សមាជិកសភាអាមេរិកផ្ញើលិខិតទៅកាន់លោក ហ៊ុន សែន ទំលាក់ចោលការចោទប្រកាន់លើលោក សម រង្ស៊ី
សមាជិកសភាអាមេរិកចំនួន១៦នាក់ កាលពីថ្ងៃព្រហស្បតិ៍ បានសរសេរលិខិតមួយ ផ្ញើទៅកាន់លោកនាយករដ្ឋមន្រ្តី ហ៊ុន សែន ដើម្បីទទូចឲ្យទំលាក់ចោលការចោទប្រកាន់មកលើលោកសមរង្ស៊ី និងបញ្ឈប់ការធ្វើទុក្ខបុកម្នេញមកលើគណបក្សប្រឆាំង។ លិខិតរបស់សមាជិកសភាអាមេរិកបានចាត់ទុកការធ្វើទុក្ខបុកម្នេញលើមេដឹកនាំគណបក្សប្រឆាំងថា ធ្វើឲ្យដំណើរការលទ្ធិប្រជាធិបតេយ្យនៅកម្ពុជាដើរថយក្រោយ។ ប៉ុន្តែមន្រ្តីរដ្ឋាភិបាលកម្ពុជាបានប្រតិកម្មថា ៥អាណត្តិមកហើយ អាមេរិកមិនដែលមើលឃើញលទ្ធិប្រជាធិបតេយ្យកម្ពុជាដើរទៅមុខនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
នៅក្នុងលិខិតរបស់សមាជិកសភាអាមេរិកទាំង១៦រូប ដែលបានផ្ញើទៅកាន់លោកនាយករដ្ឋមន្រ្តី ហ៊ុន សែន កាលពីថ្ងៃទី៣ធ្នូ បានអំពាវនាវដល់លោកនាយករដ្ឋមន្ត្រី ឲ្យ បញ្ឈប់ នូវ ការ យាយី ការរំខាន និងការធ្វើទុក្ខបុក្ខម្នេញមកលើគណបក្សប្រឆាំង ដោយលុបចោលនូវដីកាចាប់ខ្លួនលោកសម រង្ស៊ី និងប្រគល់តំណែងជាអ្នកតំណាងរាស្រ្តឱ្យលោកវិញ។ លិខិត ក៏បានអំពាវនាវឲ្យបោះបង់ចោលរាល់ទម្រង់នៃអំពើហិង្សានយោបាយ និងលើកកម្ពស់បរិយាកាសលទ្ធិប្រជាធិបតេយ្យនៅក្នុងប្រទេសកម្ពុជាឲ្យរីកចំរើនឡើងវិញ។
ប៉ុន្តែយ៉ាងណាក៏ដោយ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានចាត់ទុកលិខិតរបស់សមាជិកសភាអាមេរិកនេះថា គ្រាន់តែជាការបញ្ចេញមតិមួយដែលមិនមានអំណាចផ្លូវច្បាប់នោះទេ ហើយថា ករណីរបស់លោក សម រង្ស៊ី មិនទាក់ទងជាមួយរដ្ឋាភិបាលកម្ពុជានោះទេ។ លោក ផៃ ស៊ីផាន បានកត់សំគាល់ថា ៥អាណត្តិមកហើយ អាមេរិកមិនដែលមើលឃើញដំណើរលទ្ធិប្រជាធិបតេយ្យកម្ពុជាឆ្ពោះទៅមុខនោះទេ។
លោក សម រង្ស៊ី ប្រធានគណបក្សប្រឆាំង កំពុងរងបណ្តឹងធំៗចំនួនបីនៅតុលាការទី១.គឺដីកាចាប់ខ្លួននៅក្នុងបណ្តឹងបរិហាកេរ្តិ៍របស់លោក ហោ ណាំហុង, ទី២.បណ្តឹង សមគំនិតនៅក្នុងសំណុំរឿងបង្ហោះសន្ធិសញ្ញាព្រំដែនក្លែងក្លាយ ជាមួយលោក ហុង សុខហួរ សមាជិកព្រឹទ្ធសភាគណបក្សសម រង្ស៊ី និងចុងក្រោយនេះ គឺបណ្តឹងបរិហាកេរ្តិ៍ដែលប្តឹងដោយលោក ហេង សំរិន ប្រធានរដ្ឋសភាកម្ពុជា។ កាលពីយប់ថ្ងៃទី១៦វិច្ឆិកា លោក សម រង្ស៊ី ប្រធានគណបក្សសង្រ្គោះជាតិ បានសម្រេចលុបចោលគំរោងវិលមកកាន់ប្រទេសកម្ពុជា ដោយបារម្ភពីការកើតមាននូវអំពើហិង្សារវាងក្រុមអ្នកគាំទ្រ និងសមត្ថកិច្ចប៉ូលីសដែលត្រៀមចាប់ខ្លួនលោក។
នៅក្នុងលិខិតរបស់សមាជិកសភាអាមេរិកទាំង១៦រូប ក៏បានសំដែងការព្រួយបារម្ភផងដែរ ចំពោះកម្ពុជា ដែលបានអនុម័តច្បាប់ ស្តីពី អង្គការសង្គមស៊ីវិលកាលពីដើមឆ្នាំនេះ និងករណីវាយដុំអ្នកតំណាងរាស្រ្តគណបក្សប្រឆាំង២រូបកាលពីខែតុលា ដែលក្នុងនោះ ក៏មានតំណាងរាស្រ្តម្នាក់ គឺលោក ញ៉យ ចំរើន ដែលមានសញ្ជាតិអាមេរិកាំងផង។
គួរបញ្ជាក់ថា ប្រតិកម្មរបស់សមាជិកសភាអាមេរិកទាំង១៦រូបនៅពេលនេះ បានធ្វើឡើងបន្ទាប់ពីសភាសហភាពអឺរ៉ុប ក៏ទើបតែបានអនុម័តលើញត្តិដំណោះស្រាយមួយស្តីពីកម្ពុជា ដោយបានព្រមានកាត់ជំនួយជាង៤៥០លានដុល្លាពីកម្ពុជា ប្រសិនបើប្រធានគណបក្សប្រឆាំងមិនអាចចូលស្រុកបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ