កញ្ឆាជាប្រភេទគ្រឿងញៀនម្យ៉ាងដែលច្បាប់អន្តរជាតិចាត់ទុកថាជាគ្រឿងញៀនខ្សោយ ជាហេតុធ្វើឱ្យគេមិនសូវចាប់អារម្មណ៍ខ្លាំងពីគ្រោះថ្នាក់នៃការជក់វាទេ។ កាលពីសប្តាហ៍មុន រដ្ឋមន្ត្រីបារាំងម្នាក់ បានព្រលយគំនិតចង់ដាក់កញ្ឆាឱ្យលក់ស្របច្បាប់ ដើម្បីងាយគ្រប់គ្រង និងបានបំផុសឱ្យមានប្រតិកម្មប្រឆាំងផងនិងគាំទ្រផង។ តាមការពិត ឈ្មោះថាគ្រឿងញៀនមិនដែរល្អទេ កញ្ឆា ឬ ជាភាសាបារាំង Marijuana, joint, Haschich, Hach, ឬ Shit អាចបង្កផលវិបាកយ៉ាងច្រើនដល់សុខភាព ជាពិសេស បើគេសាកល្បងជក់វា តាំងពីនៅវ័យក្មេងនៅឡើយ។
នៅប្រទេសបារាំង ជក់កញ្ឆាកំពុងតែពេញនិយមឡើងៗ ជាពិសេសចំពោះក្មេងជំទង់ និងយុវវ័យ ហើយគេអាចរកទិញបានដោយងាយ និងដោយធម្មតា។ ក៏ប៉ុន្តែអ្វីជាឥទ្ធិពល និងជាគ្រោះថ្នាក់ពិតប្រាកដចំពោះសុខភាព គេពុំបានជ្រាបច្បាស់ប៉ុន្មានទេ។
តើកញ្ឆាជាអ្វី ?
តាមពិតកញ្ឆាជារុក្ខជាតិម្យ៉ាង ងាយដាំ ងាយដុះ និងមានផ្ទុកសារធាតុពុល ឬ ម៉ូលេគុល សំខាន់មួយ ដែលជាភ្នាក់ងារទទួលខុសត្រូវបង្កឥទ្ធិពលលើប្រព័ន្ធសសៃរប្រសាទ មានឈ្មោះថា Tetrahydrocannabinol ហៅកាត់ THC។ ហើយត្រូវបានគេចាត់បញ្ចូល ទៅក្នុងបញ្ជីគ្រឿងញៀន។ កំហាប់របស់កញ្ឆា ប្រែប្រួលទៅតាមរបៀបផ្សំធ្វើ និងទៅតាម តំបន់នៃការដាំដុះ។
តើគេយកកញ្ឆាមកជក់ក្នុងទំរង់បែបណាខ្លះ ?
ក្រោយពីបានកែច្នៃ សម្ងួត ឬ បំផ្លែងឱ្យចេញជាសណ្ឋានផ្សេងគ្នាមក រុក្ខជាតិកញ្ឆា ត្រូវ បានអ្នកប្រើប្រាស់ដាក់ឈ្មោះប្លែកៗគ្នា ទៅតាមទម្រង់។ បើជាស្លឹក និងធាង សម្ងួត គេច្រើននិយម ហៅថា ស្មៅ Herbe ចំណែកឯជ័ររបស់វាវិញ ដែលខ្ចប់ជាបន្ទះ ឬទ្រវែង មានពណ៌ បៃតង ត្នោត ឬលឿង មានឈ្មោះថា Haschich ou hachis hash។ កញ្ឆាទាំងពីរប្រភេទនេះ ត្រូវបាន គេយកមកលាយជក់ជាមួយនឹងបារី។ ជាចុងក្រោយគឺប្រេងកញ្ឆា។ គេច្រើនជក់វាក្នុងខ្សៀ ប៉ុន្តែពុំសូវមានធ្វើចរាចរច្រើនទេ។
ឥទ្ធិពល និង គ្រោះថ្នាក់នៃការជក់កញ្ឆា
តាំងពីមានការបែងចែក ច្បាប់ទាក់ទងនឹងបញ្ហាគ្រឿងញៀននៅ សតវត្សទី ២០ មក កញ្ឆាត្រូវបានគេចាត់ទុកជាគ្រឿងញៀនខ្សោយ ឬ អាចនិយាយផ្ទុយមកវិញបានថា បើគេប្រើពាក្យ គ្រឿងញៀនខ្សោយនោះគឺគេនិយាយសំដៅលើកញ្ឆាហើយ។
ប៉ុន្តែបច្ចុប្បន្ននេះ គ្រូពេទ្យជាច្រើនយល់ថា កញ្ឆាមិនមែនជាគ្រឿងញៀនខ្សោយ ដូចដែលគេបានគិតពីមុន នោះទេ ការពិតកញ្ឆាជាគ្រឿងញៀន ដែលមានប្រតិកម្មយឺត ប៉ុណ្ណោះ តែពេលបានចូលជ្រាបដល់ក្នុងសារពាង្គកាយមនុស្សណាហើយ មនុស្សនោះត្រូវការ ពេលវេលាយូរណាស់សម្រាប់ បំផ្លាញសារធាតុ THCរបស់កញ្ឆានេះវិញ។
ប្រសាសន៍របស់ លោក សាស្ត្រាចារ្យវេជ្ជបណ្ឌិត Pr. Costentin, បណ្ឌិតឱសថសាស្ត្រ នៅ Rouen ប្រទេសបារាំង៖
"នៅពេលដែលសារធាតុសកម្មរបស់កញ្ឆា បានចូលទៅដល់ខួរក្បាល វានឹងធ្វើការវិវត្តន៍ ឥទ្ធិពលពិសេសរបស់វា បានន័យថា សារធាតុនេះមិនរលាយ ឬ មិនត្រូវបានបំផ្លាញ ចោលទៅវិញទេ តែវាទៅរលាយចូលក្នុងខួរ ហើយសំងំលាក់ខ្លួននៅទីនោះ រាប់ថ្ងៃ រាប់ អាទិត្យក៏មាន។ កញ្ឆាមិនមែនជាគ្រឿងញៀនខ្សោយធម្មតាទេ តែវាជាគ្រឿងញៀនយឺត។ វាមានសកម្មភាពយឺតៗ មកកកប្រមូលផ្តុំគ្នានៅក្នុងខួរក្បាល ដែលជាហេតុធ្វើឱ្យអ្នកជក់ វ័យក្មេងកាន់តែញៀនឡើងៗ។
ដំបូងឡើងជក់កញ្ឆា ជាការកំសាន្តមួយ ! មួយខ្សឺត ពីខ្សឺតដំបូង ហាក់នាំអារម្មណ៍យើង ឱ្យបានជួបនឹងសេចក្តីសុខ សប្បាយ ប៉ុន្តែនៅពេលដែលអារម្មណ៍សប្បាយរីករាយ រសាត់ បាត់ទៅ នោះការជក់កញ្ឆាជាតម្រូវការដ៏សំខាន់មួយ និងក្រោយមកក្លាយជាតម្រូវការ ដែលមិនអាចខានបាន មិនអាចទប់ជាប់។"
ឥទ្ធិពលទទួលបានភ្លាមៗ
អ្នកដែលជក់កញ្ឆាគ្រប់រូប តែងសាកល្បងស្វែងសុភមង្គលក្នុងផ្លូវអារម្មណ៍ បន្ធូរភាពតាន តឹង និងសាកល្បងស្វែងរកអារម្មណ៍ថ្មីប្លែកៗ ឱ្យកាន់តែអណ្តែតអណ្តូង។ ក៏ប៉ុន្តែ តាមការពិត អ្នកជក់ទាំងអស់នោះមិនអាចទទួលបានអារម្មណ៍ទាំងអស់នេះបានដូចបំណងគ្រប់ពេលវេលានោះទេ។
ក្រោយពីបានចូលជា្របក្នុងរាងកាយមនុស្សហើយ កញ្ឆានឹងបញ្ចេញឥទ្ធិពលរបស់ខ្លួន ទៅលើខួរក្បាលប្លែកៗគ្នា ទៅតាមបុគ្គលិកលក្ខណៈរបស់មនុស្សម្នាក់ៗ មានជាអាទិ៍ អារម្មណ៍រីករាយសប្បាយ ធូរស្បើយ និងទន់ងងុយ។ ប៉ុន្តែកញ្ឆានេះក៏អាចនាំឱ្យយើងមានអារម្មណ៍រសាប់រសល់ ចង់ក្អួត ចង្អោរ ពុលល្ងីល្ងើ ញ័រសាច់ ថប់ដង្ហើម មានអារម្មណ៍ ច្របូលច្របល់ ក្នុងខួរក្បាល ខ្វល់តប់ប្រមល់ យ៉ាងខ្លាំង។
កញ្ឆានឹងធ្វើឱ្យសមត្ថភាពចងចាំ និង ការគិតគូរ ប្រមូលអារម្មណ៍របស់ខួរក្បាលធ្លាក់ចុះ យ៉ាងឆាប់រហ័ស។ ភ្នែកក៏ស្រវាំង បាត់បង់ភាពប្រុងប្រយ័ត្ន និង ស្ពឹកស្រពន់ក្នុងការ បញ្ចេញប្រតិកម្មតបតនឹងបញ្ហាអ្វីមួយ។ អារម្មណ៍បែបនេះផ្តល់គ្រោះថ្នាក់ខ្លាំងណាស់នៅពេលបើកបរ។
មានឥទ្ធិពលជាក់ស្តែងផ្សេងទៀត ដែលគេអាចនឹងជួបប្រទះនោះគឺ ៖
- សសៃរឈាមតូចៗហើម ដែលគេអាចសំគាល់បានតាមរយៈភ្នែកឡើងក្រហមថ្លែ
- ទទួលទានអាហារបាន
- ជីពចរលោតញាប់ហួសចង្វាក់ធម្មតា
- ស្ងួតបំពង់ក ប្រេះបបូរមាត់
- និងជួនកាលមានអារម្មណ៍ចង់ក្អួត
គ្រោះថ្នាក់ចំពោះផ្លូវដង្ហើមជាយថាហេតុ
មិនខុសពីបារីទេ ផ្សែងកញ្ឆាក៏មានបង្កប់ទៅដោយសារធាតុពុលពីធម្មជាតិ បង្កជំងឺមហារីក។ ដូច្នេះផ្សែងនេះនឹងទៅបំពុលប្រព័ន្ធផ្លូវដង្ហើមរបស់យើង។ បើជក់បារី ហើយជក់កញ្ឆាទៀតនោះ នោះសួតរបស់អ្នកនឹងងាយឆាប់កើតជម្ងឺមហារីកជាងអ្នកជក់តែបារីតែមួយមុខខ្លាំងណាស់។
ផលវិបាកនៃការជក់កញ្ឆាជាប់ជាប្រចាំ
ឥទ្ធិពលដែលបង្កឡើងដោយកញ្ឆាមិនមែនជាគ្រោះថ្នាក់ស្រាលសាមញ្ញធម្មតា ដូចការ ដែលគ្រប់គ្នាបានគិតនោះទេ។ ពេលខ្លះ កញ្ឆាផ្តល់គ្រោះមហន្តរាយយ៉ាងខ្លាំងចំពោះ សុខភាព និងសង្គម ៖
- ជួបការលំបាកក្នុងការផ្ចង់អារម្មណ៍រៀនសូត្រ
- ខ្វល់គិតតែពីស្វែងរកជក់ ផ្តាច់ខ្លួនពីគ្រួសារ និងសង្គម
- យុវជនខ្លះងាយរងគ្រោះ អាចនឹងធ្លាក់ខ្លួនឈឺ មានវិបត្តិផ្លូវចិត្ត ចេះតែភ័យព្រួយ ស្លន់ និង ងាយកើតជម្ងឺធ្លាក់ទឹកចិត្ត la dépression។ ចំពោះអ្នកខ្លះ កញ្ឆាអាចនឹងបង្កឱ្យមានជម្ងឺ ចិត្តរោគ ជក់កញ្ឆាតែមួយប៉ុយប៉ុណ្ណោះ គឺវាល្មមគ្រប់គ្រាន់នឹងបញ្ចូនចូលមន្ទីរពេទ្យ ឯកទេសទៅហើយ។ សំរាប់អ្នកខ្លះទៀត នឹងមានជម្ងឺសសៃរប្រសាទ ធ្ងន់ធ្ងរ តួយ៉ាង ចេះតែ រវើរវាយ បែកឆ្ងាយពីអ្វីដែលជាជីវិតពិតក្នុងលោក ភាសាបារាំងហៅថា la schizophrénie។
មហារីកពងសង្វាស ជាជម្ងឺកម្រមួយ ប៉ុន្តែក្នុងរយៈពេល ប៉ុន្មានទសវត្សចុងក្រោយនេះ ជម្ងឺនេះបានកើនឡើងគួរឲ្យព្រួយបារម្ភ ជាពិសេសចំពោះយុវជនពីអាយុ ១៥ ទៅ៣៥ ឆ្នាំ។ មូលហេតុដែលអាចពន្យល់បាតុភូតនេះគឺបណ្តាលមកពីការកើនឡើងនៃការជក់កញ្ឆា។ ការសិក្សាមួយបង្ហាញថា អ្នកជក់កញ្ឆាមានគ្រោះកើតជម្ងឺមហារីក ដល់ទៅ៧០ ភាគរយលើសអ្នកដែលពុំជក់កញ្ឆាទាល់តែសោះ។ គួរឲ្យសោកស្តាយ ផ្ទុយស្រលះពីការគិតរបស់អ្នកជក់ដែលស្វែងរកភាពស្រើបស្រាល កញ្ឆានឹងធ្វើឲ្យបុរសបាត់បង់សមត្ថភាពក្នុងការបន្តពូជ និងក្នុងការរួមភេទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ