Christine Lagarde ជាស្រ្តីទីមួយកាន់តំណែងអគ្គនាយកមូលនិធិរូបិយវត្ថុ IMF
ដោយគ្មានការភ្ញាក់ផ្អើល លោកស្រី Christine Lagarde ជនជាតិបារាំង ត្រូវបានក្រុមប្រឹក្សាភិបាលរបស់មូលនិធិរូបិយវត្ថុអន្តរជាតិ IMFបោះឆ្នោត ជ្រើសរើសជាប្រធានស្ថាប័នសេដ្ឋកិច្ចអន្តរជាតិ ក្នុងអាណត្តិ ៥ឆ្នាំ។ អាណត្តិនេះនឹងគិតចាប់តាំងពីថ្ងៃចូលកាន់តំណែង ជាផ្លូវការ នៅថ្ងៃទី ៥ កក្កដា ២០១១។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:២៩
លោកស្រី Christine Lagardeធ្លាប់ធ្វើជារដ្ឋមន្រ្តីក្រសួងសេដ្ឋកិច្ចបារាំង ដែលស្ថាប័ននេះ ជាដង្ហើមសំខាន់របស់បារាំង និងដែលពីមុនមកគ្រប់គ្រង តែដោយមនុស្សប្រុស។ ជាថ្មីម្តងទៀត លោកស្រីបានក្លាយជាស្រ្តីទីមួយដែលត្រូវគេជ្រើសរើសឲ្យដឹកក្បាលម៉ាស៊ីន IMF ព្រោះ ចាប់តាំងពីការកកើត នៅឆ្នាំ ១៩៤៤ ស្ថាប័ននេះដឹកនាំតែដោយមនុស្សប្រុស ៩នាក់។
ក្នុងវ័យ ៥៥ឆ្នាំ ឆាកអន្តរជាតិ លោកស្រី Christine Lagardeបានលេចធ្លោខ្លាំង នៅក្នុងឆាកអន្តរជាតិ ជាពិសេស នៅក្នុងកិច្ចប្រជុំរដ្ឋមន្រ្តីសេដ្ឋកិច្ចរបស់ក្រុមប្រទេស G8 នៅឆ្នាំមុន ដោយលោកស្រីបានតួនាទីសំខាន់ ជម្រុញឲ្យប្រទេសមហាអំណាចសេដ្ឋកិច្ចជួយប្រទេស នៅក្នុងតំបន់អឺរ៉ូ។
ប៉ុន្តែ ក្នុងក្រុមប្រឹក្សាភិបាលរបស់ IMF ក្រៅពីប្រទេស នៅអឺរ៉ុប និងអាមេរិក នៅមានប្រទេសទើបមានសេដ្ឋកិច្ចរីកលូតលាស់ថ្មី ដូចជាចិន ប្រេស៊ីល ឥណ្ឌា និងរុស្ស៊ីដែលជាសមាជិកសំខាន់។ កន្លងមក មានមតិអរិភាពមួយចំនួនចេញពីអាស៊ីដែល មិនចង់ឲ្យ លោកស្រី Lagardeជាប់ធ្វើជាប្រធានIMF ព្រោះ គេបារម្ភថា លោកស្រី Lagardeមកពីអឺរ៉ុប នឹងប្រើមូលនិធិអន្តរជាតិសម្រាប់ជួយតែប្រទេសតំបន់អឺរ៉ុប បុណ្ណោះ។
ប៉ុន្តែ នៅក្នុងយុទ្ធនាការរកសំឡេងគាំទ្ររបស់ខ្លួន នៅអាស៊ី និងនៅអាហ្រ្វិក លោកស្រី Lagarde បានថ្លែងបញ្ជាក់ច្បាស់ពីជំហររបស់លោកស្រី ក្នុងការជម្រុញឲ្យមានវត្តមាន កាន់តែច្រើនរបស់តំណាងប្រទេសអាស៊ី និងសមាជិកក្រុមប្រទេសរីកលូតលាស់ថ្មី គឺក្រុមប្រទេសBRICSនៅក្នុងមុខតំណែងសំខាន់ៗរបស់IMF។ លោកស្រី Lagarde សន្យាឲ្យមានតុល្យភាពអំណាច រវាងតំណាងប្រទេសអភិវឌ្ឍន៍ និងប្រទេសដែលទើបរីកចម្រើនថ្មី ដូចចិន ប្រេស៊ីល និងឥណ្ឌាជាដើម នៅក្នុងស្ថាប័នIMF។
គឺការសន្យាធ្វើកំណែទម្រង់ ស៊ីជម្រៅក្នុងស្ថាប័នIMF ការបោះឆ្នោតប្រកបដោយតម្លាភាព និងការជួយដំឡើងក្រុមប្រទេសBRICS ទៅក្នុងតួនាទីក្រុមអ្នកសម្រេចចិត្តរបស់IMF ដែលធ្វើឲ្យ លោកស្រី Lagarde បានទទួលការគាំទ្រភាគច្រើន ដោយមិនលំបាក។
ទាំងអស់គ្នាសុទ្ធតែយល់ថា លោកស្រី Lagarde មកពីប្រទេសអឺរ៉ុប សក្តិសមជាងគេក្នុងការទទួលមុខតំណែងអគ្គនាយកIMF ក្នុងកាលៈទេសៈនេះ គឺកាលៈទេសៈដែលប្រទេសក្រិករបស់សហភាពអឺរ៉ុបកំពុងជួបវិបត្តិជំពាក់បំណុលគេវ័ណ្ឌក។ ក្រុមប្រទេសនៅអាស៊ី និងនៅអាមេរិកខ្លាចថា វិបត្តិហិរញ្ញវត្ថុ នៅក្រិកប៉ះពាល់ដល់នឹងអាចធ្វើឲ្យប៉ះពាល់ដល់ជញ្ជីងពាណិជ្ជកម្មរវាងអឺរ៉ុប និងអាស៊ី ឬក៏វិបត្តិជំពាក់បំណុលគេ អាចឆ្លងចេញពីអឺរ៉ុប។
នៅថ្ងៃអង្គារម្សិលមិញ នៅប៉ុន្មានម៉ោងក្រោយពេលគាត់ជាប់ឆ្នោត លោកស្រី Lagardeបានធ្វើ អត្ថាធិប្បាយទាក់ទងនឹងប្រទេសក្រិក ដោយប្រាប់ប្រជាជន និងក្រុមបក្សប្រឆាំងក្រិកឲ្យចូលរួមដើរនយោបាយ ជាមួយរដ្ឋាភិបាល ដើម្បីជួយប្រទេសឲ្យចេញពីវិបត្តិ។ នៅថ្ងៃពុធទី ២៩ មិថុនា សភាក្រិកត្រូវអនុម័តច្បាប់ដែលនឹងគាំទ្រ ឬមិនគាំទ្រវិធានត្បិតត្បៀតរបស់រដ្ឋាភិបាលក្រិក។ នៅថ្ងៃដដែល ប្រជាជនធ្វើបាតុកម្មតវ៉ាប្រឆាំងនឹងនយោបាយថ្មីរបស់រដ្ឋាភិបាលខ្លួន។
រដ្ឋាភិបាលក្រិក សុខចិត្តធ្វើនយោបាយ ចាយត្បិតត្បៀតថវិកា ដើម្បីអាចបានខ្ចីប្រាក់ពី សហភាពអឺរ៉ុប ពីមូលនិធិរូបិយវត្ថុអន្តរជាតិ IMF ជាថ្មី គឺ ប្រមាណជាង ១០០ពាន់លានទៀត ដើម្បីយកទៅសងបំណុលដែលរដ្ឋក្រិកជំពាក់គេ។
វិបត្តិក្រិកជាវិញ្ញាសាសំខាន់ដែលអាចឲ្យគេធ្វើតេស្ត វាស់ស្ទង់ពីសមត្ថភាពរបស់អគ្គនាយកFMI ថ្មី។ តើលោកស្រី Lagardeអាចនិយាយបញ្ចុះបញ្ចូលប្រទេសសមាជិករបស់ស្ថាប័ននេះដើម្បីឲ្យផ្តល់ប្រាក់កម្ចីដល់ក្រិក ឬអត់ គឺអាស្រ័យទៅលើសមត្ថភាពរបស់ លោកស្រី Lagarde ដែលអាចបង្ហាញថា ក្រិកនឹងមានលទ្ធភាពចាកចេញពីវិបត្តិលើកនេះ។ អ្នកសេដ្ឋកិច្ចអឺរ៉ុបបានវាយតម្លៃហើយថា បើសិនរដ្ឋាភិបាលកិ្រកមិនអាចចាត់វិធានការត្បិតត្បៀតបានសម្រេចទេ រដ្ឋក្រិក នឹងក្រ័យធន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ