កូរ៉េខាងជើងសាងសង់ប្រតិករនុយក្លេអ៊ែរជិតរួចហើយ
រូបភាពដែលថតបានដោយផ្កាយរណបបង្ហាញថា គម្រោងសាងសង់ប្រតិករនុយក្លេអ៊ែរដែលប្រើទឹកស្រាលរបស់កូរ៉េខាងជើងកំពុងតែមានដំណើរទៅមុខយ៉ាងលឿនរហ័ស។ ប្រតិករនេះ ជាការចាំបាច់សម្រាប់បង្កើតអាវុធនុយក្លេអ៊ែរ។
ចុះផ្សាយនៅថ្ងៃ៖
ស្តាប់ - ០១:៤៦
ការវិភាគទៅលើរូបភាពដែលថតបានដោយផ្កាយរណបកាលពីថ្ងៃទី៦សីហាកន្លងទៅនេះបង្ហាញថា កូរ៉េខាងជើងបានឈានជើងជិតទៅដល់ការបង្កើតអាវុធនុយក្លេអ៊ែរហើយ។ នេះបើយោងទៅតាមអ្នកឯកទេសខាងសិក្សារូបភាពផ្កាយរណបរបស់ទស្សនាវដ្តីអង់គ្លេសJane’s Defense Weekly។
អ្នកឯកទេសបានអះអាងយ៉ាងដូច្នេះ ក្រោយពីបានពិនិត្យឃើញមានដោម(Dôme)មួយ ដែលមានវិជ្ឈមាត្ររហូតដល់ទៅ២១ម៉ែត្រ នៅមជ្ឈមណ្ឌលនុយក្លេអ៊ែរYongbyon។ សូមជម្រាបថា រូបភាពមុនៗដូចយ៉ាងរូបភាពដែលថតបានដោយផ្កាយរណបកាលពីខែឧសភាកន្លងទៅនេះ ពុំមានបង្ហាញពីដោមដ៏ធំមួយនេះទេ។
ផ្អែកទៅលើរូបភាពថ្មីៗទាំងនេះ ពួកអ្នកជំនាញនៃទស្សនាដ្តីJane’s Defense Weekly អះអាងថា ប្រតិករនុយក្លេអ៊ែរដែលប្រើទឹកស្រាលរបស់កូរ៉េខាងជើងអាចនឹងសង់ហើយដាច់ស្រេចនៅពាក់កណ្តាលឆ្នាំ២០១៣ខាងមុខនេះ។ រីឯពួកអ្នកឯកទេសផ្សេងទៀតយល់ឃើញថា ការសាងសង់ប្រតិករទឹកស្រាលនេះនឹងអាចចប់នៅឆ្នាំ២០១៤ឬ២០១៥ឯណោះ។
គួររំឭកថា កូរ៉េខាងជើងបានប្រាប់ឱ្យដឹងនៅឆ្នាំ២០១០ថា ខ្លួនកំពុងសាងសង់ប្រតិករនុយក្លេអ៊ែរមួយ ដើម្បីបង្កើតអគ្គិសនីសម្រាប់ប្រើប្រាស់មិនមែនដើម្បីបង្កើតអាវុធនុយក្លេអ៊ែរទេ។ ក៏ប៉ុន្តែ របបកុម្មុយនិស្តព្យុងយ៉ាង(Pyongyang) បានសាកល្បងអាវុធនុយក្លេអ៊ែរពីរដងរួចទៅហើយ។ ម្យ៉ាងទៀត កាលពីខែកុម្ភៈកន្លងទៅនេះ កូរ៉េខាងជើងបានសន្យាថា ផ្អាកកម្មវិធីនុយក្លេអ៊ែរចោលមួយរយៈពេល ក្រោយពីបានចុះហត្ថលេខាជាមួយសហរដ្ឋអាមេរិកលើកិច្ចព្រមព្រៀងមួយស្តីពីជំនួយស្បៀងអាហារពីសំណាក់ទីក្រុងវ៉ាស៊ីនតោន។ ក្រោយមកទៀត កិច្ចព្រមព្រៀងនេះត្រូវបានប្រកាសទុកជាមោឃៈ បន្ទាប់ពីនៅថ្ងៃទី១៣មេសា កូរ៉េខាងជើងបានបាញ់សាកល្បងកាំជ្រួចមីស្ស៊ីលចម្ងាយឆ្ងាយ ដែលខ្លួនអះអាងថា ជាកាំជ្រួចសាកល្បងបង្ហោះផ្កាយរណប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ