ក្រសួងព័ត៌មានបិទវេបសាយព័ត៌មានចំនួន១៧ "ដើម្បីរក្សាភាពស្ងប់ស្ងាត់នៅថ្ងៃស និងថ្ងៃបោះឆ្នោត"
ក្រសួងព័ត៌មានបានបញ្ជាឲ្យបិទវេបសាយផ្សព្វផ្សាយព័ត៌មានចំនួន១៧ រយៈពេល៤៨ម៉ោងចាប់ពីម៉ោង១២ យប់ថ្ងៃទី២៧ រហូតដល់ម៉ោង១២យប់ថ្ងៃទី២៩ កក្កដា ពោលគឺមិនឲ្យដំណើរការផ្សព្វផ្សាយព័ត៌មាននៅថ្ងៃស និងនៅថ្ងៃបោះឆ្នោត។ បើតាមក្រសួងព័ត៌មាន វិធានការនេះ គឺដើម្បីរក្សាភាពស្ងប់ស្ងាត់ទាំងនៅថ្ងៃស និងបោះឆ្នោតទៅការអំពាវនាវរបស់គ.ជ.ប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
វេបសាយផ្សព្វផ្សាយព័ត៌មានទាំង១៧នេះ រួមមានជាអាទិ៍ វេបសាយវិទ្យុVOD វិទ្យុVOA វិទ្យុអាស៊ីសេរី និងវេបសាយកាសែតភ្នំពេញប៉ុស្តិ៍។ ពពួកវេបសាយទាំងនេះ ត្រូវបានបិទដំណើរការតាំងពីម៉ោង១២ យប់ថ្ងៃទី ២៧ កក្កដា មកម្លេះ។ លោកផុស សុវណ្ណ ដែលជាអគ្គនាយកនៃអគ្គនាយកដ្ឋានព័ត៌មាននិង សោតទស្សន៍នៃក្រសួងព័ត៌មានបានបកស្រាយប្រាប់វិទ្យុបារាំងអន្តរជាតិនៅរសៀលថ្ងៃសៅរ៍នេះថា ការបិទវេបសាយទាំងនេះ គឺធ្វើឡើងទៅតាមការអំពាវនាវរបស់គណៈកម្មាធិការជាតិរៀបចំការបោះឆ្នោត(គ.ជ.ប) ដែលស្នើឲ្យមានភាពស្ងប់ស្ងាត់នៅថ្ងៃស និងនៅថ្ងៃបោះឆ្នោត ពោល គឺមិនឲ្យផ្សព្វផ្សាយព័ត៌មានណាដែលប៉ះពាល់ដល់ដំណើរការបោះឆ្នោត។
ម្យ៉ាងវិញទៀត បើតាមលោកផុស សុវណ្ណ វេបសាយដែលក្រសួងព័ត៌មានបញ្ជាឲ្យបិទនេះ គឺមិនមានម្ចាស់ច្បាស់លាស់ និងមិនបានចុះបញ្ចីនៅក្រសួងព័ត៌មាន។ ការណ៍នេះ ធ្វើឲ្យក្រសួងព័ត៌មានមិនដឹងថា ត្រូវផ្ញើសេចក្តីជូនដំណឹងទៅកាន់អ្នកណា និងនៅកន្លែងណានោះទេ។ លោកផុស សុវណ្ណ បានគូសបញ្ជាក់ថា ក្រសួងព័ត៌មាន គឺជាអ្នកគ្រប់គ្រង និងទទួលខុសត្រូវទៅលើការចុះផ្សាយរបស់បណ្តាវេបសាយព័ត៌មានទាំងអស់។ ដូច្នេះហើយ ចង់ឫមិនចង់ ក្រសួងត្រូវតែចាត់វិធានការ ដើម្បីឲ្យស្របទៅនឹងច្បាប់ស្តីពីការបោះឆ្នោតរបស់គ.ជ.ប។ បើតាមលោកផុស សុវណ្ណ ដដែល ការបិទវេបសាយបែបនេះ មិនមែនជារឿងចម្លែកអ្វីនោះទេ ដោយហេតុថា កាលពីអាណត្តិមុនៗ ក្រសួងព័ត៌មានក៏ធ្លាប់បានធ្វើដូច្នេះផងដែរ។
ក្រោយការចាត់វិធានការរបស់ក្រសួងព័ត៌មាននេះ មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យដែលគ្រប់គ្រងលើវិទ្យុVOD បានចេញសេចក្តីប្រកាសព័ត៌មានមួយដោយការពារពីភាពត្រឹមត្រូវ និងស្របច្បាប់នៃវេបសាយព័ត៌មានVOD។ ក្រៅពីការពារVOD មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យក៏បានចាត់ទុកវិធានការរបស់ក្រសួងព័ត៌មាននេះថា ជារឿងនយោបាយ និងរារាំងប្រជាពលរដ្ឋកម្ពុជាដែលកំពុងត្រូវការយ៉ាងខ្លាំងនូវសារព័ត៌មានឯករាជ្យ។ ជាមួយគ្នានេះ មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យក៏បានបញ្ជាក់ដែរថា កង្វះសារព័ត៌មានឯករាជ្យក្នុងការផ្តល់ព័ត៌មានអំពីការបោះឆ្នោត នោះដំណើរការបោះឆ្នោត តម្លាភាព ភាពសេរី និងយុត្តិធម៌នៃការបោះឆ្នោតនឹងត្រូវចោទសួរជាក់ជាមិនខានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ