លោកស ខេង៖ក្រុមអ្នកនយោបាយខ្លះកំពុងនាំប្រជាជនធ្វើរដ្ឋប្រហារក្រោមពាក្យផ្លាស់ប្តូរជាវិជ្ជមាន
លោកស ខេង នាយករដ្ឋមន្ត្រីស្តីទីនៅព្រឹកនេះ បានបរិហារយ៉ាងខ្លាំងពីការបំផុសបំផុសប្រជាពលរដ្ឋឱ្យប្រឆាំងនឹងរដ្ឋាភិបាលកម្ពុជា។ ទង្វើនេះ ត្រូវបានលោកស ខេង ចាត់ទុកថា ជាការដឹកនាំប្រជាពលរដ្ឋទៅធ្វើរដ្ឋប្រហារក្រោមពាក្យថា ផ្លាស់ប្តូរជាវិជ្ជមាន។ លោកស ខេង បានលើកឡើងដូច្នេះនៅក្នុងពិធីបុណ្យបញ្ចុះខណ្ឌសីមាព្រះវិហារ និងឆ្លងសមិទ្ធិផលនានានៃវត្តសិរីមានជ័យ ហៅវត្តអង្គរជ័យក្នុងខេត្តព្រៃវែងនៅព្រឹកថ្ងៃទី២៧ ខែមេសានេះ។
ចុះផ្សាយនៅថ្ងៃ៖
ស្តាប់ - ០២:០៥
ដោយមិនបញ្ចេញឱ្យចំឈ្មោះ តែគេអាចយល់បានថាចង់សំដៅលើក្រុមលោកសម រង្ស៊ី លោករដ្ឋមន្ត្រីក្រសួងមហាផ្ទៃកម្ពុជា ស ខេង បានអះអាងថា ក្រុមអ្នកនយោបាយខ្លះក្នុងពេលបច្ចុប្បន្ននេះ កំពុងដឹកនាំប្រជាពលរដ្ឋខ្មែរទៅធ្វើរដ្ឋប្រហារទម្លាក់រដ្ឋាភិបាលស្របច្បាប់ដែលកើតចេញពីការបោះឆ្នោត។ បើតាមលោកស ខេង ការធ្វើរដ្ឋប្រហារនេះ គឺក្រោមពាក្យស្លោកថា ទៅធ្វើការផ្លាស់ប្តូរជាវិជ្ជមាន តែលោកថា មិនអាចវិជ្ជមានដូចមាត់បានឡើយ។ ហេតុដូច្នេះហើយ លោកឧបនាយករដ្ឋមន្ត្រីស ខេង បានប្រាប់ប្រជាពលរដ្ឋគួរកុំចង់សាកល្បងជាមួយនឹងរដ្ឋប្រហារអី ព្រោះកម្ពុជាធ្លាប់ឆ្លងកាត់រួចមកហើយតាំងពីទសវត្សរ៍៧។ ជាមួយគ្នានេះ លោកក៏បានផ្តាំផ្ញើទៅក្រុមលោកសម រង្ស៊ីវិញថា ធ្វើអ្វីត្រូវគិតពីផលប្រយោជន៍ជាតិជាធំ កុំធ្វើអ្វីដើម្បីតែផលប្រយោជន៍ក្រុមឫបក្ខពួកខ្លួនឯង។
ការលើកឡើងរបស់លោកស ខេង នៅពេលនេះ ធ្វើឡើងក្រោយពេលដែលលោកសម រង្ស៊ីកាលពីថ្ងៃទី២៥ ខែមេសា បានសរសេរសារតាមហ្វេសប៊ុកអំពាវនាវឱ្យលោក ស ខេង និងកងកម្លាំងប្រដាប់អាវុធផ្តួលរំលំលោកនាយករដ្ឋមន្ត្រីហ៊ុន សែន ។ ដោយហៅលោកហ៊ុន សែន ថាជាជនផ្តាច់ការ លោកសម រង្ស៊ី បានអះអាងថា ប្រសិនបើលោកស ខេង មិនកម្ចាត់លោកនាយករដ្ឋមន្ត្រីហ៊ុន សែនទេ នោះលោកនាយករដ្ឋមន្ត្រីនឹងកម្ចាត់វិញ ព្រោះលោកមិនស្ថិតក្នុងក្រុមគ្រួសារជាមួយលោកនាយករដ្ឋមន្ត្រី។
សូមបញ្ជាក់ថា នេះមិនមែនជាលើកទីមួយទេដែលលោកសម រង្ស៊ី បានអំពាវនាវយ៉ាងដូច្នេះ។ កន្លងមក លោកធ្លាប់ជំរុញឱ្យលោកស ខេង ធ្វើបក្សប្រហារក្នុងគណបក្សប្រជាជនកម្ពុជា និង ធ្វើរដ្ឋប្រហារទម្លាក់លោកហ៊ុន សែន។ ប៉ុន្តែលោកនាយករដ្ឋមន្ត្រីហ៊ុន សែន ធ្លាប់បានប្រាប់ឱ្យលោកស ខេង កុំឱ្យឆ្លើយតបជាមួយនឹងលោកសម រង្ស៊ី ដោយអះអាងថាទង្វើរបស់លោកសម រង្ស៊ីនេះ ជារឿងឆោតល្ងង់គ្មានតម្លៃសម្រាប់ឆ្លើយតប។
ក៏ប៉ុន្តែនៅពេលនេះ លោកស ខេង បានឆ្លើយតបបែបប្រយោលដោយមិនបញ្ចេញចេញឱ្យចំ។ លោកថា ប្រសិនបើមានរដ្ឋប្រហារ នោះកម្ពុជានឹងហិនហោចដូចកាលពីអតីតកាល។ យ៉ាងណាក៏ដោយ លោកអះអាងថា ប្រជាពលរដ្ឋកម្ពុជានឹងមិនធ្វើតាមការបំផុសបំផុលរបស់ក្រុមលោកសម រង្ស៊ីឡើយ ព្រោះប្រជាពលរដ្ឋនៅពេលនេះយល់ដឹងច្រើនពីតម្រូវការរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ