អឺរ៉ុបបញ្ចុះបញ្ចូលអាស៊ីឲ្យជួយអូសទាញកំណើនសេដ្ឋកិច្ចរបស់ខ្លួន
កិច្ចប្រជុំកំពូលអាស៊ីអឺរ៉ុបបានបើកទ្វារ នៅថ្ងៃចន្ទនេះ នៅទីក្រុងវៀងចន្ទន៍ ប្រទេសឡាវ ដោយមានថ្នាក់ដឹកនាំសំខាន់ៗជាង៥០រូបមកពីទ្វីបទាំងពីរ។ នៅក្នុងកិច្ចប្រជុំរយៈពេលពីរថ្ងៃ ថ្នាក់ដឹកនាំមកពីអឺរ៉ុប ដែលកំពុងរួបរឹតដោយបញ្ហាវិបត្តិប្រាក់បំណុលចង់ទាក់ទាញប្រទេសអាស៊ីឲ្យចូលរួមជួយអឺរ៉ុបឲ្យមានកំណើនសេដ្ឋកិច្ច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
វិបត្តិប្រាក់បំណុលបានធ្វើឲ្យអឺរ៉ុប ទ្វីបចាស់ដែលធ្លាប់តែរុងរឿង ដាក់ខ្លួន បន្ទន់កាយ នៅចំពោះមុខអាស៊ី ដែលបច្ចុប្បន្ននេះ កំពុងមានសន្ទុះសេដ្ឋកិច្ចខ្លាំង។ នៅក្នុងកិច្ចប្រជុំកំពូល ក្នុងទីក្រុងវៀងចន្ទន៍ សឹងគ្រប់ថ្នាក់ដឹកនាំអឺរ៉ុបនិយាយពីសក្តានុពលអាស៊ី ដោយមិនភ្លេចបញ្ជាក់ថា ទីផ្សារអឺរ៉ុបពេលនេះជិតរួចផុតពីវិបត្តិប្រាក់បំណុលហើយ និងកំពុងរង់ចាំការវិនិយោគពីបណ្តាប្រទេសអាស៊ី។
ក្នុងចំណោមថ្នាក់ដឹកនាំអឺរ៉ុប លើកលែងតែអវត្តមានរបស់នាយករដ្ឋមន្រ្តីអាល្លឺម៉ង់ និងអង់គ្លេស លោក ហ្រ្វង់ស័រ ហូឡង់ ប្រធានាធិបតីបារាំងបានអះអាងថា វត្តមានរបស់លោក នៅក្នុងកិច្ចប្រជុំកំពូលលើកនេះ គឺដើម្បីនិយាយធានាប្រទេសអាស៊ីឲ្យមានទំនុកចិត្តលើអឺរ៉ុបវិញ។ បើតាមលោកប្រធានាធិបតីបារាំង វិបត្តិប្រាក់បំណុលអឺរ៉ុប ជិតដោះស្រាយរួចហើយ បន្ទាប់ពីថ្នាក់ដឹកនាំអឺរ៉ុបដើរនយោបាយដើម្បីរក្សាស្ថិរភាពកំណើនសេដ្ឋកិច្ច។ បញ្ហាចំពោះមុខ បច្ចុប្បន្ន គឺ ពិភពលោកទាំងមូល រួមទាំងអាស៊ីផង នឹងអាចត្រូវរងគ្រោះ វិបត្តិសេដ្ឋកិច្ចសកល ប្រសិនបើអាស៊ីមិនចូលរួមជួយធ្វើឲ្យមានកំណើនសេដ្ឋកិច្ចអឺរ៉ុប។
ក្នុងន័យនេះ លោក ហ្រ្វង់ស័រ ហូឡង់ ចង់បញ្ជាក់ថា ទ្វីបអាស៊ីធ្លាប់បានទទួលប្រយោជន៍ច្រើនណាស់មកហើយពីអឺរ៉ុប។ ដូច្នេះ ក្នុងកាលៈទេសៈ នេះ អាស៊ីត្រូវជួយអឺរ៉ុបវិញម្តង។ អាស៊ីត្រូវចូលរួមជួយលើកទឹកចិត្តផែនការសេដ្ឋកិច្ចអឺរ៉ុប តាមរយៈ ការបោះទុនវិនិយោគ និងទិញផលិតផលអឺរ៉ុប។
បើតាមអ្នកជំនាញសេដ្ឋកិច្ច អឺរ៉ុបកំពុងបែររកអាស៊ីដើម្បីស្រូបយកកំណើនសេដ្ឋកិច្ចនៅទ្វីបនេះទៅជួយស្រោចស្រង់សេដ្ឋកិច្ចនៅអឺរ៉ុប។ បើទោះជាទុនអាស៊ីមិនអាចជួយអឺរ៉ុបឲ្យចេញពីវិបត្តិប្រាក់បំណុលបាន ប៉ុន្តែ ការវិនិយោគយូរអង្វែង គឺជាប្រភពហិរញ្ញវត្ថុមួយដ៏សំខាន់ និងថេរនឹងន។
សម្រាប់អាស៊ីវិញ អឺរ៉ុបត្រូវទទួលស្គាល់ថា អាស៊ីកំពុងមានសក្តានុពល និងសកម្មភាពសេដ្ឋកិច្ចរីកចម្រើនល្អ។ ក្នុងលក្ខខណ្ឌបែបនេះ គឺភាគីទាំងពីរ អឺរ៉ុប និងអាស៊ីអាចទទួលប្រយោជន៍ពីគ្នាទៅវិញ ទៅមក។ នេះបើតាមការពន្យល់របស់រដ្ឋមន្រ្តីការបរទេសហ្វីលីពីន។
រហូតមកដល់ពេលនេះ បើទោះជាការនាំចេញផលិតអាស៊ីទៅអឺរ៉ុប និងអាមេរិក ធ្លាក់ចុះ ដោយសារតែវិបត្តិប្រាក់បំណុលអឺរ៉ុប និងការធ្លាក់ចុះយឺតនៃសេដ្ឋកិច្ចអាមេរិក អាស៊ីនៅតែមានសន្ទុះកំណើនសេដ្ឋកិច្ច។ បើតាមការព្យាករណ៍របស់មូលនិធិរូបិយវត្ថុអន្តរជាតិFMI អាស៊ីនឹងជួបកំណើនសេដ្ឋកិច្ច៦,៧ ភាគរយ នៅឆ្នាំនេះ និងកើនដល់៧,២ភាគរយ សម្រាប់ឆ្នាំ ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ