តាប់ធ្នាប់
អភិបាលរាជធានីភ្នំពេញ លោកឃួង ស្រេង បានព្រមានចាត់វិធានការទៅលើអ្នកបើករ៉ឺម៉កកង់បីទាំងឡាយណាដែលបើកបរគ្មានសណ្តាប់ធ្នាប់ បំពានច្បាប់ចរាចរណ៍ និង ប្រព្រឹត្តអំពើខុសច្បាប់។ ការព្រមាននេះ ធ្វើឡើងនៅក្នុងជំនួបជាមួយក្រុមហ៊ុនប្រកបអាជីវកម្មដឹកជញ្ជូនអ្នកដំណើរតាមរ៉ឺម៉កកង់បីនៅក្នុងរាជធានីភ្នំពេញកាលពីថ្ងៃសុក្រម្សិលមិញនេះ។
ចុះផ្សាយនៅថ្ងៃ៖
ការព្រមានចាត់វិធានការទៅលើអ្នករត់រ៉ឺម៉កកង់បីនេះ ធ្វើឡើងក្រោយពីលោកអភិបាលរាជធានីភ្នំពេញដូចជាសាធារណជនទូទៅបានកត់សម្គាល់ឃើញថា មួយរយៈចុងក្រោយនេះ មានបញ្ហាជាបន្តបន្ទាប់បានកើតឡើងដោយសារអ្នករត់រ៉ឺម៉កកង់បីមួយចំនួននៅក្នុងរាជធានីភ្នំពេញ។ បញ្ហាទាំងនោះ រួមមានដូចជា ការបើកបរគ្មានសណ្តាប់ធ្នាប់ ការបៀតបៀនរាងកាយអ្នកដំណើរដោយអ្នករត់រ៉ឺម៉កកង់បី និងបញ្ហាសន្តិសុខផ្ទាល់ខ្លួនរបស់អ្នកដំណើរជាដើម។
ប្រឈមនឹងបញ្ហាទាំងនេះ អភិបាលរាជធានីភ្នំពេញ លោកឃួង ស្រេង បានអះអាងថា ការគ្រប់គ្រងលើរ៉ឺម៉កកង់បី គឺជារឿងសំខាន់ ដោយគូសបញ្ជាក់ថា មិនអាចអនុញ្ញាតឱ្យបន្តមានសកម្មភាពបែបនេះតទៅទៀតបានទេ ព្រោះវាប៉ះពាល់ដល់សន្តិសុខសាធារណៈនៅក្នុងរាជធានីភ្នំពេញ។ ដើម្បីដោះស្រាយបញ្ហាទាំងអស់នេះ អាជ្ញាធររាជធានីភ្នំពេញ បានតម្រូវឱ្យអ្នកប្រកបអាជីវកម្មទាំងអស់ត្រូវមានបណ្ណបើកបរ បណ្ណសម្គាល់ខ្លួន ស្លាកលេខយានជំនិះ និងត្រូវធានាឲ្យបាននូវសុខសុវត្ថិភាពជូនអតិថិជនរបស់ខ្លួនរាល់ពេលធ្វើដំណើរ និងត្រូវចូលរួមគោរពច្បាប់ចរាចរណ៍ផ្លូវគោកទាំងអស់គ្នា។
សូមបញ្ជាក់ថា គិតមកដល់ពេលនេះ អ្នករត់រ៉ឺម៉កកង់បីនៅក្នុងរាជធានីភ្នំពេញមានចំនួនជាង ២ម៉ឺន៤ពាន់គ្រឿង។ ចំនួនអ្នករត់រ៉ឺម៉កកង់បីនេះ បានកើនឡើងយ៉ាងខ្លាំងនៅក្នុងរយៈពេល២ទៅ៣ឆ្នាំចុងក្រោយនេះ។ ចំពោះចំណាត់ការរបស់សាលារាជធានីភ្នំពេញលើអ្នករត់រ៉ឺម៉កកង់បី លោកយង់ គឹមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍ និងសន្តិភាព ចាត់ទុកថា ជារឿងល្អប្រសើរ។ ប៉ុន្តែលោកក៏បានស្នើឱ្យអាជ្ញាធរគិតគូរលើមធ្យោបាយដឹកជញ្ជូនផ្សេងទៀតដែលធ្លាប់មានបញ្ហាដូចករណីរ៉ឺម៉កកង់បីមួយចំនួនដែរ។ សម្រាប់លោកយង់ គឹមអេង អាជ្ញាធរត្រូវតែចាត់វិធានការឱ្យបានតឹងរ៉ឹង ដើម្បីលុបបំបាត់នូវភាពអសន្តិសុខ និងឥតសណ្តាប់ធ្នាប់នេះ។
ខុសពីលោកយង់ គឹមអេង លោកសន ជ័យ ដែលជានាយកប្រតិបត្តិសម្ព័ន្ធគណនេយ្យភាពសង្គមកម្ពុជាវិញបានចាត់ទុកថា វិធានការរបស់អាជ្ញាធររាជធានីភ្នំពេញនេះ គឺជាការបង្វែររឿង ពោល គឺចាត់ការរថយន្តធំ និងរំដោះចិញ្ចើមផ្លូវមិនកើត ទើបបង្វែរមកចាត់ការលើបញ្ហារ៉ឺម៉កកង់បីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ