លោកសម រង្ស៊ី ៖ ហ្វេសប៊ុកបានជួយរកសំឡេងឆ្នោតឲ្យបក្សប្រឆាំង
នៅរសៀលថ្ងៃអង្គារទី១៦ ធ្នូនេះ លោកសម រង្ស៊ី ប្រធានគណបក្សសង្គ្រោះជាតិ បានធ្វើសន្និសីទកាសែតមួយនៅទីស្នាក់ការកណ្តាលគណបក្ស ធ្វើការប្រកាសពីទំព័រហ្វេសប៊ុករបស់លោកទទួលបានអ្នកគាំទ្រដល់ទៅមួយលាននាក់។ ប្រធានគណបក្សប្រឆាំង បានថ្លែងបញ្ជាក់ថា ដោយសារតែបណ្តាញទំនាក់ទំនងសង្គមនេះហើយ បានធ្វើគណបក្សសង្គ្រោះជាតិទទួលបានសំឡេងឆ្នោត និងការគាំទ្រច្រើនដូចបច្ចុប្បន្ននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
មិនដល់រយៈពេល២ឆ្នាំផង ទំព័រទំនាក់ទំនងសង្គមហ្វេសប៊ុករបស់លោកសម រង្ស៊ី ប្រធានគណបក្សសង្គ្រោះជាតិ មានចំនួនអ្នកគាំទ្រឫចុចLike ដល់ទៅមួយលាននាក់។ ចំនួនមួយលាននាក់នេះ គឺចាប់គិតពីថ្ងៃទី១៤ ធ្នូ កន្លងទៅ។
លោកសម រង្ស៊ី បានចាត់ទុកថា នេះជាជោគជ័យមួយសម្រាប់រូបលោក ដែលជាប្រធានគណបក្សសង្គ្រោះជាតិ។ ជោគជ័យព្រោះថា ចំនួនគាំទ្រនេះ បានធ្វើឲ្យទំព័រហ្វេសប៊ុករបស់លោក ក្លាយជាទំព័រហ្វេសប៊ុកអ្នកនយោបាយទទួលបានការគាំទ្រច្រើនជាងនៅក្នុងប្រទេសកម្ពុជា។ កម្ពុជា ដែលលោកសម រង្ស៊ី យល់ថា មិនសូវមានអ្នកប្រើប្រាស់បណ្តាញទំនាក់ទំនងសង្គមហ្វេសប៊ុកច្រើនដូចបណ្តាប្រទេសផ្សេងទៀត។ ប្រធានគណបក្សសង្គ្រោះជាតិរូបនេះ បានលើកឡើងថា ក្នុងចំណោមអ្នកប្រើប្រាស់បណ្តាញសង្គមហ្វេសប៊ុកចំនួន១លាន៤សែននាក់នៅក្នុងប្រទេសកម្ពុជា គឺអ្នកប្រើប្រាស់ចំនួន១លាននាក់ ឫ ៧១% បានចុចLike ទំព័រហ្វេសប៊ុករបស់លោក។
បើតាមលោកសម រង្ស៊ី បណ្តាញទំនាក់ទំនងសង្គមហ្វេសប៊ុក បានតួនាទីសំខាន់ណាស់ក្នុងដំណើរវិវត្តន៍នៃនយោបាយនៅក្នុងប្រទេសកម្ពុជា ជាពិសេសវាបានធ្វើឲ្យប្រជាពលរដ្ឋដែលប្រើប្រាស់បណ្តាញសង្គមនេះ បានស្គាល់ និងយល់ដឹងបានច្រើនអំពីគណបក្សសង្គ្រោះជាតិ។ លោកសម រង្ស៊ី បានបញ្ជាក់ថា បណ្តាញទំនាក់ទំនងសង្គមហ្វេសប៊ុក បានជួយឲ្យគណបក្សប្រឆាំងរកបានសំឡេងឆ្នោត ក៏ដូចជាទទួលបានការគាំទ្រច្រើននៅក្នុងអាណត្តិនេះ ។
គួរបញ្ជាក់ថា ទំព័របណ្តាញទំនាក់ទំនងសង្គមហ្វេសប៊ុករបស់លោកសម រង្ស៊ី បានបង្កើតឡើងកាលពីខែមេសាឆ្នាំ ២០១៣ ដោយប្រែក្លាយពីគណនេយ្យផ្ទាល់ខ្លួនរបស់លោក ហើយមកដល់ចុងឆ្នាំ២០១៤នេះ ទទួលបានអ្នកគាំទ្រចំនួនមួយលាននាក់។ ជាមួយចំនួននេះ លោកសម រង្ស៊ី បានសម្តែងមោទនភាពយ៉ាងខ្លាំង ព្រោះថាទំព័រសង្គមហ្វេសប៊ុករបស់លោក ទទួលបានការគាំទ្រច្រើជាងទំព័រសង្គមហ្វេសប៊ុករបស់លោកនាយករដ្ឋមន្ត្រីហ៊ុន សែន ដែលដាក់ឈ្មោះជា ភាសាអង់គ្លេសថា Samdech Hun Sen, Cambodian Prime Minister។ ប៉ុន្តែប្រមុខរដ្ឋាភិបាលកម្ពុជា ធ្លាប់បានប្រកាសនាពេលកន្លងមកថា លោកមិនមានទំព័រទំនាក់ទំនងសង្គមហ្វេសប៊ុកនោះទេ។
យ៉ាងណាក៏ដោយ នៅពេលនេះទំព័រហ្វេសប៊ុករបស់លោកសម រង្ស៊ី មានចំនួនអ្នកគាំទ្រមិនចាញ់ទំព័រទំនាក់ទំនងសង្គមហ្វេសប៊ុករបស់មេដឹកនាំល្បីឈ្មោះក្នុងពិភពលោក ដូចជា លោក Nicolas Sarkozy អតីតប្រធានាធិបតីបារាំង លោកស្រីAung San Suu Kyi ប្រមុខបក្សប្រឆាំងភូមា និង អតីតអគ្គលេខាធិការអង្គការសហប្រជាជាតិលោក Kofi Annan ដែលសុទ្ធតែមានអ្នកគាំទ្រដល់ទៅជាងមួយលាននាក់ដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ