ក្រុមហ៊ុន Facebook បកស្រាយការចោទប្រកាន់ជុំវិញការរើសអើងចំពោះក្រុមស្តាំនិយមអាមេរិក
ចុះផ្សាយនៅថ្ងៃ៖
ស្តាប់ - ០៤:២៣
អស់រយៈពេលជាងពីរសប្តាហ៍មកហើយ ដែលក្រុមហ៊ុន Facebook ទទួលរងការរិះគន់ជុំវិញការរើសអើងផ្នែកនយោបាយចំពោះក្រុមនិន្នាការស្តាំនិយម ពោលគឺចំពោះគណបក្សសាធារណរដ្ឋ។ ការចោទប្រកាន់នេះ គឺពាក់ព័ន្ធនឹងកម្មវិធីព្រឹត្តិការណ៍ព័ត៌មានប្រចាំថ្ងៃរបស់ហ្វេសប៊ុកសំរាប់អ្នកប្រើប្រាស់នៅសហរដ្ឋអាមេរិក។ ដើម្បីរក្សាតម្លាភាព កាលពីសប្តាហ៍មុននេះ ស្ថាបនិកក្រុមហ៊ុន គឺលោក Mark Zuckerberg បានជួបជាមួយថ្នាក់ដឹកនាំមួយចំនួននៃក្រុមអភិរក្សនិយម ដែលមាននិន្នាការងាកទៅរកគណបក្សសាធារណរដ្ឋ។ ហើយក្រុមហ៊ុនក៏បានទម្លាយឯកសារបច្ចេកទេស ដែលជាវិធានច្បាប់ផ្ទៃក្នុងរបស់ខ្លួនក្នុងសំរាំងប្រធានបទព័ត៌មានប្រចាំថ្ងៃជូនអ្នកប្រើប្រាស់។
ដើម្បីរំងាប់អារម្មណ៍មតិសាធារណៈជនទូទៅ ជាពិសេស គឺឆ្លើយតបនឹងសំណួរមួយចំនួនពីសំណាក់គណៈកម្មការពាណិជ្ជកម្មរបស់ព្រឹទ្ធសភាអាមេរិក ស្ថានិបហ្វេសប៊ុក គឺលោក Mark Zuckerberg បានជួបជាមួយឥស្សរជនជាន់ខ្ពស់ និងជនមានឥទ្ធិពលចំនួនជាង ១០ នាក់ ដែលគាំទ្រគណបក្សសាធារណរដ្ឋ។ ជំនួបនេះបានប្រព្រឹត្តទៅកាលពីថ្ងៃពុធ ទី១៨ ឧសភាកន្លងទៅនេះ នាឯទីស្នាក់ការមួយរបស់ហ្វេសប៊ុកក្នុងទីក្រុង Menlo Park រដ្ឋកាលីហ្វ័រនីញ៉ា ។ ក្នុងចំណោមភ្ញៀវដែលត្រូវបានអញ្ជើញ ក្នុងនោះមានលោក Barry Bennet ទីប្រឹក្សារបស់លោក Donald Trump, លោកស្រី Jenny Beth Martin សហស្ថាបនិកចលនាអភិរក្សនិយម Tea Party និងនិពន្ធនាយកព័ត៌មាន ក៏ដូចជាទីប្រឹក្សាព័ត៌មានមួយចំនួនទៀតផងដែរ ដែលមាននិន្នាការងាកទៅរកគណបក្សសាធារណរដ្ឋ។ ខ្លឹមសារនៃជំនួបនេះពុំត្រូវបានផ្សព្វផ្សាយលំអិតឡើយ។
ដើមទងនៃការចោទប្រកាន់មកលើបណ្តាញសង្គមហ្វេសប៊ុកនេះ គឺក្រោយពីវេបសាយ៍ Gizmodo បានចុះផ្សាយអត្ថបទមួយ ដែលបានដកស្រង់សំដីអនាមិករបស់អតីតបុគ្គលិកក្រុមហ៊ុនហ្វេសប៊ុក។ អត្ថបទនេះបានរាយការណ៍ថា ក្រុមការីនិពន្ធប្រធានបទព័ត៌មានរបស់ក្រុមហ៊ុនហ្វេសប៊ុកបានអនុវត្តការរើសអើង ចំពោះបណ្តាវេបសាយ៍មួយចំនួន ដែលមាននិន្នាការងាកទៅរកក្រុមអភិរក្សនិយម ឬនិយាយជាសាមញ្ញ គឺក្រុមអ្នកគាំទ្រគណបក្សសាធារណរដ្ឋ។ ព័ត៌មាន និងវេបសាយ៍ទាំងនោះមិនត្រូវបានដាក់បញ្ជូលទៅក្នុងព្រឹត្តិការណ៍ព័ត៌មានរបស់ហ្វេសប៊ុកឡើយ។
ជាទូទៅ ព្រឹត្តិការណ៍ព័ត៌មាននេះមាននៅក្នុង «បញ្ជីប្រធានបទព័ត៌មានពេញនិយម» (Trending Topics)។ នាពេលបច្ចុប្បន្ននេះ បញ្ជីបច្ចុប្បន្នភាពព័ត៌មាននេះដំណើរការតែសំរាប់អ្នកប្រើប្រាស់ហ្វេសប៊ុកនៅក្នុងសហរដ្ឋអាមេរិកតែប៉ុណ្ណោះ។ កម្មវិធីនេះត្រូវបានដាក់បញ្ជូលចាប់តាំងពីឆ្នាំ២០១៤ មកម្ល៉េះ។ នៅភាគខាងឆ្វេងផ្នែកខាងលើនៃទំព័រហ្វេសប៊ុករបស់ខ្លួន អ្នកប្រើប្រាស់នៅសហរដ្ឋអាមេរិកអាចឃើញបញ្ជីព័ត៌មានសំខាន់ពីរ ដែលកំពុងតែមានប្រជាប្រិយភាពលើបណ្តាញសង្គម។ បញ្ជីទីមួយ គឺព័ត៌មានពាក់ព័ន្ធនឹងចំណូលចិត្តផ្ទាល់ខ្លួនរបស់ម្ចាស់គណនីយហ្វេសប៊ុក។ ហើយបញ្ជីទីពីរ គឺប្រធានបទព្រឹត្តិការណ៍ធំៗនៃបច្ចុប្បន្នភាពនៅសហរដ្ឋអាមេរិក។
គឺបញ្ជីទីពីរនេះហើយ ដែលរងការចោទប្រកាន់មកលើហ្វេសប៊ុក។ ក្រោយពីការផ្សព្វផ្សាយព័ត៌មានរបស់វេបសាយ៍ Gizmodo ក្រុមអ្នកតំណាងរាស្រ្ត ក្រុមសារព័ត៌មាន និងក្រុមអ្នកគាំទ្រស្តាំនិយមរបស់គណបក្សសាធារណរដ្ឋបានរិះគន់ និងមានមន្ទិលសង្ស័យចំពោះការរើសអើងរបស់ហ្វេសប៊ុក។ សូម្បីតែព្រឹទ្ធសភាអាមេរិក តាមរយៈគណៈកម្មការពាណិជ្ជកម្មក៏បានប្រតិកម្មផងដែរ។ ព្រឹទ្ធសភាអាមេរិកដែលកំពុងតែគ្រប់គ្រងដោយគណបក្សសាធារណរដ្ឋស្រាប់ផងនោះបានផ្ញើបញ្ជីសំណួរដ៏វែងអន្លាយមួយទៅលោក Mark Zuckerberg ហើយបានទាមទារឲ្យក្រុមហ៊ុនហ្វេសប៊ុកផ្សព្វផ្សាយវិធានច្បាប់ផ្ទៃក្នុង ទាក់ទងនឹងរបៀបសំរាំងជ្រើសរើសប្រធានបទព័ត៌មានចុះផ្សាយក្នុងបណ្តាញសង្គមរបស់ខ្លួន។
ជាការឆ្លើយតប ក្រុមហ្វេសប៊ុកបានទាត់ចោលការចោទប្រកាន់របស់វេបសាយ៍ Gizmodo។ ហើយក្រុមហ៊ុនបានបញ្ចេញឯកសារបច្ចេកទេសស្តីពីវិធានផ្ទៃក្នុងសំរាប់ផ្នែកការីសំរាំងព្រឹត្តិការណ៍ព័ត៌មាន។តាមពិតទៅ ឯកសារបច្ចេកទេសនេះពុំបានបញ្ជាក់អំពីលក្ខខ័ណ្ឌនយោបាយអ្វីឡើយ ដែលត្រូវហាមឃាត់មិនឲ្យដាក់បញ្ជូលទៅក្រុងកំរងព្រឹត្តិការណ៍ព័ត៌មានពេញនិយមប្រចាំថ្ងៃ។ មូលហេតុតែមួយគត់ ដែលព័ត៌មាននោះ ឬវេបសាយ៍នោះមិនត្រូវបានជ្រើសរើស គឺព័ត៌មានគ្មានប្រភពច្បាស់លាស់ ឬព័ត៌មាននោះជាន់គ្នាជាមួយព័ត៌មានមួយទៀត។ ហើយហ្វេសប៊ុកបានប្រគល់កិច្ចការសំរាំងប្រធានបទព័ត៌មាននេះទៅឲ្យក្រុមហ៊ុនមួយចំនួនផ្សេងទៀតជាអ្នកម៉ៅការបន្ត។ អត្តសញ្ញាណរបស់កូនក្រុមហ៊ុនទាំងនោះមិនត្រូវបានបញ្ចេញឲ្យដឹងឡើយ។
តាមការពន្យល់របស់ហ្វេសប៊ុក ក្រុមការីនិពន្ធព័ត៌មានបានធ្វើកំរងបញ្ជីវេបសាយ៍ចំនួនរាប់ពាន់ ដែលអាចចាត់ទុកថាជាប្រភពព័ត៌មានអាចទុកចិត្តបាន។ នៅក្នុងនោះក៏មានវេបសាយ៍មួយចំនួនស្និទិនឹងគណបក្សសាធារណរដ្ឋផងដែរ តួយ៉ាងដូចជាវេបសាយ៍ក្រុមស្តាំនិយម Drudge Report និងវេបសាយ៍ក្រុមមហាអភិរក្សនិយម Breitbart ជាដើម។ ហេ្វសប៊ុកក៏បានធ្វើកំរងបញ្ជីវេបសាយ៍នៃបណ្តាញសារព័ត៌មានធំៗសំរាប់យោងខ្លឹមសារព័ត៌មានផងដែរ។ ក្នុងចំណោមវេបសាយ៍សំខាន់ៗចំនួនដប់ មានតែវេបសាយ៍ពីរប៉ុណ្ណោះ ដែលស្និទិជាមួយក្រុមអភិរក្សនិយម។ ក្នុងនោះមានស្ថានីយ៍ទូរទស្សន៍ Fox News និងកាសែត Wall Street Journal។ ចំណែកវេបសាយ៍ដ៏ទៃទៀតសុទ្ធសឹងតែមាននិន្នាការកណ្តាលនិយម ឬឆ្វេងនិយមងាកទៅរកគណបក្សប្រជាធិបតេយ្យ។
មហាសេដ្ឋីវ័យក្មេង Mark Zuckerberg ក៏បានប្រកាសជាសាធារណៈផងដែរថា បណ្តាញសង្គមហ្វេសប៊ុករបស់ខ្លួនមានអ្នកប្រើប្រាស់ចំនួន ១,៦ កោដិនាក់។ ហើយអ្នកប្រើប្រាស់មាននិន្នាការនយោបាយខុសៗគ្នា ពោលគឺ ទាំងអ្នកអភិរក្សនិយម (ស្តាំនិយម) ទាំងអ្នកសេរីនិយម (ឆ្វេងនិយម) និងអ្នកកណ្តាលនិយម។ កន្លងមក ស្ថានិបហ្វេសប៊ុកតែងរិះគន់ជាចំហមិនពេញចិត្តបេក្ខជនសាធារណរដ្ឋ គឺលោក Donald Trump ទាក់ទងនឹងទស្សនៈជុំវិញជនអន្តោរប្រវេសន៍ និងសាសនាអ៊ីស្លាម។
ជាទូទៅ អ្នកធ្វើការផែ្នកព័ត៌មានវិទ្យានៅក្នុងសង្កាត់ Silicon Valley សហរដ្ឋអាមេរិកតែងមាននិន្នាការឆ្វេងនិយម ហើយបោះឆ្នោតគាំទ្រគណបក្សប្រជាធិបតេយ្យ។ ហេតុដូចនេះហើយបានជាក្រុមអ្នកស្តាំនិយមស្និទិគណបក្សសាធារណរដ្ឋតែងមានមន្ទិលសង្ស័យ ចំពោះភាពលំអៀងនយោបាយពីសំណាក់ក្រុមហ៊ុនព័ត៌មានវិទ្យា។ ប៉ុន្តែ ទោះបីជាយ៉ាងណា ក្រុមហ៊ុនធំៗដូចជា Facebook និងGoogle បានប្រកាសអំពីភាពអព្យាក្រិត្យរបស់ពួកគេ ហើយពួកគេនឹងធ្វើជាអ្នកឧបត្ថម្ភកម្មវិធី សំរាប់សមាជតែងតាំងបេក្ខជនប្រធានាធិបតីប្រចាំបក្សនីមួយៗនាខែកក្កដាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ