ឆ្នាំ២០១៩ រដ្ឋាភិបាលកម្ពុជាគ្រោងចំណាយថវិកាប្រមាណ៦.៧ពាន់លានដុល្លារ
សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩ ត្រូវបានគណៈរដ្ឋមន្ត្រីកម្ពុជា សម្រេចអនុម័តហើយនៅព្រឹកថ្ងៃសុក្រនេះ។ បើតាមសេចក្ដីព្រាងនេះ រដ្ឋាភិបាលកម្ពុជាគ្រោងចំណាយថវិកាជាតិដល់ទៅប្រមាណជា ៦.៧ពាន់លានដុល្លារអាមេរិកសម្រាប់ឆ្នាំ២០១៩ខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
សម្រាប់ឆ្នាំ ២០១៩ខាងមុខនេះ រដ្ឋាភិបាលកម្ពុជា គ្រោងចំណាយថវិកាជាតិសរុបចំនួន ជាង២៧លានលានរៀល (២៧ ១៦៤ ៩៩៦ លានរៀល ) ឬប្រមាណជា ៦.៧ ពាន់លានដុល្លារអាមេរិក។ ចំនួននេះ កើនឡើង ១១,៤% បើប្រៀបធៀបនឹងច្បាប់ឆ្នាំ២០១៨ ដែលមានចំនួនសរុបចំនួនជាង២៤លានលានរៀល(២៤,៣៧៥,១០២លានរៀល) ឬប្រហែល៦០៣៣ លានដុល្លារអាមេរិក។ ក្នុងនោះ ការចំណាយចរន្តថវិការដ្ឋមានចំនួនជិត១៨លានលានរៀល (១៧ ៩០៧ ៥៤៩លានរៀល) ឬប្រហែលជាង៤ពាន់លានដុល្លារ កើនឡើង១២,៣%។ ចំណែកការចំណាយមូលធនថវិការដ្ឋ មានចំនួនជាង៩លានលានរៀល (៩ ២៥៧ ៤៤៧ លានរៀល) ឬប្រមាណជាង២ពាន់លានដុល្លារអាមេរិក កើនឡើង ៩,៨% បើប្រៀបធៀបនឹងច្បាប់ឆ្នាំ២០១។ នេះបើយោងតាមខ្លឹមសារសង្ខេបស្តីពីសេចក្តីព្រាងច្បាប់ថវិកាជាតិ ឆ្នាំ២០១៩ របស់ក្រសួងសេដ្ឋកិច្ច និងហិរញ្ញវត្ថុ។
ចំណែក ចំណូលសរុបថវិកាជាតិវិញ រដ្ឋាភិបាលកម្ពុជាគ្រោងបង្កើនជាង២៦លានលានរៀល (២៦ ៧៥៩ ៩៩៦ លានរៀល) ឬជាង ៦,៥ ពាន់លានដុល្លារអាមេរិក។ ក្នុងនោះ ចំណូលចរន្ដថ្នាក់ជាតិឲ្យស្មើនឹងជាង១៩លានលានរៀល (១៩ ៥៩៣ ១១១ លានរៀល) ឬ ប្រមាណ៤,៧ ពាន់លានដុល្លារអាមេរិក និងចំណូលមូលធនថវិកាជាតិត្រូវបានគ្រោងចំនួនជាង៥លានលានរៀល (៥ ៧៦៦ ៩១៧ លានរៀល) ឬជាង ១៤០ លានដុល្លារអាមេរិក កើនឡើង ១៥,៩% ធៀបនឹងច្បាប់ឆ្នាំ ២០១៨ ក្នុងនោះចំណូលមូលធនដោយហិរញ្ញប្បទានពីក្រៅប្រទេសស្មើនឹងប្រមាណ ២០% នៃចំណាយថវិការដ្ឋសរុបឆ្នាំ ២០១៩ ប៉ុណ្ណោះ។
អ្នកនាំពាក្យរដ្ឋាភិបាលកម្ពុជា លោកផៃ ស៊ីផាន បានអះអាងឲ្យដឹងថា សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩ មានគោលដៅគាំទ្រការអនុវត្តកម្មវិធីនយោបាយរបស់រាជរដ្ឋាភិបាល ជាពិសេសអនុវត្តតាមគោលនយោបាយអាទិភាពសំខាន់ៗ និងវិធានការកែទម្រង់ជាក់ស្ដែងនានា ដែលនឹងត្រូវចាប់ផ្ដើមអនុវត្តនៅក្នុងឆ្នាំ២០១៩ ដែលជាឆ្នាំទី១ របស់រាជរដ្ឋាភិបាលនីតិកាលទី។
បន្ថែមលើនេះ លោកក៏បានគូសបញ្ជាក់ដែរថា នៅក្នុងរយៈពេលមធ្យមខាងមុខ ការអភិវឌ្ឍសង្គមសេដ្ឋកិច្ចកម្ពុជានឹងឈានដល់ដំណាក់កាលប្រែប្រួលថ្មីមួយទៀត ជាពិសេសចាប់ពីពេលនេះទៅរយៈពេល៥ឆ្នាំខាងមុខ ដែលជារយៈពេលអន្ដរកាលឆ្ពោះទៅសម្រេចឋានៈប្រទេសមានចំណូលមធ្យមកម្រិតខ្ពស់នៅឆ្នាំ២០៣។ កាសម្រេចនេះ នឹងធ្វើឲ្យកម្ពុជាបាត់បង់ការអនុគ្រោះពន្ធពីសហភាពអឺរ៉ុបជាស្វ័យប្រវត្តិតែម្តង។
ស្របពេលកម្ពុជាកំពុងរងនូវការគំរាមដកប្រព័ន្ធអនុគ្រោះពន្ធ EBA ពីសហភាពអឺរ៉ុបនាពេលថ្មីៗនេះ រដ្ឋាភិបាលកម្ពុជាក៏បានប្រកាសពីការត្រៀមយុទ្ធសាស្ត្រ និងផែនការសកម្មភាព ដើម្បីគ្រប់គ្រងផលប៉ះពាល់ដែលកើតចេញពីបញ្ហានេះផងដែរ។ ប៉ុន្តែរដ្ឋាភិបាលមិនទាន់បង្ហាញលម្អិតពីយុទ្ធសាស្ត្រ និងផែនការសកម្មភាពនេះនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ