បក្សកាន់អំណាចប្រាប់បក្សដទៃកុំឲ្យយករឿងគ្មានសិទ្ធិសេរីភាពមកធ្វើជាលេសមិនចូលរួមការបោះឆ្នោត
អ្នកនាំពាក្យបក្សប្រជាជនកម្ពុជា ដែលកំពុងកាន់អំណាចបច្ចុប្បន្ន បានអះអាងកាលពីម្សិលមិញថា ការមិនចូលរួមការបោះឆ្នោតរបស់បក្សនយោបាយណាមួយគឺជាសិទ្ធិរបស់បក្សនោះ។ ទន្ទឹមគ្នានេះ លោកបានព្រមានបក្សនយោបាយ កុំឲ្យយកហេតុផលថា គ្មានសិទ្ធិសេរីភាព មកធ្វើជាលេសមិនចូលរួមការបោះឆ្នោត។ ការបញ្ជាក់នេះ ធ្វើឡើងក្រោយពីបក្សនយោបាយពីរបានប្រកាសមិនចូលរួមការបោះឆ្នោតនាខែកក្កដាខាងមុខនេះ ក្រោមហេតុផលស្ថានភាពនយោបាយមិនល្អ។
ចុះផ្សាយនៅថ្ងៃ៖
ស្តាប់ - ០២:០០
“នៅក្នុងការប្រកួតប្រជែងការបោះឆ្នោតក្នុងទីលានប្រជាធិបតេយ្យ គណបក្សនយោបាយនីមួយៗមានសិទ្ធិចូលរួម ឬមិនចូលរួមបោះឆ្នោតស្របទៅតាមលទ្ធភាព សមត្ថភាព និងឆន្ទៈរបស់ខ្លួនដោយគ្មានការបង្ខិតបង្ខំ ការសម្លុត និងការគំរាមកំហែងណាមួយឡើយ” ។ នេះគឺជាគូសបញ្ជាក់របស់លោកសុខ ឥសាន ដែលជាអ្នកនាំពាក្យគណបក្សប្រជាជនកម្ពុជា។ សម្រាប់អ្នកនាំពាក្យបក្សកាន់អំណាចរូបនេះ ការប្រកាសមិនចូលរួមបោះឆ្នោតរបស់គណបក្សនយោបាយណាមួយ វាគឺជាសិទ្ធិសម្រេចរបស់បក្សនយោបាយនោះ។ ប៉ុន្តែបើមិនចូលរួម ហើយនិយាយថាដោយសារគ្មានសិទ្ធិសេរីភាព និងមានការរំលោភសិទ្ធិមនុស្សនោះ គឺមិនមែនជាហេតុផលទេ តែវាគ្រាន់តែជាលេសប៉ុណ្ណោះ។ នេះបើតាមអ្នកនាំពាក្យដដែល។
ការគូសបញ្ជាក់របស់លោកសុខ ឥសាននេះ ធ្វើឡើងក្រោយពីគណបក្សនយោបាយពីរ គឺគណបក្សអំណាច ខ្មែរនិងគណបក្សភ្លើងទាន ប្រកាសមិនចូលរួមការបោះឆ្នោតជាតិនាពេលខាងមុខនេះ។ ចំពោះគណបក្សអំណាចខ្មែរ មូលហេតុគឺដោយសារតែបក្សនេះមើលឃើញថាស្ថានភាពនយោបាយនៅកម្ពុជា គ្មានស្ថិរភាព និងគណៈកម្មាធិការជាតិរៀបចំការបោះឆ្នោត (គ.ជ.ប) មិនឯករាជ្យ។ ចំណែកសម្រាប់គណបក្សភ្លើងទៀនវិញ ការចូលរួមការបោះឆ្នោត ដរាបណាមានការដោះស្រាយវិបត្តិនយោបាយ ដើម្បីធានាឲ្យមានការបោះឆ្នោតដោយសេរី ត្រឹមត្រូវ និងយុត្តិធម៌ដែលឆ្លុះបញ្ចាំងពីឆន្ទៈរបស់ប្រជាពលរដ្ឋខ្មែរ។
យ៉ាងណាក៏ដោយ លោកសុខ ឥសាន នៅតែគូសបញ្ជាក់ថា ការសម្រេចចិត្តមិនចូលរួមបោះឆ្នោត គឺជាសិទ្ធិមិនចូលរួមរបស់គណបក្សនយោបាយនីមួយៗ ដោយមិនអាចយកលេសណាមួយដាក់កំហុសលើអ្នកដទៃបានឡើយ។ សូមបញ្ជាក់ថា គិតត្រឹមថ្ងៃទី០៦ ឧសភានេះ មានគណបក្សនយោបាយចំនួនបីហើយដែលបានចុះបញ្ជីចូលរួមការបោះឆ្នោតនៅគ.ជ.ប នោះគឺគណបក្សប្រជាជនកម្ពុជា គណបក្សយុវជនកម្ពុជា និងគណបក្សសញ្ជាតិកម្ពុជា។ រីឯគណបក្សជិត២០ទៀតបានទទួលយកពាក្យស្នើសុំចុះបញ្ជីរួចហើយ។ នេះ ធ្វើឲ្យគ.ជ.ប រំពឹងទុកថា នៅសប្តាហ៍ក្រោយនេះ នឹងមានគណបក្សនយោបាយជាច្រើនទៀតមកដាក់ពាក្យស្នើសុំចុះបញ្ជីចូលរួមការបោះឆ្នោតនៅថ្ងៃទី២៩ ខែកក្កដា ឆ្នាំ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ