សន្និសីទពិភពលោកស្ដីពីជំងឺស៊ីដាឬអេដស៍នៅទីក្រុងវ៉ាស៊ីនតោន
សន្និសីទពិភពលោកលើកទី១៩ស្ដីពីជំងឺស៊ីដាឬអេដស៍នៅទីក្រុងវ៉ាស៊ីនតោនបានចាប់បើកសម័យប្រជុំរបស់ខ្លួននៅថ្ងៃអាទិត្យទី២២កក្កដានេះរហូតដល់ថ្ងៃទី២៧កក្កដាឆ្នាំ២០១២។ អ្នកវិទ្យាសាស្ត្របាននាំគ្នាតាមមើលការវិវឌ្ឍន៍នៃជំងឺស៊ីដាឬអេដស៍នៅតាមប្រទេសនានាក្នុងលោក។ បច្ចុប្បន្ននេះ មានមនុស្សប្រមាណ៣៤លាននាក់ដែលមានផ្ទុកមេរោគស៊ីដាឬអេដស៍នៅក្នុងខ្លួន។ ហើយនៅថ្ងៃសៅរ៍ទី២១កក្កដាឆ្នាំ២០១២ម្សិលមិញ រោងចក្រសាធារណៈផលិតឱសថប្រឆាំងមេរោគអេដស៍នៅទ្វីបអាហ្វ្រិក បានចាប់បើកសម្ពោធនៅទីក្រុង Maputo ។ នេះគឺពិតជានិមិត្តរូបមួយដ៏ខ្លាំងក្លា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៧
អ្នកវិទ្យាសាស្ត្រ២៥ ០០០នាក់ត្រូវគេរង់ចាំនៅទីក្រុងវ៉ាស៊ីនតោន
អ្នកវិទ្យាសាស្ត្រសង្ឃឹមថា នឹងមានមនុស្សមួយជំនាន់អាចគេចរួចពីជំងឺស៊ីដាឬអេដស៍។ ទោះបីជាថ្នាំantirétroviraux បានទទួលជោគជ័យក្នុងការប្រយុទ្ធទប់ទល់នឹងមេរោគអេដស៍ក្តី ក៏ថ្នាំantirétroviraux នេះ ពុំអាចព្យាបាលអ្នកជំងឺឲ្យជាសះស្បើយបានឡើយ។
គួរបញ្ជាក់ថា មានមនុស្សមួយចំនួនតូចមាន “សមត្ថភាពធម្មជាតិ” ក្នុងការប្រយុទ្ធទប់ទល់នឹងមេរោគអេដស៍ ដោយពុំដែលបានទទួលការព្យាបាលអ្វីឡើយ។ នេះជាការគូសបញ្ជាក់ដោយសាស្ត្រាចារ្យ Françoise Barré-Sinoussi ដែលជាអ្នកបានស្រាវជ្រាវរកឃើញមេរោគអេដស៍។
នៅទ្វីបអាហ្វ្រិកប៉ែកខាងត្បូងវិញ មានប្រទេសជាច្រើនបានទទួលរងគ្រោះដោយមេរោគអេដស៍។ ប្រទេសទាំងនោះ បានទទួលជោគជ័យគួរឲ្យកត់សម្គាល់ ក្នុងការជួយព្យាបាលអ្នកដែលមានផ្ទុកមេរោគអេដស៍នៅក្នុងខ្លួន។ ក្នុងចំណោមនោះ មានប្រទេសអាហ្វ្រិកខាងត្បូង ប្រទេសហ្ស៊ីមបាហ្វេ ប្រទេសម៉ាឡាវី ប្រទេសម៉ូហ្សមប៊ីក ...។ល។...
ប្រទេសទាំងប៉ុន្មានខាងលើនេះ មានប្រជាជនជាច្រើនមានផ្ទុកមេរោគអេដស៍នៅក្នុងខ្លួន បើប្រៀបផ្ទឹមទៅនឹងប្រទេសឯទៀតៗ។ ហើយរដ្ឋាភិបាលនៃប្រទេសទាំងនោះមានឆន្ទៈនយោបាយក្នុងការប្រយុទ្ធប្រឆាំងទល់នឹងមេរោគអេដស៍។
ក៏ប៉ុន្តែការខិតខំទាំងនោះអាចជួបនឹងការខូចខាត ដោយហេតុតែមានកង្វះថវិកា ហើយទន្ទឹមគ្នានេះ អង្គការសហប្រជាជាតិបានប៉ាន់ប្រមាណថា គេត្រូវធ្វើការចំណាយជាសរុបប្រមាណពី២២ទៅ២៤ពាន់លានដុល្លារចាប់ពីនេះទៅទល់ឆ្នាំ២០១៥ ដើម្បីអាចនឹងប្រយុទ្ធបង្ក្រាបធ្វើឲ្យជំងឺអេដស៍ស្គាល់ការថមថយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ