រដ្ឋប្រហារបរាជ័យនៅហ្គំប៊ី៖ ប្រធានាធីបតីចោទ«មហាអំណាច»បរទេស
ពីរថ្ងៃបន្ទាប់ពីការប៉ុនប៉ងធ្វើរដ្ឋប្រហារមិនបានសម្រេច ដែលប្រព្រឹត្តទៅពេលអវត្តមានប្រមុខរដ្ឋ ប្រធានាធិបតីហ្គំប៊ីឈ្មោះ យ៉ាយ៉ា ហ្សាម៉េ (Yahya Jammeh) ពេលថ្លែងសុន្ទរកថាលើកទី២ទៅកាន់ប្រជាជាតិបានបដិសេធការចូលរួមរបស់កងទ័ពក្នុងរដ្ឋប្រហារនោះ ហើយចោទ«មហាអំណាច»បរទេស ថាជាអ្នកទទួលខុសត្រូវនៃការវាយប្រហារ។ ប្រជាជន និងទាហានរាប់សិបនាក់ ត្រូវបានចាប់ខ្លួន។
ចុះផ្សាយនៅថ្ងៃ៖
ស្តាប់ - ០១:២៩
វាគឺជាការថ្លែងទៅកាន់ជនរួមជាតិជាលើកទី២របស់ប្រធាធិបតី យ៉ាយ៉ា ហ្សាម៉េ (Yahya Jammeh) បន្ទាប់ពីការប៉ុនប៉ងធ្វើរដ្ឋប្រហារមិនបានសម្រេចមួយ។
លោកប្រធានាធិបតីបាននិយាយថា រដ្ឋប្រហារបរាជ័យកាលពីថ្ងៃអង្គារ គឺជាអំពើរបស់«ក្រុមភេរវជនដែលមានការគាំទ្រពីមហាអំណាច»បរទេស ជាអំពើរបស់ជនផ្តាច់ខ្លួនដែលមានមូលដ្ឋាននៅសហរដ្ឋអាមេរិក នៅអាល្លឺម៉ង់ និងនៅអង់គ្លេស»។ លោក យ៉ាយ៉ា ហ្សាម៉េ ប្រកាសថា៖ «អាវុធមួយចំនួនដែលពួកគេប្រើ ផលិតនៅសហរដ្ឋអាមេរិក»។
ថ្វីបើជាវោហារតាមទម្លាប់របស់លោកប្រធានាធិបតីហ្គំប៊ីក្តី ក៏នៅក្នុងនោះ វាគូសបញ្ជាក់ថា គាត់បដិសេធការពាក់ព័ន្ធរបស់កងទ័ពហ្គំប៊ីក្នុងការប៉ុនប៉ងដណ្តើមអំណាចនោះ។ លោក យ៉ាយ៉ា ហ្សាម៉េស បានសង្កត់ធ្ងន់ៗថា៖ «គ្មានការចូលរួមពីកម្លាំងទ័ពហ្គំប៊ីទាល់តែសោះ»។
ពេលថ្លែងជាសាធារណៈលើកដំបូងកាលពីថ្ងៃពុធ លោក យ៉ាយ៉ា ហ្សាម៉េ បានបង្ហាញការគំរាម។ ដោយមិនបញ្ចេញឈ្មោះ ឬអត្ថាធិប្បាយព្រឹត្តិការណ៍ថ្ងៃអង្គារ លោកប្រធានាធិបតីបានព្រមាន«អ្នកដែលសរសើរ និងគាំទ្រការផ្លាស់ប្តូររបបដោយហិង្សា»ថា«នឹងខាតបង់ធ្ងន់»។
ដូច្នេះ អត្ថសញ្ញាណ និងគោលបំណងនៃអ្នកធ្វើរដ្ឋប្រហារមួយផ្នែក ស្ថិតនៅជាអាថ៌កំបាំងនៅឡើយ។ បើយោងតាមនាយទាហានម្នាក់ អ្នកវាយប្រហារនានាត្រូវបានបញ្ជាដោយអតីតមេបញ្ជាការរត់ចោលជួរម្នាក់ឈ្មោះ ឡាមីន សាន់ណេ (Lamin Sanneh) ដែលបានស្លាប់ក្នុងការប្រយុទ្ធគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ