ទស្សនាវដ្តី Charlie Hebdo គូររូបត្លុកកំប្លែងប្រមាថព្យាការីមហាម៉េដ
នៅក្នុងបរិបទតានតឹងពិសេសដែលកំពុងកើតមាននៅក្នុងពិភពអ៊ីស្លាម ក្រោយពីមានការផ្សព្វផ្សាយខ្សែភាពយន្តប្រឆាំងអ៊ីស្លាមតាមរយៈអ៊ិនធ័រណែត ទស្សនាវដ្តីបារាំង Charlie Hebdo បានសម្រេចផ្សព្វផ្សាយនៅថ្ងៃពុធទី១៩កញ្ញានេះ នូវរូបគំនូរត្លុកកំប្លែងប្រមាថព្យាការីមហាម៉េដ។ រដ្ឋាភិបាលបារាំងមានជាអាទិ៍លោក ឡរ៉ង់ហ្វាប៊ីយូស បានសម្តែងការសោកស្តាយនៃទង្វើនេះ។ លោកនាយករដ្ឋមន្ត្រីបារាំងវិញ អំពាវនាវឲ្យម្នាក់ៗមានស្មារតីទទួលខុសត្រូវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
នៅក្នុងច្បាប់ព្រហ្មទណ្ឌ គេអាចសន្និដ្ឋានបានថា ទស្សនាវដ្តី Charlie Hebdo ប្រព្រឹត្តទង្វើពុំគប្បីនេះម្តងទៀត។ ដោយហេតុថា នៅខែវិច្ឆិកាឆ្នាំ២០១១កន្លងទៅ ក្រោយពីបានផ្សព្វផ្សាយលេខពិសេសដែលបានដាក់ចំណងជើងថា “Charia Hebdo » ដោយមានព្យាការីមហាម៉េដធ្វើជា “អ្នកនិពន្ធនាយក” ទីស្នាក់ការនៃ ទស្សនាវដ្តី ជើងខិលឈ្មោះ Charlie Hebdo បានត្រូវគេដុតបំផ្លាញ។
នៅថ្ងៃពុធទី១៩កញ្ញានេះ ទស្សនាវដ្តីជើងខិលឈ្មោះ Charlie Hebdo បានសម្រេចផ្សព្វផ្សាយរូបគំនូរត្លុកកំប្លែងរបស់ខ្លួន ដោយបានបង្ហាញឲ្យឃើញនូវ រូបព្យាការីមហាម៉េដជាមនុស្សពិការអង្គុយនៅលើកៅអីរុញដោយអ្នកកាន់សាសនាហ្ស៊ីវម្នាក់។
គួរបញ្ជាក់ថា រូបត្លុកកំប្លែងនេះបានលេចចេញនៅក្នុងបរិបទមួយដ៏សែនតានតឹងដែលកំពុងតែកើតមាននៅក្នុងពិភពអ៊ីស្លាម ក្រោយពីមានការផ្សាយតាមរយៈអ៊ីនធ័រណែតនូវខ្សែភាពយន្តប្រមាថសាសនាអ៊ីស្លាម ផលិតដោយសមិទ្ធិករដែលមានសញ្ជាតិអាមេរិក-និងអ៊ីស្រាអែល។
ជះប្រេងលើភ្លើង
សម្រាប់ចាងហ្វាងនៃការផ្សាយទស្សនាវដ្តី ឈ្មោះ Charlie Hebdo ការគូររូបត្លុកកំប្លែងមាក់ងាយលេងសើចគឺជាសិទ្ធិសេរីភាពក្នុងការបញ្ចេញមតិ ហើយក៏ជាឆ្នាំងបាយនៃមុខរបររបស់ ទស្សនាវដ្តី ជើងខិលឈ្មោះ Charlie Hebdoនេះដែរ។
ចំណែកឯរដ្ឋាភិបាលបារាំងវិញ មានការទើសទាល់យ៉ាងខ្លាំង ម្ខាងចង់ការពារសិទ្ធិសេរីភាពក្នុងការបញ្ចេញមតិ ម្ខាងទៀតចង់កុំឲ្យមានការប៉ះពាល់ដល់ការគោរពសាសនា។ ទាំងនេះបានបណ្តាលឲ្យនាយករដ្ឋមន្ត្រីបារាំងលោក Jean-Marc Ayrault ថ្លែងថា “យើងនៅក្នុងប្រទេសមួយដែលគេត្រូវតែគោរពសិទ្ធិសេរីភាពក្នុងការបញ្ចេញមតិ ក៏ដូចគ្នាអ៊ីចឹងដែរសម្រាប់អ្នកគូររូបត្លុកកំប្លែង ក៏ប៉ុន្តែបើប្រសិនជា សិទ្ធិសេរីភាពក្នុងការបញ្ចេញមតិនេះធ្វើឲ្យប៉ះពាល់ដល់សិទ្ធិសេរីភាពរបស់អ្នកដទៃ នោះគេអាចប្តឹងទៅតុលាការ”។
រីឯរដ្ឋមន្ត្រីក្រសួងការបរទេសបារាំងលោក ឡូរ៉ង់ហ្វាប៊ីយូស ឯណោះវិញ បានថ្លែងចោទសួរថា “តើគេគួរ ជះប្រេងលើភ្លើង នៅខណៈពេលដែលកំពុងតែកើតមានភាពតានតឹងបែបនេះដែរឬទេ?” ហើយនៅក្នុងតួនាទីរបស់លោកជាអ្នកទទួលខុសត្រូវលើសន្តិសុខរបស់ប្រជាជនបារាំងដែលរស់នៅក្រៅប្រទេស រដ្ឋមន្ត្រីក្រសួងការបរទេសបារាំងលោក ឡូរ៉ង់ហ្វាប៊ីយូស សម្ដែងក្តីបារម្ភ ហើយបានចេញបញ្ជាឲ្យគេធ្វើការពង្រឹងសន្តិសុខនៅតាមស្ថានទូតបារាំងនៅលើពិភពលោក។
ហើយនៅថ្ងៃពុធទី១៩កញ្ញាឆ្នាំ២០១២នេះ ក្រសួងការបរទេសបារាំងបានថ្លែងឲ្យដឹងថា “ស្ថានទូត ស្ថានកុងស៊ុល និងសាលារៀនបារាំងនៅក្នុងម្ភៃប្លាយប្រទេសដែលកាន់សាសនាអ៊ីស្លាម នឹងត្រូវបិទទ្វារនៅថ្ងៃសុក្រ ដែលជាថ្ងៃសូត្រធម៌បន់ស្រន់ដ៏សំខាន់សម្រាប់អ្នកកាន់សាសនាអ៊ីស្លាម។ ទាំងនេះដើម្បីជួយការពារសុវត្ថិភាពរបស់ប្រជាជនបារាំងដែលរស់នៅក្រៅប្រទេស ក្រោយពីមានការសម្រេចផ្សព្វផ្សាយរូបគំនូរត្លុកកំប្លែងប្រមាថព្យាការីមហាម៉េដដោយទស្សនាវដ្តី Charlie Hebdo នៅក្នុងប្រទេសបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ