លោកស្រីអគ្គនាយិកានៃមូលនិធិរូបិយវត្ថុអន្តរជាតិ FMI មើលឃើញ “សញ្ញានៃស្ថិរភាព”សេដ្ឋកិច្ចពិភពលោក
នៅថ្ងៃអាទិត្យនេះនៅទីក្រុងប៉េកាំង លោកស្រី Christine Lagarde អគ្គនាយិកានៃមូលនិធិរូបិយវត្ថុអន្តរជាតិ FMI បានប្រមាណថា សេដ្ឋកិច្ចពិភពលោកបានបង្ហាញឲ្យឃើញនូវ “សញ្ញានៃស្ថិរភាព”របស់ខ្លួនទោះបីជាគេកត់សម្គាល់ឃើញការលំបាកខ្លះកើតមាននៅទីកន្លែងមួយចំនួនក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:២៧
មូលហេតុដែលនាំឲ្យលោកស្រី Christine Lagarde អគ្គនាយិកានៃមូលនិធិរូបិយវត្ថុអន្តរជាតិ FMI មើលឃើញថា សេដ្ឋកិច្ចពិភពលោកបានបង្ហាញឲ្យឃើញនូវ “សញ្ញានៃស្ថិរភាព” គឺ៖
-ទី១ លក្ខខណ្ឌទីផ្សារបានស្គាល់ភាពធូរស្បើយ លែងមានភាពតានតឹងដូចពេលមុន។
-ទី២ តួលេខសេដ្ឋកិច្ចនៅពេលថ្មីៗនេះទៀតសោតក៏បានចង្អុលបង្ហាញឲ្យឃើញពីការចាប់មានវិវឌ្ឍទៅរកភាពល្អប្រសើរជាងមុន នៅតាមប្រទេសសំខាន់ៗមួយចំនួន ដែលក្នុងនោះក៏មានសហរដ្ឋអាមេរិកផងដែរ។
គួរបញ្ជាក់ថា “ស្ថិរភាព”សេដ្ឋកិច្ចពិភពលោកកើតមានក៏ដោយសារតែអ្នកដឹកនាំបានអនុវត្ត “នយោបាយសេដ្ឋកិច្ច”ត្រឹមត្រូវ ដែលបានហុចចេញជាផ្លែផ្កាវិជ្ជមាន។ នៅក្នុងក្របខណ្ឌនៃជំនួបហ្វ័ររូមអភិវឌ្ឍន៍សេដ្ឋកិច្ចចិន លោកស្រី Christine Lagarde បានថ្លែងប្រាប់ទៀតថា “នារយៈពេលប៉ុន្មានឆ្នាំចុងក្រោយនេះ សេដ្ឋកិច្ចនៃប្រទេសមួយចំនួនពិតជាឋិតនៅក្នុងស្ថានភាពមួយដ៏សែនលំបាក”។
សម្រាប់ប្រទេសក្រិក លោកស្រី Christine Lagarde បានថ្លែងសរសើរដល់ការចម្រើនជឿនលឿនទៅមុខ ហើយបានទាំងបញ្ជាក់ឲ្យដឹងពី ការគាំទ្រជាថ្មីទៀតពីសំណាក់ មូលនិធិរូបិយវត្ថុអន្តរជាតិ FMI និងពីសំណាក់ប្រទេសអឺរ៉ុបសំខាន់ៗជាដៃគូ។ “ដូច្នេះបន្ទាប់ពីមានការខិតខំប្រឹងប្រែងរួបរួមកម្លាំងទាំងអស់គ្នា សេដ្ឋកិច្ចពិភពលោកក៏បានគេចចៀសផុតពីជ្រោះមរណៈ”។ នេះជាការគូសបញ្ជាក់របស់ លោកស្រី Christine Lagarde អគ្គនាយិកានៃមូលនិធិរូបិយវត្ថុអន្តរជាតិ FMI ។
ទោះជាយ៉ាងណាក៏ដោយ ក៏លោកស្រី Christine Lagarde បានគូសបញ្ជាក់ប្រាប់ថា នៅមាន “ភាពទន់ខ្សោយសេដ្ឋកិច្ចនិងហិរញ្ញវត្ថុជាច្រើនអន្លើ”ដែលត្រូវប្រយុទ្ធប្រឆាំង ដែលក្នុងនោះមានដូចជា៖
-ទី១ ភាពទន់ខ្សោយផុយស្រួយដែលនៅតែមាន នៅក្នុងប្រព័ន្ធហិរញ្ញវត្ថុ។
-ទី២ បរិមាណនៃប្រាក់បំណុលសាធារណៈនិងឯកជនដែលនៅតែមានកម្រិតខ្ពស់។
-ទី៣ តម្លៃប្រេងឥន្ធនៈមានតម្លៃថ្លៃហួសហេតុពេក។
ពាក់ព័ន្ធនឹងប្រទេសចិនវិញ លោកស្រីអគ្គនាយិកានៃមូលនិធិរូបិយវត្ថុអន្តរជាតិ FMI យល់ថា ប្រទេសចិនគួរតែ “បន្តតម្រង់ទិសដៅម៉ាស៊ីនសេដ្ឋកិច្ចរបស់ខ្លួនទៅរកការធ្វើវិនិយោគនិងការទិញដូរហូបចុកផ្ទៃក្នុង”។ ទាំងនេះក៏ជាមធ្យោបាយដ៏ប្រពៃ សម្រាប់ធ្វើការចែកចាយ “ផ្លែផ្កានៃកំណើនសេដ្ឋកិច្ច”របស់ខ្លួន។
រីឯប្រាក់យ័នចិនដែលប្រទេសលោកខាងលិចបានចោទថា មានតម្លៃទាបជ្រុលពេក លោកស្រី Christine Lagarde បានថ្លែងប្រកាសថា “មូលនិធិរូបិយវត្ថុអន្តរជាតិ FMI នឹងបន្តតាមឃ្លាំមើលការវិវឌ្ឍន៍នៃតម្លៃរូបិយបណ្ណចិន”។
គួរកត់សម្គាល់ថា ប្រាក់យ័នចិនដែលដៃគូពាណិជ្ជកម្មសំខាន់ៗរបស់ទីក្រុងប៉េកាំងបានចោទថា មានតម្លៃទាបពេកនោះ បើគិតតាំងពីឆ្នាំ២០០៥មក បានកើនឡើងប្រមាណ៣០%នៅចំពោះមុខប្រាក់ដុល្លារអាមេរិក។ ក៏ប៉ុន្តែ អត្រានៃការប្តូរប្រាក់នៅតែឋិតនៅក្រោមការត្រួតពិនិត្យរបស់ធនាគារកណ្តាលចិន។
សូមបញ្ជាក់ថា ឧបនាយករដ្ឋមន្ត្រីចិនលោក Li Keqiang ដែលគេដឹងថានឹងត្រូវឡើងមកកាន់តំណែងជានាយករដ្ឋមន្ត្រីចិនជំនួសលោក វិន ជាប៉ាវ នៅឆ្នាំក្រោយ បានថ្លែងបញ្ជាក់ប្រាប់ “ពីការចាំបាច់ដែលសន្ទុះកំណើនសេដ្ឋកិច្ចចិនត្រូវងាកទៅរកតុល្យភាព ដោយត្រូវរំពឹងទៅលើការទិញដូរហូបចុកផ្ទៃក្នុង”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ