តុលាការកំពូលនិងឧទ្ធរណ៍ទាត់ចោលបណ្តឹងទាស់របស់លោកកឹម សុខាក្នុងថ្ងៃតែមួយ
នៅព្រឹកនេះ តុលាការកំពូលបានប្រកាសសាលដីកាទាត់ចោលបណ្តឹងសុំមោឃភាពនីតិវិធីរបស់តុលាការក្រុងភ្នំពេញលើសំណុំរឿងចោទប្រកាន់លោកកឹម សុខា ប្រធានស្តីទីគណបក្សសង្គ្រោះជាតិ។ ព្រមជាមួយគ្នានេះ សាលាឧទ្ធរណ៍ដែលចំណាយពេលពេញមួយព្រឹកដើម្បីជំនុំជម្រះលើបណ្តឹងទាស់នឹងសាលក្រមសាលាដំបូងរាជធានីភ្នំពេញ ក៏បានសម្រេចទាត់ចោលបណ្តឹងនេះផងដែរ។
ចុះផ្សាយនៅថ្ងៃ៖
ស្តាប់ - ០១:៤៦
ការសម្រេចទាត់ចោលនេះ គឺធ្វើឡើងក្នុងពេលតែមួយតែម្តង។ សាលាឧទ្ធរណ៍បានសម្រេចតម្កល់សាលក្រមសាលាដំបូងរាជធានីភ្នំពេញទុកជាបានការ គឺរក្សារការផ្តន្ទាទោសលោក កឹម សុខា រយៈពេល៥ខែនិងពិន័យជាទឹកប្រាក់៨០ម៉ឺនរៀលដដែល។ ការទាត់ចោលនេះ គឺតុលាការបានសំអាងទៅលើហេតុផលជាច្រើន ប៉ុន្តែក្នុងនោះអ្វីដែលក្រុមមេធាវីកត់សម្គាល់ គឺតុលាការលើកឡើងថា ការមិនចូលខ្លួនរបស់លោកកឹម សុខា មកកាន់តុលាការតាមការកោះហៅនោះ គឺមានចេតនាតែម្តង។
ក្រុមមេធាវីការពារក្តីលោកកឹម សុខា មិនពេញចិត្តនឹងការសម្រេចនេះទាល់តែសោះ។ លោកសំ សុគង់ មេធាវីមួយរូបរបស់លោកកឹម សុខា បានបញ្ជាក់ថា សវនាការនៅឧទ្ធរណ៍នេះមិនអាចទទួលយកបាននោះទេ ព្រោះសវនាការនេះមានលក្ខណៈមិនត្រឹមត្រូវ និងមិនបានផ្តល់យុត្តិធម៌ដល់កូនក្តីរបស់លោក។ យ៉ាងណាក៏ដោយ លោកមេធាវីបានគូសបញ្ជាក់បន្ថែមថា ក្រុមមេធាវីនឹងពិភាក្សាគ្នាជាមួយលោកកឹម សុខា ដើម្បីដាក់ពាក្យប្តឹងទៅតុលាការកំពូលបន្តទៀត ដើម្បីប្រឆាំងនឹងការសម្រេចនេះ។
សូមបញ្ជាក់ថា សាលាដំបូងរាជធានីភ្នំពេញ កាលពីថ្ងៃទី៩ ខែកញ្ញា កន្លងទៅ បានសម្រេចផ្តន្ទាទោសលោក កឹម សុខា ប្រធានស្តីទីគណបក្សសង្គ្រោះជាតិឲ្យជាប់ពន្ធនាគាររយៈពេល៥ខែនិងពិន័យជាទឹកប្រាក់ចំនួន៨០ម៉ឺនរៀលក្រោមការចោទប្រកាន់ពីបទ"បដិសេធក្នុងការចូលខ្លួន"តាមមាត្រា៥៣៨ នៃក្រមព្រហ្មទណ្ឌកម្ពុជា ។ តុលាការបានចាត់ទុកលោកកឹម សុខា ថាបានប្រព្រឹត្តបទល្មើសព្រហ្មទណ្ឌជាក់ស្តែងដោយសារប្រធានស្តីទីបក្សប្រឆាំងរូបនេះខកខានចូលបំភ្លឺនៅតុលាការចំនួនពីរលើកក្នុងនាមជាសាក្សី ពាក់ព័ន្ធនឹងសំណុំរឿងអ្នកនាង ខុម ចាន់តារាទី ហៅស្រីមុំ។
ក្រោយពីតុលាការជាន់ទាបបានសម្រេចដូច្នេះ ក្រុមមេធាវីការពារក្តីឲ្យលោកកឹម សុខា បានដាក់ពាក្យប្តឹងសុំមោឃភាពនីតិវិធីរបស់សាលាដំបូងរាជធានីភ្នំពេញនេះ ទៅកាន់សាលាឧទ្ធរណ៍ និង តុលាការកំពូលជាបន្តបន្ទាប់ទៀត។ ក៏ប៉ុន្តែសាលាឧទ្ធរណ៍បានបដិសេធ ហើយតុលាការកំពូលនៅថ្ងៃសុក្រនេះទៀតសោត ក៏បានទាត់ចោលបណ្តឹងសុំមោឃភាពនីតិវិធីនេះថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ