អ្នកជំនាញអង្គការសុខភាពពិភពលោក៖ ករណីឆ្លងអេបូឡានឹងកើតមានជាថ្មីនៅអឺរ៉ុប
ចុះផ្សាយនៅថ្ងៃ៖
ស្តាប់ - ០៦:១៤
គណៈកម្មការអឺរ៉ុប បានទាមទារឲ្យរដ្ឋាភិបាលអេស្ប៉ាញបកស្រាយបំភ្លឺពីមូលហេតុដែលធ្វើឲ្យការឆ្លងមេរោគអេបូឡាក្នុងទឹកដីអឺរ៉ុប។ អាជ្ញាធរសុខាភិបាលអេស្ប៉ាញកំពុងចាត់វិធានការកំណត់រកមុខសញ្ញា ក្រុមមនុស្សដែលអាចឆ្លងមេរោគអេបូឡាពីស្រ្តីគិលានុបដ្ឋាយិកា ដែលគេរកឃើញឆ្លងមេរោគអេបូឡា នៅដើមសប្តាហ៍នេះ។ ជារួម មនុស្សជាង៥០នាក់ ដែលនៅក្នុងនោះមានជាង៣០នាក់ ជាបុគ្គលិកពេទ្យ ដែលបម្រើការជាមួយគិលានុបដ្ឋាយិកា ឆ្លងមេរោគ អេបូឡា ត្រូវបានគេដាក់បង្ឃាំង ឲ្យស្ថិតនៅ ក្រោមការតាមដានត្រួតពិនិត្យខ្ពស់ នៅមន្ទីរពេទ្យកាឡូ ទី៣។ នៅថ្ងៃពុធនេះ គ្រូពេទ្យជនជាតិន័រវែសម្នាក់ដែលឆ្លងមេរោគអេបូឡានៅលីបេរីយ៉ា ត្រូវបានបញ្ជូនទៅព្យាបាលនៅ ទីក្រុងអូស្លូ។ រហូតមក ប្រទេសនៅអឺរ៉ុបមួយចំនួន បានទទួលព្យាបាលអ្នកជម្ងឺដែលឆ្លងមេរោគអេបូឡានៅអាហ្រ្វិកខាងលិច ប៉ុន្តែ នេះជាលើកទីមួយ ដែលបុគ្គលិកពេទ្យឆ្លងមេរោគអេបូឡាក្នុងទឹកដីអឺរ៉ុប។
នៅមន្ទីរពេទ្យកាឡូទីបី ដែលស្ថិតនៅក្នុងរដ្ឋធានីម៉ាឌ្រីដ មនុស្ស៤នាក់ ផ្សេងទៀត ដែលក្នុងនោះ មានប្តីរបស់គិលានុបដ្ឋាយិកា ដែរនោះ ត្រូវបានបញ្ជូនឲ្យទៅព្យាបាល ដាច់ដោយឡែក តាំងពីថ្ងៃចន្ទ។
ក្រសួងសុខាភិបាលអេស្ប៉ាញបានអះអាងថា គេបានគោរពបទដ្ឋានព្យាបាលអ្នកជម្ងឺអេបូឡា ទៅតាមការកំណត់របស់អង្គការសុខភាពពិភពលោក។ ប៉ុន្តែ ការអះអាងដូច្នេះ មិនអាចបញ្ចុះបញ្ចូលគណៈកម្មការអឺរ៉ុបបានទេ។ ព្រោះថា បើសិនជាគេគោរពបទដ្ឋានមែន ហេតុអ្វីបានជាអ្នកជំនួយសុខភាព ឬស្រ្តីគិលានុបដ្ឋាយិកាអាចឆ្លងមេរោគអេបូឡា?
តាមអ្នកនាំពាក្យរបស់គណៈកម្មការអឺរ៉ុបគឺប្រាកដជាមានចំណុចខ្សោយ ខ្វះចន្លោះត្រង់ណាមួយហើយនៅក្នុងប្រព័ន្ធសុខាភិបាលអេស្ប៉ាញ ទើបអ្នកព្យាបាលជម្ងឺជាតិអេស្ប៉ាញអាចឆ្លងមេរោគអេបូឡា នៅក្នុងពេលគាត់បានចូលរួមព្យាបាលបុព្វជិតអេស្ប៉ាញកាលពីចុងខែកញ្ញា។
កន្លងមក មានអ្នកឆ្លងមេរោគអេបូឡាក្នុងទឹកដីអាហ្វ្រិកប្រមាណ១០ត្រូវបានបញ្ជូនឲ្យមក ទទួលការព្យាបាលក្នុងទឹកដីអឺរ៉ុប។ គិលានុបដ្ឋាយិកាជាតិបារាំង ឬអ្នកជំនាញសុខភាពរបស់ប្រទេសអាហ្រ្វិកត្រូវបានបញ្ជូនមកព្យាបាលនៅអាល្លឺម៉ង់។ ពួកគេទាំងនោះត្រូវបានព្យាបាលឲ្យជាសះស្បើយ ហើយបុគ្គលិកពេទ្យដែលទទួលបន្ទុកព្យាបាលនៅបារាំង ឬអាល្លឺម៉ង់ក្តី ក៏គ្មានគ្រោះថ្នាក់ ឆ្លងមេរោគអេបូឡា ដូចនៅអេស្ប៉ាញដែរ។
បច្ចុប្បន្ននេះ គេកំពុងចោទសួរផងដែរពីសមត្ថភាពអន្តរាគមន៍របស់មន្ទីរពេទ្យក្នុងការតាមដាន ករណីឆ្លងមេរោគអេបូឡា។ តាមប្តីរបស់ស្រ្តីអ្នកជម្ងឺ នៅក្រោយពេលសម្អាតគ្រែរបស់សង្ឃកាតូលិកស្លាប់ដោយមេរោគអេបូឡា គិលានុបដ្ឋាយិកាបានសិទ្ធិឈប់សម្រាក និងក្រោយមកគាត់បានធ្លាក់ខ្លួនឈឺ និងមានរោគសញ្ញាដូចឆ្លងមេរោគអេបូឡា។ គាត់បានសុំឲ្យមន្ទីរពេទ្យធ្វើតេស្តតាំងពីថ្ងៃទី ៣០កញ្ញា ប៉ុន្តែ មន្ទីរពេទ្យដែលគាត់ធ្វើការ បដិសេធដោយហេតុផលសីតុណ្ហភាពខ្លួនគាត់នៅទាប។ ប៉ុន្តែ ទាល់តែស្រ្តីអ្នកជម្ងឺទទូចសុំខ្លាំងពេកទើបមន្ទីរពេទ្យសម្រេចធ្វើតេស្តដែលបង្ហាញថា គាត់ឆ្លងមេរោគអេបូឡា។
កំហឹង និងការមិនពេញចិត្តនឹងចំណាត់ការរបស់រដ្ឋាភិបាលអេស្ប៉ាញ
បុគ្គលិកពេទ្យអេស្ប៉ាញ ដែលភ័យព្រួយពីសុខភាពផ្ទាល់ខ្លួន បានផ្ទុះកំហឹងនឹងរបៀបចាត់ចែងវិធានាការនានារបស់រដ្ឋាភិបាលដើម្បីទប់ស្កាត់មេរោគអេបូឡា។ នៅយប់ថ្ងៃពុធ បុគ្គលិករបស់មន្ទីរពេទ្យ កាឡូទី៣ កន្លែងដែលគិលានុបដ្ឋាយិកាបានឆ្លងមេរោគអេបូឡា ពីសង្ឃកាតូលិក បានធ្វើបាតុកម្មដើម្បីទាមទារឲ្យរដ្ឋមន្រ្តីសុខាភិបាលអេស្ប៉ាញចុះចេញពីតំណែង។
នៅក្រោយករណីឆ្លងមេរោគអេបូឡាត្រូវបានក្រសួងសុខាភិបាលអេស្ប៉ាញប្រកាសជាផ្លូវការ ទាំងបុគ្គលិកពេទ្យ ទាំងសហជីពគ្រូពេទ្យចេញមុខរិះគន់វិធានការសុខភាពរបស់រដ្ឋាភិបាល។ តាមសហជីពរបសបុគ្គលិកពេទ្យអេស្ប៉ាញ គឺនយោបាយរឹតត្បិតថវិការបស់រដ្ឋាភិបាលដែលជាអ្នកទទួលខុសត្រូវធ្វើឲ្យស្រ្តីគិលានុបដ្ឋាយិកាឆ្លងមេរោគអេបូឡា។ តាមសហជីព មន្ទីរពេទ្យកាឡូទីបី បើទោះបីជាកន្លែងដែលមានតួនាទីព្យាបាលមេរោគឆ្លង ប៉ុន្តែមន្ទីរពេទ្យនេះត្រូវបានកាត់បន្ថយសកម្មភាពរបស់ខ្លួន និងបុគ្គលិកពេទ្យ ដោយសារតែនយោបាយរឹតត្បិតថវិការបស់រដ្ឋាភិបាល។
តាមក្រុមគ្រូពេទ្យរបស់មន្ទីរពេទ្យវិញ ដោយសារតែខ្វះបុគ្គលិក មន្ទីរពេទ្យគ្មានពេលបានប្រុងប្រៀបខ្លួនដើម្បីរៀបចំទទួលព្យាបាលជម្ងឺអេបូឡា។ តាមបុគ្គលិកពេទ្យខ្លះ ដែលសុំមិនបញ្ចេញឈ្មោះ នៅមុនពេលទទួលព្យាបាលបុព្វជិតអេស្ប៉ាញដែលឆ្លងមេរោគអេបូឡានៅអាហ្វ្រិក គេគ្រាន់តែបានទទួលការណែនាំរយៈពេលប៉ុន្មានម៉ោងប៉ុណ្ណោះ។
មួយវិញទៀត បុគ្គលិកពេទ្យទាំងអស់បានអះអាងថា នៅពេលគេទទួលព្យាបាលសង្ឃកាតូលិកទាំងពីរ មន្ទីរពេទ្យបានអនុវត្តត្រឹមបទដ្ឋានកម្រិតទីពីរ ក្នុងពេលដែលអង្គការសុខភាពពិភពលោកណែនាំឲ្យប្រើបទដ្ឋានថ្នាក់ទីបួន ដើម្បីការពារកុំឲ្យឆ្លងមេរោគអេបូឡានៅក្នុងពេលអន្តរាគមន៍ ជួយព្យាបាលអ្នកជម្ងឺ។
នៅអេស្ប៉ាញ រូបភាពដែលបង្ហាញពីបុគ្គលិកពេទ្យអេស្ប៉ាញប្រើស្រោមដៃ ដែលបិទភ្ជាប់ទៅនឹងខោអាវពេទ្យដោយស្កុត បានបង្កឲ្យមានការរិះគន់យ៉ាងខ្លាំងក្នុងចំណោមមតិប្រជាជន។ តាមធម្មតា គេត្រូវប្រើសំលៀកបំពាក់ ដែលគ្មានការជ្រាបទឹក បិទជិត តាំងពីក្បាលដល់ចុងជើង ប៉ុន្តែ តាមរូបភាពដែលកាសែតក្នុងស្រុកអេស្ប៉ាញចុះផ្សាយ បុគ្គលិកពេទ្យប្រើត្រឹមស្កុតដើម្បីបិទភ្ជិតជាមួយដៃអាវពេទ្យតែប៉ុណ្ណោះ។
មេរោគអេបូឡានឹងអាចកើតមានច្រើនទៀត នៅអឺរ៉ុប និងអាមេរិក
ទីប្រឹក្សាម្នាក់របស់អង្គការសុខភាពពិភពលោក គឺលោកPeter Piot ដែលជាមនុស្សម្នាក់ ក្នុងចំណោមអ្នកវិទ្យាសាស្រ្តរកឃើញមេរោគអេបូឡា បាននិយាយប្រាប់ទូរទស្សន៍អង់គ្លេសBBC កាលពីម្សិលមិញថា ករណីឆ្លងមេរោគអេបូឡានឹងអាចកើតមានជាបន្តទៀត នៅក្នុងចំណោមបុគ្គលិកពេទ្យ មិនថា នៅក្នុងប្រទេសដែលជឿនលឿន។
បុគ្គលិកពេទ្យជាអ្នកប្រឈមខ្លាំងជាងគេនឹងការឆ្លងមេរោគអេបូឡា។ នៅអាហ្វ្រិក ក្នុងចំណោមអ្នកជម្ងឺ និងអ្នកស្លាប់ដោយមេរោគអេបូឡា ជាច្រើនពាន់នាក់ មានមួយចំនួនជាបុគ្គលិកពេទ្យ អ្នកជំនួយសុខភាព។ ពួកគេទាំងនោះត្រូវប៉ះពាល់ដោយផ្ទាល់នឹងខ្លួនអ្នកជម្ងឺ។ ដូចគេដឹងហើយថា គេអាចឆ្លងមេរោគអេបូឡា តាមរយៈការប៉ះពាល់វត្ថុជាតិរាវរបស់អ្នកជម្ងឺ ដូចជាស្ពែម ញើស ឈាម ឬទឹកមាត់។
បើតាមលោក Peter Piot បើសិនជាអ្នកជំនួយសុខភាពធ្វេសប្រហែលតែបន្តិច នោះគេអាចឆ្លងមេរោគអេបូឡាតែមួយប៉ប្រិចភ្នែកតែប៉ុណ្ណោះ។ លោក Peter Piot ពន្យល់ថា មេរោគអេបូឡានឹងមិនអាចឆ្លងរីករាត្បាតលឿនដូចនៅអាហ្វ្រិក ប៉ុន្តែអឺរ៉ុប ឬអាមេរិកក្តី នឹងទទួលករណីឆ្លងថ្មីនៅពេលខាងមុខ បើសិនគេមិនប្រុងប្រយ័ត្ន មិនទប់ស្កាត់ការឆ្លងរីករាលនោះទេ។
កន្លងមក នៅពេលមេរោគអេបូឡាចាប់ផ្តើមរាតត្បាតដំបូងនៅអាហ្វ្រិកខាងលិច អង្គការសុខភាពពិភពលោកបានបញ្ជាក់ពីកង្វះខាតប្រព័ន្ធសុខាភិបាល ដែលជាកត្តាមួយធ្វើឲ្យមេរោគអេបូឡាឆ្លងរីករាលដាលខ្លំាងនៅអាហ្វ្រិក។ ការសិក្សារបស់អឺរ៉ុបបានបង្ហាញថា ករណីចម្លងមេរោគអេបូឡាពីអ្នកជម្ងឺដែលត្រូវបញ្ជូនពីអាហ្វ្រិកមានកម្រិតខ្សោយបំផុត។ ការសិក្សាបង្ហាញយ៉ាងដូច្នេះ ដោយផ្អែកទៅលើលទ្ធភាពឆ្លង និងគុណភាពនៃប្រព័ន្ធសុខាភិបាលនៅអឺរ៉ុប។ ប៉ុន្តែ ករណីឆ្លងមេរោគអេបូឡារបស់គិលានុបដ្ឋាយិកាអេស្ប៉ាញបានបង្ហាញថា លទ្ធភាពឆ្លងមេរោគអេបូឡាអាចកើតមាននៅគ្រប់ពេលវេលា នៅអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ