លោកសម រង្ស៊ី អំពាវនាវដល់ពលរដ្ឋខ្មែរក្នុងប្រទេសឱ្យត្រៀមចូលរួមធ្វើការផ្លាស់ប្តូរក្នុងឆ្នាំ២០១៩នេះ
តាមរយៈទំព័រហ្វេសប៊ុកនៅព្រឹកថ្ងៃសៅរ៍នេះ លោកសម រង្ស៊ី ពីក្រៅប្រទេសបានចេញសារអំពាវនាវដល់ប្រជាពលរដ្ឋខ្មែរទាំងអស់ឱ្យត្រៀមខ្លួន ដើម្បីជំរុញឱ្យមានការផ្លាស់ប្តូរជាវិជ្ជមាននៅក្នុងឆ្នាំ២០១៩នេះ។ ប៉ុន្តែដើម្បីឈានទៅរកការផ្លាស់ប្តូរដោយវិជ្ជមាននេះ លោកអតីតប្រធានអតីតបក្សប្រឆាំងអំពាវនាវឱ្យពលរដ្ឋខ្មែរទាំងអស់ត្រៀមខ្លួនធ្វើការតស៊ូជាមួយលោកដោយទាមទារនូវបញ្ហាសំខាន់ៗចំនួនបី។
ចុះផ្សាយនៅថ្ងៃ៖
ស្តាប់ - ០២:២៩
បីចំណុចដែលលោកសម រង្ស៊ី ប្រាប់ទៅកាន់ប្រជាពលរដ្ឋខ្មែរឱ្យត្រៀមលក្ខណៈចូលរួមតស៊ូជាមួយលោកនេះ គឺ ការទាមទារយកដីធ្លី ដែលមានដីស្រែ ចំការ និងផ្ទះសម្បែងដែលលោកសម រង្ស៊ីថា អាជ្ញាធរពុករលួយ និងឈ្មួញខិលខូចបានប្លន់យក ដោយទាមទារយកទ្រព្យសម្បត្តិទាំងនោះមកប្រគល់ឱ្យប្រជារាស្ត្រក្រីក្រ និងទន់ខ្សោយវិញ។ ជាមួយគ្នានេះ លោកអតីតប្រធានអតីតគណបក្សសង្គ្រោះជាតិក៏បានអំពាវនាវឱ្យពលរដ្ឋត្រៀមខ្លួនទាមទារឱ្យលុបចោលសម្បទានដីធ្លី សម្បទានព្រៃឈើ និងសម្បទានរ៉ែ រយៈពេលរាប់សិបឆ្នាំដល់ក្រុមហ៊ុនបរទេស ដើម្បីប្រមូលទ្រព្យសម្បត្តិជាតិទាំងនោះ យកមកបែងចែកជូនប្រជារាស្ត្រតូចតាច ក្នុងលក្ខណៈជាគ្រួសារ ឬក៏យកមកគ្រប់គ្រងសម្រាប់បម្រើផលប្រយោជន៍សាធារណៈ។
បន្ថែមលើនេះ លោកក៏ជំរុញឱ្យពលរដ្ឋទាមទារឱ្យមានការលុបបំបាត់បំណុលទាំងឡាយរបស់ប្រជារាស្ត្រ ដែលលោកសម រង្ស៊ី ថា បានធ្លាក់ខ្លួនក្រក្រោមការដឹកនាំរបស់លោកនាយករដ្ឋមន្ត្រីហ៊ុន សែន ព្រោះតែត្រូវបង្ខំចិត្តទៅខ្ចីប្រាក់ពីស្ថាប័នហិរញ្ញវត្ថុនានា រហូតដល់ក្លាយទៅជាទាសករហិរញ្ញវត្ថុ ។ សម្រាប់លោកសម រង្ស៊ី នេះ គឺមានន័យថា ពលរដ្ឋជំពាក់គេវ័ណ្ឌក រើបម្រះមិនរួច ដោយសារតែមិនមានប្រាក់ចំណូលគ្រប់គ្រាន់ ហើយត្រូវខ្ចីលុយគេថែមទៀតកាន់តែច្រើនឡើងៗ រកច្រកចេញមិនរួច។
ប៉ុន្តែការអំពាវនាវទាំងអម្បាលម៉ានរបស់លោកសម រង្ស៊ីនេះ ត្រូវបានគណបក្សប្រជាជនកម្ពុជាចាត់ទុកថា ជាការប្រើប្រាស់នយោបាយប៉ុល ពត។ លោកសុខ ឥសាន អ្នកនាំពាក្យបក្សប្រជាជនកម្ពុជាបានអះអាងថា ការបំផុសបំផុលនេះ គឺគ្រាន់តែជានយោបាយចងអាឃាដរបស់លោកសម រង្ស៊ី ដោយថាអ្វីៗដែលលោកអតីតប្រធានបក្សធ្វើនេះ គឺដើម្បីតែមហិច្ឆតាអំណាចប៉ុណ្ណោះ។
សូមបញ្ជាក់ថា ការចេញសារអំពាវនាវរបស់លោកសម រង្ស៊ីនេះ ធ្វើឡើងស្របដែលលោកកំពុងធ្វើយុទ្ធនាការបំផុសបំផុលពលរដ្ឋនៅក្រៅប្រទេសឱ្យចូលមកក្នុងប្រទេសកម្ពុជាវិញជាមួយលោក ដើម្បីចាប់ដៃគ្នាជាមួយពលរដ្ឋក្នុងស្រុកងើបឈឡើងប្រឆាំងនឹងរដ្ឋាភិបាលលោកនាយករដ្ឋមន្ត្រីហ៊ុន សែន ដោយសន្តិវិធី។ លោកសម រង្ស៊ីថែមទាំងអះអាងថា លោកមកស្រុកខ្មែរវិញនៅពេលខាងមុខនេះ គឺដើម្បីមកចាប់លោកហ៊ុន សែន មិនមែនមកឱ្យលោកហ៊ុន សែនចាប់ខ្លួននោះទេ។
ប៉ុន្តែលោកសុខ ឥសាន ធ្លាប់បានចំអកថា តើនរណានឹងចាប់នរណាឱ្យប្រាកដ។ សម្រាប់លោកសុខ ឥសាន លទ្ធភាពដែលលោកសម រង្ស៊ី ថាមកចាប់លោកនាយករដ្ឋមន្ត្រីហ៊ុន សែននោះ គឺអត់មានទេ។ នេះ បើតាមអ្នកនាំពាក្យបក្សកាន់អំណាច គឺព្រោះថា គ្រាន់តែលោកសម រង្ស៊ី មកដល់ព្រលានយន្តហោះនៅកម្ពុជាភ្លាម នឹងត្រូវចាប់ខ្លួនភ្លែតតែម្តង ដោយអ្នកមកគាំទ្រមិនទាំងបានដឹង និងឃើញរូបលោកសម រង្ស៊ីផងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ