ប្រជាជនអេហ្ស៊ីបបោះឆ្នោតជ្រើសតាំងប្រធានាធិបតី
ប្រជាជនអេហ្ស៊ីបអញ្ជើញទៅបោះឆ្នោតនៅថ្ងៃពុធទី២៣និងថ្ងៃព្រហស្បតិ៍ទី២៤ឧសភាឆ្នាំ២០១២នេះ ដើម្បីជ្រើសតាំងប្រធានាធិបតីតស្នងតំណែងពីលោកហូស្នីមូបារ៉ាក។ លោកហូស្នីមូបារ៉ាកដែលបានត្រូវបាតុករអេហ្ស៊ីប ផ្តួលរំលំកាលពីនិទិឃរដូវកន្លងទៅ។ ការបោះឆ្នោតជ្រើសតាំងប្រធានាធិបតីជាប្រវត្តិសាស្ត្រនេះ ជាលើកទីមួយហើយដែលគេពុំបានដឹងលទ្ធផលមុនការបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:០៨
ប្រទេសអេហ្ស៊ីប ដែលគ្រប់គ្រងដោយក្រុមយោធាតាំងពីថ្ងៃទី១១ខែកុម្ភៈឆ្នាំ២០១១ ក្រោយពីលោកអតីតប្រធានាធិបតីហូស្នីមូបារ៉ាកបានត្រូវផ្តួលរំលំដោយក្រុមបាតុករ នៅថ្ងៃពុធទី២៣និងថ្ងៃព្រហស្បតិ៍ទី២៤ឧសភាឆ្នាំ២០១២នេះ ប្រជាជនអេហ្ស៊ីបត្រូវគេអញ្ជើញឲ្យទៅបោះឆ្នោតជ្រើសតាំងប្រធានាធិបតីនៅជុំទីមួយ ក្នុងចំណោមបេក្ខជនប្រធានាធិបតីទាំងអស់១២នាក់។ ក្នុងចំណោមនេះ មានបេក្ខជនបួនរូបដែលលេចមុខជាងគេ ហើយដែលគេមានជំនឿថា អាចឈ្នះឆ្នោតក្លាយជាប្រធានាធិបតីអេហ្ស៊ីបនៅពេលខាងមុខនេះ។ បេក្ខជនប្រធានាធិបតីទាំងបួនរូបនោះគឺ៖ លោក Amr Moussa លោក Ahmed Chafik លោក Abdel Moneim Aboul Foutouh ហើយនិងលោក Mohammed Morsi ដែលក្នុងនេះមានពីរនាក់ធ្លាប់បានកាន់តំណែងជារដ្ឋមន្ត្រីនៅក្នុងរដ្ឋាភិបាលរបស់លោកហូស្នីមូបារ៉ាក ហើយនិងពីរនាក់ទៀតជាអតីតអ្នកប្រឆាំងចេញពីក្រុមអ៊ីស្លាមភាតរបុត្រ។
គួរកត់សម្គាល់ថា កាលដើមឡើយមានបេក្ខជនប្រធានាធិបតីទាំងអស់២៣នាក់ ប៉ុន្តែក្រោយពីមានការទម្លាក់ជម្រុះដោយគណៈកម្មការជាតិរៀបចំការបោះឆ្នោតអេហ្ស៊ីប នៅទីបំផុតមាននៅសល់តែបេក្ខជន១២នាក់ប៉ុណ្ណោះ ដែលត្រូវប្រជាជនអេហ្ស៊ីបមានសិទ្ធិចូលរួមធ្វើការបោះឆ្នោតប្រមាណ៥២លាននាក់ជ្រើសតាំងធ្វើជាប្រធានាធិបតី ក្រោមការឃ្លាំមើលនៃអ្នកសង្កេតការណ៍ជាតិនិងអន្តរជាតិជិត១០ ០០០នាក់ ដែលក្នុងនោះមានលោកអតីតប្រធានាធីបតីអាមេរិក Jimmy Carter ផងដែរ។
សូមបញ្ជាក់ថា កាលពីខែមករាកន្លងទៅនេះ ការបោះឆ្នោតជ្រើសតាំងសមាជិកសភាអេហ្ស៊ីបបានប្រព្រឹត្តទៅ ដោយបានបង្ហាញឲ្យឃើញនូវជោគជ័យដ៏ធំធេងរបស់គណបក្សអ៊ីស្លាមនិយមអេហ្ស៊ីប ដែលទទួលបានអាសនៈប្រមាណ២/៣នៃអាសនៈសរុប៤៩៨៖
- បក្សអ៊ីស្លាមភាតរបុត្រទទួលបាន២២២អាសនៈឬត្រូវជា៤៤,៦%។
- បក្សរស្មីរបស់ក្រុមសាឡាហ្វីស្ទឹ៍ទទួលបាន១១២អាសនៈឬត្រូវជា២២,៥%។
ថ្វីដ្បិតតែគណបក្សអ៊ីស្លាមនិយមទទួលបានសំឡេងឆ្នោតនិងអាសនៈយ៉ាងច្រើនសន្ធឹកសន្ធាប់ក្នុងការបោះឆ្នោតជ្រើសតាំងសមាជិកសភាអេហ្ស៊ីប កាលពីខែមករាកន្លងទៅនេះក៏ដោយ ក៏ពុំមែនមានន័យថា គណបក្សអ៊ីស្លាមនិយមអាចឈ្នះឆ្នោតដោយងាយៗក្នុងការបោះឆ្នោតជ្រើសតាំងប្រធានាធិបតីអេហ្ស៊ីបនេះដែរ។ ដោយហេតុថា នៅមួយសប្តាហ៍មុនការបោះឆ្នោតជ្រើសតាំងប្រធានាធិបតី មានប្រជាជនអេហ្ស៊ីបដល់ទៅប្រមាណ៣០%ឯណោះបានថ្លែងឲ្យដឹងថា គេនៅពុំទាន់សម្រេចចិត្តជ្រើសរើសយកបេក្ខជនណានៅឡើយ។
ប្រជាជនអេហ្ស៊ីបមានសិទ្ធិចូលរួមធ្វើការបោះឆ្នោតប្រមាណ៥២លាននាក់ក្នុងចំណោមប្រជាជនសរុប៨២លាននាក់នឹងត្រូវគេអញ្ជើញឲ្យមកចូលរួមធ្វើការបោះឆ្នោតជ្រើសតាំងប្រធានាធិបតីនៅជុំទី១ នៅថ្ងៃពុធទី២៣និងថ្ងៃព្រហស្បតិ៍ទី២៤ខែឧសភាឆ្នាំ២០១២។ បើយោងតាមប្រតិទិនជាផ្លូវការ ការរាប់សន្លឹកឆ្នោតនឹងត្រូវបិទបញ្ចប់នៅថ្ងៃសៅរ៍ទី២៦ឧសភាឆ្នាំ២០១២ ហើយលទ្ធផលនឹងត្រូវគេប្រកាសឲ្យដឹងនៅថ្ងៃអង្គារសប្តាហ៍ក្រោយ។
បេក្ខជនណាដែលទទួលបានសំឡេងឆ្នោតលើសពី៥០%នៅជុំទី១ នឹងត្រូវគេប្រកាសតែងតាំងជាប្រធានាធិបតីអេហ្ស៊ីប។ បើគ្មានបេក្ខជនទទួលបានលើសពី៥០%ទេ នោះគេនឹងត្រូវរៀបចំឲ្យមានការប្រកួតប្រជែងនៅជុំទី២ នៅថ្ងៃទី១៦និង១៧ខែមិថុនាខាងមុខ ហើយលទ្ធផលនឹងត្រូវកេប្រកាសឲ្យដឹងនៅថ្ងៃទី២១ខែមិថុនាឆ្នាំ២០១២។
ក្រោយការបោះឆ្នោតជ្រើសតាំងប្រធានាធិបតី ក្រុមយោធាដែលបានគ្រប់គ្រងប្រទេសអេហ្ស៊ីបតាំងពីថ្ងៃទី១១ខែកុម្ភៈឆ្នាំ២០១១ ត្រូវប្រគល់រដ្ឋអំណាចជូនអ្នកគ្រប់គ្រងស៊ីវិលឲ្យបានមុនថ្ងៃទី៣០មិថុនាឆ្នាំ២០១២ ដើម្បីឲ្យប្រទេសអេហ្ស៊ីបអាចឈានជើងចូលសករាជមួយថ្មី។ ប៉ុន្តែអ្វីដែលជាក់ច្បាស់គឺគេនៅពុំទាន់ដឹងថា តើអ្នកដែលឈ្នះឆ្នោតជាប្រធានាធិបតីអេហ្ស៊ីបថ្មីនេះ មានសមត្ថភាពគ្រប់គ្រាន់អាចនឹងថែរក្សា “គតិសមភាព និង គតិប្រជាធិបតេយ្យ” ដែលបង្កឲ្យកើតមានឡើងដោយ “និទិឃរដូវអារ៉ាប់” នៅឆ្នាំ២០១១នោះដែរឬទេ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ