ការបោះឆ្នោតសភាមុនអាណត្តិ នៅក្នុងបរិយាកាសនៃអ្នកគ្មានការធ្វើចំនួនដ៏ច្រើន និងអំពើពុករលួយ
នៅថ្ងៃអាទិត្យ១២ធ្នូនេះ បណ្តាជនកូសូវ៉ូត្រូវបោះឆ្នោតជ្រើសរើសសមាជិករដ្ឋសភាថ្មីជាលើកទី១ ចាប់តាំងពីការប្រកាសឯករាជ្យនៅខែកុម្ភៈឆ្នាំ២០០៨មក។
ចុះផ្សាយនៅថ្ងៃ៖
សេចក្តីរាយការណ៍របស់វីនស្តុន រតនា
គឺជាការបោះឆ្នោតជ្រើសរើសសមាជិករដ្ឋសភាថ្មីមុនអាណត្តិ ដោយហេតុវិបត្តិនយោបាយដែលសាធារណរដ្ឋកូសូវ៉ូឆ្លងកាត់ ចាប់តាំងពីចុងខែកញ្ញាមុននេះមកនិងដែលបានបណ្តាលឱ្យធ្លាក់រដ្ឋាភិបាលចម្រុះកូសូវ៉ូ។
ជនជាតិកូសូវ៉ូដែលមានសិទ្ធិបោះឆ្នោតចំនួន១លាន៦សែននាក់ត្រូវជ្រើសរើសនៅថ្ងៃអាទិត្យ១២ធ្នូនេះសមាជិករដ្ឋសភា១២០នាក់ នៅទីក្រុងPristina។រដ្ឋាភិបាលលោកនាយករដ្ឋមន្ត្រី Hashim Thaçi បានធ្លាក់ បន្ទាប់ពីលោកប្រធានាធិបតីសាធារណរដ្ឋ Fatmir Sedjiu ស្រាប់តែលាឈប់ពីមុខតំណែងគួរឱ្យភ្ញាក់ផ្អើលនិងការដកខ្លួនថយនៃក្រុមរដ្ឋមន្ត្រីរបស់គាត់ចេញពីអង្គការនីតិប្រតិបត្តិ។គណបក្សរបស់លោកThaçiនៅតែមានគោលជំហរល្អ ប៉ុន្តែទំនងជាពុំអាចមានសម្ព័ន្ធភាពថ្មីជាមួយគណបក្សធំមួយទៀតជាគណបក្សកណ្តាលនិយមលំអៀងទៅខាងស្ដាំ។ប្រកាសឯករាជ្យដោយខ្លួនឯង នៅខែកុម្ភៈឆ្នាំ២០០៨ សាធារណរដ្ឋកូសូវ៉ូស្ថិតនៅជាប្រទេសក្រីក្រខ្លាំងណាស់និងសេដ្ឋកិច្ចខ្លួនត្រូវស៊ីរូងដោយអំពើពុករលួយនិងអ្នកគ្មានការធ្វើចំនួនដ៏ច្រើន។៦០%នៃបណ្តាជនកូសូវ៉ូគឺជាយុវជនអាយុពុំដល់២៥ឆ្នាំហើយក្នុងចំណោមនេះ យុវជនចំនួន៧០%គ្មានការធ្វើ។
គណបក្សរបស់លោកនាយករដ្ឋមន្ត្រី Hashim Thaçi ដែលត្រូវបង្ខំចិត្តលាឈប់ពីមុខតំណែង នៅខែវិច្ឆិកាមុននេះ នៅតែមានប្រជាប្រិយភាពខ្លាំងដដែលគឺអ្នកមានបំណងចង់បោះឆ្នោតឱ្យគាត់មានចំនួនជាង៣០%។ប៉ុន្តែ គណបក្សប្រជាធិបតេយ្យកូសូវ៉ូ( PDK )របស់លោកThaçi ពុំអាចរំពឹងបានទៀតឡើយទៅលើអតីតសម្ព័ន្ធមិត្តរបស់ខ្លួនគឺបក្សសម្ព័ន្ធប្រជាធិបតេយ្យកូសូវ៉ូ( LDK )ដឹកនាំដោយលោកអភិបាលក្រុងPristina Isa Mustafa។លោកIsa Mustafaប្រកាសខ្លួនថាជាអ្នកទទួលកេរមរតកពីលោកអតីតប្រធានាធិបតីIbrahim Rugovaជានិមិត្តរូបនៃការតស៊ូដោយសន្តិវិធីទល់នឹងសាធារណរដ្ឋSerbie។ចំណែកឯលោកHashim Thaçiជាអតីតប្រមុខកងទ័ពរំដោះកូសូវ៉ូមានប្រជាប្រិយភាពដោយសារការតស៊ូប្រដាប់អាវុធ។គណបក្សសម្ព័ន្ធប្រជាធិបតេយ្យកូសូវ៉ូ( LDK )ដែលប្រមូលបានសន្លឹកឆ្នោតចង់បោះឱ្យខ្លួនតែ២៨%លែងចង់ធ្វើជាសម្ព័ន្ធមិត្តរបស់គណបក្សប្រជាធិបតេយ្យកូសូវ៉ូ( PDK )ទៀតឡើយ។គណបក្សLDKរំពឹងទៅលើកេរ្តិ៍ឈ្មោះជាអ្នកសុចរិតស្អាតស្អំនៃមេដឹកនាំខ្លួនគឺលោកIsa Mustafaនិងទៅលើហេតុការណ៍ថា រដ្ឋមន្ត្រី៦រូបរបស់លោកHashim Thaçiធ្វើជាកម្មវត្ថុនៃការស៊ើបអង្កេតរបស់ក្រុមបេសកជនអឺរ៉ូប Eulexពីបទពុករលួយឬបទឩក្រិដ្ឋចាត់តាំងឡើងគឺម៉ាហ្វីយ៉ា( mafia )។
ការបោះឆ្នោតនេះត្រូវសហភាពអឺរ៉ូបនិងស.រ.អា.ចាត់ទុកជាtestគឺការពិសោធន៍ចង់ដឹងបក្កភាពប្រជាធិបតេយ្យគឺភាពចាស់ទុំចាស់គំនិតនៃរបបប្រជាធិបតេយ្យនៅកូសូវ៉ូ។ការបោះឆ្នោតដោយសេរីនិងត្រឹមត្រូវស្ថិតនៅជាល័ក្ខខ័ណ្ឌសំរាប់ការសុំចូលជាសមាជិកសហភាពអឺរ៉ូប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ