គ.ជ.ប ទទួលបានពាក្យបណ្តឹងចំនួនបីករណី ក្នុងរយៈពេលប្រាំថ្ងៃនៃយុទ្ធនាការឃោសនាបោះឆ្នោត
រយៈពេលប្រាំថ្ងៃនៃយុទ្ធនាការឃោសនាបោះឆ្នោត នីតិកាលទី៦ គណៈកម្មាធិការជាតិរៀបចំការបោះឆ្នោត ហៅកាត់ថា (គ.ជ.ប) បានទទួលពាក្យបណ្តឹងចំនួនបីករណី ដែល១ករណី នៅខេត្តកណ្តាល និង២ករណីទៀត នៅខេត្តរតនគិរី។ យ៉ាងណាក៏ដោយ គជប អះអាងថា រហូតមកទល់ពេលនេះ បណ្តឹងចំនួន២ នៅក្នុងខេត្តរតនៈគិរី ត្រូវបានដោះស្រាយរួចរាល់អស់ហើយ។
ចុះផ្សាយនៅថ្ងៃ៖
ស្តាប់ - ០២:១១
លោក ឌឹម សុវណ្ណារុំ អ្នកនាំពាក្យគណៈកម្មាធិការជាតិរៀបចំការបោះឆ្នោត គ.ជ.ប បានបញ្ជាក់ប្រាប់វិទ្យុបារាំងអន្តរជាតិ នៅថ្ងៃទី ១២ កក្កដានេះថា រហូតមកទល់ពេលនេះ បណ្តឹងចំនួន២ ក្នុងចំណោមបណ្តឹងចំនួន៣ ត្រូវបានគណៈកម្មាការរៀបចំការបោះឆ្នោតឃុំ សង្កាត់ ខេត្តរតនៈគិរី ដោះស្រាយរួចរាល់អស់ហើយ។
បណ្តឹងទាំងពីរដែលបានដោះស្រាយរួចរាល់នោះគឺ៖ ទី១ ចៅសង្កាត់ឡាបានសៀក បានដាក់ពាក្យប្តឹងប្រធានក្រុមការងារគណបក្សសម្ព័ន្ធដើម្បីប្រជាធិបតេយ្យប្រចាំខេត្តរតនៈគិរី ដែលបានចាក់ផ្សព្វផ្សាយគោលនយោបាយ លើទីតាំងអតីតព្រលានយន្តហោះដោយគ្មានការអនុញ្ញាត។ និងបណ្តឹងទីពីរ ចៅសង្កាត់រងទី១ សង្កាត់បឹងកន្សែង ដែលប្តឹងប្រធានក្រុមការងារគណបក្សសម្ព័ន្ធដើម្បីប្រជាធិបតេយ្យដដែល ដោយសារតែបានចាក់ផ្សាយរូបភាពលើផ្លូវសាធារណៈ ដោយមិនសុំការអនុញ្ញាត។
ចំណែកបណ្តឹងមួយទៀត នៅស្រុកស្អាងខេត្តកណ្តាល ភ្នាក់ងារគណបក្សសម្ព័ន្ធដើម្បីប្រជាធិបតេយ្យ បានដាក់ពាក្យប្តឹងបុរសម្នាក់ ដែលបានយកដុំថ្មគប់លើម៉ូតូកង់បី ដែលជាមធ្យោបាយចាក់មេក្រូ ចល័តរបស់គណបក្សសម្ព័ន្ធដើម្បីប្រជាធិបតេយ្យ។ រហូតមកទល់ពេលនេះ បណ្តឹងរបស់គណបក្សសម្ព័ន្ធដើម្បីប្រជាធិបតេយ្យ កំពុងស្ថិតនៅក្នុងដៃរបស់គណៈកម្មាការរៀបចំការបោះឆ្នោតឃុំ សង្កាត់ ខេត្តកណ្តាល ដើម្បីធ្វើការស៊ើបអង្កេត។ នេះបើតាម លោក ឌឹម សុវណ្ណារុំ។
ក្រៅពីនេះ មានករណីមួយទៀតនៅក្នុងខេត្តតាកែវ ដែលអតីតសកម្មជនគណបក្សសង្គ្រោះជាតិម្នាក់ ត្រូវបានកម្លាំងសមត្ថកិច្ចខេត្ដតាកែវ ចុះឃាត់ខ្លួនភ្លាមៗ កាលពីថ្ងៃទី ១១ កក្កដា បន្ទាប់ពីគាត់យកកាំបិតទៅកាប់ស្លាកគណបក្សប្រជាជនកម្ពុជា ខណៈដែលគណបក្សប្រជាជន បានយកស្លាករបស់ខ្លួនទៅដាក់នៅទីតាំងចាស់របស់អតីតស្លាកគណបក្សសង្គ្រោះជាតិធ្លាប់ដាក់។
ទាក់ទងនឹង បរិយាកាសទូទៅនៃយុទ្ធនាការឃោសនាបោះឆ្នោតវិញ ត្រូវបាន គ.ជ.ប វាយតម្លៃជារួមថា ប្រព្រឹត្តិទៅដោយរលូន គ្មានអំពើហិង្សា និងគ្មានអ្វីគួរឱ្យកត់សម្គាល់ឡើយ នៅក្នុងក្របខ័ណ្ឌទូទាំងប្រទេស។
សូមជម្រាបជូនថា យុទ្ធានាការឃោសនាបោះឆ្នោតជ្រើសតាំងតំណាងរាស្រ្ត នីតិកាលទី៦ មានរយៈពេល ២០ ថ្ងៃ ដោយចាប់ផ្តើមពី ថ្ងៃទី០៧ ដល់ថ្ងៃទី២៧ ខែកក្កដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ