លោក ហ៊ុន សែន បើកផ្លូវឲ្យអតីតបក្សសង្រ្គោះជាតិបង្កើតបក្សថ្មី
លោកនាយករដ្ឋមន្ត្រី លោក ហ៊ុន សែន បានផ្តល់យោបល់ឲ្យអតីតគណបក្សសង្រ្គោះជាតិបង្កើតបក្សថ្មីមួយដើម្បីចូលរួមប្រកួតប្រជែងការបោះឆ្នោតដែលនៅសល់ពេលតែជាង៧ខែទៀតនោះ។ ការបើកផ្លូវរបស់ លោក ហ៊ុន សែន នៅពេលនេះ ធ្វើឡើងនៅគ្រាដែលសហគមន៍អន្តរជាតិពិសេស អាមេរិក និងសហភាពអឺរ៉ុបកំពុងតែដាក់សម្ពាធលើរដ្ឋាភិបាលកម្ពុជាតាមរយៈការផ្តាច់ជំនួយជាបន្តបន្ទាប់ នឹងឈានទៅបង្កកទ្រព្យសម្បត្តិមន្រ្តីរដ្ឋាភិបាលកម្ពុជាមួយចំនួនដែលទុកនៅក្រៅប្រទេស ដោយសារតែពួកគេជាប់ពាក់ព័ន្ធនឹងការរំលាយគណបក្សសង្រ្គោះជាតិ និងការរំលោភសិទ្ធិមនុស្សធ្ងន់ធ្ងរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ដោយ អ៊ឹង ប៊ុនថន
«ខ្ញុំសូមផ្តាំផ្ញើ និងបញ្ជាក់សារជាថ្មីថា អតីតបក្សដែលត្រូវបានរំលាយហើយ ដោយសាលដីកាតុលាកំពូល គឺចប់ជាស្ថាពរហើយ។ ឈ្មោះអតីតបក្សនេះ គឺនឹងគ្មានកើតឡើងសារជាថ្មីទៀតឡើយ»។ នេះគឺជាការលើកឡើងរបស់លោកនាយករដ្ឋមន្រ្តី ហ៊ុន សែន នៅលើទំព័រហ្វេសប៊ុករបស់លោកនៅថ្ងៃអាទិត្យនេះ។
លោក ហ៊ុន សែន លើកជាយោបល់ថា ដើម្បីកុំឲ្យខាតពេលច្រើន គឺមានតែវិធីមួយគត់ គឺបង្កើតបក្សថ្មីចូលរួមប្រកួតប្រជែងតាមលក្ខណៈប្រជាធិបតេយ្យនៅក្នុងការបោះឆ្នោតខាងមុខ។ លោកចាត់ទុកជម្រើសនេះថា «វាប្រសើរជាងដើរនិយាយឃោសនាមិនពិត ហើយខាតបង់ពេលវេលាកាន់តែច្រើន»។
ប៉ុន្តែក្រុមអតីតមេដឹកនាំគណបក្សសង្រ្គោះជាតិដែលកំពុងនៅក្រៅប្រទេសធ្លាប់បានអះអាងថាពួកគេនឹងមិនទៅបង្កើតគណបក្សថ្មីតាមយុទ្ធសាស្ត្ររបស់លោក ហ៊ុន សែន ដែលរៀបចំទុកនោះឡើយ។ បើតាមអតីតមេដឹកនាំគណបក្សប្រឆាំងនេះ ពួកគេកំពុងតែជំរុញឲ្យអន្តរជាតិដាក់សម្ពាធលើរដ្ឋាភិបាល លោក ហ៊ុន សែន ដើម្បីប្រគល់គណបក្សសង្រ្គោះជាតិមកវិញ និងដោះលែង លោក កឹម សុខា រួមទាំងអ្នកទោសមនសិការមួយចំនួនទៀត។ ជំហរនេះក៏ត្រូវបានកញ្ញា កឹម មនោវិទ្យា អគ្គនាយិការងកិច្ចការសាធារណៈនៃអតីតគណបក្សសង្រ្គោះជាតិបញ្ជាក់ឡើងវិញជាមួយវិទ្យុបារាំងអន្តរជាតិនៅថ្ងៃអាទិត្យនេះដែរ។
សូមបញ្ជាក់ថា គណបក្សសង្គ្រោះជាតិ ត្រូវបានតុលាការកំពូលរំលាយចោលកាលពីថ្ងៃទី១៦ ខែវិច្ឆិកា ឆ្នាំ២០១៧ ហើយថ្នាក់ដឹកនាំរបស់គណបក្សប្រឆាំងដ៏ធំមួយនេះចំនួន ១១៨រូប ក៏ត្រូវបានផ្អាកសកម្មភាពនយោបាយរយៈពេល ៥ឆ្នាំផងដែរ។
ក្រោយពីរំលាយគណបក្សសង្រ្គោះជាតិដែលជាគូប្រជែងដ៏ខ្លាំងជាមួយគណបក្សកាន់អំណាចនោះ សហគមន៍អន្តរជាតិខាងលោកសេរី បានចាត់ទុកលទ្ធិប្រជាធិបតេយ្យនៅកម្ពុជាថាបានស្លាប់ទៅហើយ។
នៅរយៈកាលចុងក្រោយនេះ សភាអាមេរិក និងសភារបស់សហភាពអឺរ៉ុបកំពុងតែដាក់សម្ពាធលើរដ្ឋាភិបាលកម្ពុជាតាមរយៈការផ្តាច់ជំនួយជាបន្តបន្ទាប់ នឹងឈានទៅបង្កកទ្រព្យសម្បត្តិមន្រ្តីរដ្ឋាភិបាលកម្ពុជាមួយចំនួនដែលទុកនៅក្រៅប្រទេស ដោយសារតែពួកគេជាប់ពាក់ព័ន្ធនឹងការរំលាយគណបក្សសង្រ្គោះជាតិ និងការរំលោភសិទ្ធិមនុស្សធ្ងន់ធ្ងរ។ ប៉ុន្តែនៅក្នុងសប្តាហ៍នេះ លោក ហ៊ុន សែន អះអាងថា លោកគ្មានប្រាក់ទុកនៅក្រៅប្រទេសនោះទេ ហើយរុញឲ្យមានការបង្កកទ្រព្យសម្បត្តិមន្រ្តីកម្ពុជាឲ្យបានលឿន ប្រសិនបើពួកគេមានលុយផ្ញើទុកនៅធនាគារបរទេសមែននោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ