អង្គការតម្លាភាពកម្ពុជា៖ យុវជនមិនសូវយល់ដឹង ឬយល់ដឹងតិចតួច ពីច្បាប់និងបទបញ្ញត្តិក្នុងការប្រឆាំងអំពើពុករលួយ
របាយការណ៍របស់អង្គការតម្លាភាពកម្ពុជា ដែលទើបតែចេញផ្សាយក្នុងសប្ដាហ៍នេះ បានបង្ហាញថា ៩៩ភាគរយនៃយុវជនដែលត្រូវបានស្ទង់មតិ ឯកភាពថា អំពើពុករលួយជាឧបសគ្គដ៏ធំមួយ ដល់ការអភិវឌ្ឍជាតិ។ ប៉ុន្តែជាមួយគ្នានេះដែរ យុវជនម្នាក់ក្នុងចំណោម២នាក់ គឺធ្លាប់បានឆ្លងកាត់អំពើពុករលួយនៅក្នុងការសុំឯកសារ និងនៅក្នុងសាលា។ បើផ្អែកតាមរបាយការណ៍ដដែល យុវជនខ្មែរមិនសូវយល់ដឹង ឬយល់ដឹងតិចតួចបំផុត អំពីច្បាប់និងបទបញ្ញត្តិរបស់រដ្ឋាភិបាល ក្នុងការលើកស្ទួយសុចរិតភាព និងបង្ការអំពើពុករលួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ដើម្បីស្វែងយល់និងប៉ាន់ប្រមាណឥរិយាបថ ព្រមទាំងការយល់ឃើញអំពីសុចរិតភាព និងអំពើពុករលួយនៅក្នុងចំណោមក្រុមយុវជន អង្គការតម្លាភាពកម្ពុជាបានធ្វើការស្ទង់មតិថ្នាក់ជាតិមួយ ស្ដីអំពីការយល់ឃើញរបស់យុវជន អំពីអំពើពុករលួយ និងសុចរិតភាពនៅកម្ពុជា។ ការស្ទង់មតិនោះ ត្រូវបានធ្វើទៅលើយុវជនដែលមានអាយុពី១៥ដល់៣០ឆ្នាំ ចំនួន១២០០នាក់ ក្នុងខេត្តក្រុងចំនួន។
របាយការណ៍នៃការស្ទង់មតិ ដែលទើបតែត្រូវបានចេញផ្សាយជាផ្លូវការនៅក្នុងសប្ដាហ៍នេះ បានបង្ហាញឲ្យឃើញថា ៩៩ភាគរយនៃអ្នកដែលត្រូវបានស្ទង់មតិ ឯកភាពថា អំពើពុករលួយជាឧបសគ្គដ៏ធំមួយ ដល់ការអភិវឌ្ឍជាតិ។ ប៉ុន្តែជាមួយគ្នានេះ បើតាមរបាយការណ៍ យុវជនម្នាក់ក្នុងចំណោម២នាក់ ធ្លាប់បានឆ្លងកាត់អំពើពុករលួយ ក្នុងការព្យាយាមសុំឯកសារឬអាជ្ញាប័ណ្ណ និងនៅក្នុងពេលប្រឡងនៅសាលារៀន។
៩៨ភាគរយនៃយុវជនដែលត្រូវបានស្ទង់មតិយល់ថា មនុស្សមានសុចរិតភាព គឺជាអ្នកដែលមិនប្រព្រឹត្តខុសច្បាប់ ទោះក្នុងស្ថានភាពបែបណាក៏ដោយ។ យ៉ាងណាក៏ដោយ ៤០ភាគរយនៃអ្នកដែលត្រូវបានស្ទង់មតិ ក៏ជឿដែរថា មនុស្សមានសុចរិតភាព អាចចូលរួមប្រព្រឹត្តអំពើពុករលួយ ដើម្បីដោះស្រាយបញ្ហាលំបាកផ្ទាល់ខ្លួនផងដែរ។
បើផ្អែកតាមរបាយការណ៍ដដែល យុវជន៧១ភាគរយ បានរាយការណ៍ថា ពួកគេមិនសូវយល់ដឹង ឬយល់ដឹងតិចតួចបំផុត អំពីច្បាប់និងបទបញ្ញត្តិរបស់រដ្ឋាភិបាល ក្នុងការលើកស្ទួយសុចរិតភាព និងបង្ការអំពើពុករលួយ។
ទន្ទឹមនឹងការរកឃើញអស់ទាំងនេះ អង្គការតម្លាភាពកម្ពុជាបានជំរុញឲ្យរដ្ឋាភិបាលបង្កើតឲ្យមានច្បាប់ស្ដីពីការការពារអ្នករាយការណ៍អំពីអំពើពុករលួយ។ ជាច្បាប់ ដែលបើតាមអង្គការតម្លាភាពកម្ពុជា គឺអាចបង្កើតបរិយាកាសអំណោយផលមួយសម្រាប់ឲ្យយុវជន រាយការណ៍ក៏ដូចជាប្រឆាំងអំពើពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ