រដ្ឋាភិបាលកម្ពុជានិងសហភាពអឺរ៉ុបពិនិត្យឡើងវិញនូវគម្រោងអភិវឌ្ឍន៍
គណៈកម្មាធិការចម្រុះកម្ពុជា-សហភាពអឺរ៉ុប ( EU ) បានជួបប្រជុំគ្នារយៈពេល៣ថ្ងៃ ចាប់ពីព្រឹកថ្ងៃទី១៩មិថុនានេះ នៅក្រសួងការបរទេសក្នុងទីក្រុងភ្នំពេញ។ កិច្ចប្រជុំដែលមានការចូលរួមពីមន្ត្រីជាន់ខ្ពស់របស់សហភាពអឺរ៉ុប និងមន្ត្រីជាន់ខ្ពស់ មកពីក្រសួងស្ថាប័នរបស់រដ្ឋាភិបាលកម្ពុជា ដើម្បីពិនិត្យឡើងវិញលើជំនួយរបស់សហភាពអឺរ៉ុប ដែលបានជួយដល់គម្រោងអភិវឌ្ឍន៍មួយចំនួននៅកម្ពុជា មានដូចជា កំណែទម្រង់ច្បាប់ និងប្រព័ន្ធយុត្តិធម៌ បញ្ហាសិទ្ធិមនុស្ស និងកំណែទម្រង់ដីធ្លីជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ក្នុងពេលបើកកិច្ចប្រជុំគណៈកម្មាធិការចម្រុះកម្ពុជា-សហភាពអឺរ៉ុប លើកទី៧នៅព្រឹកថ្ងៃអង្គារ ទី១៩មិថុនានេះ លោក សៀង ឡប្រេស្ស សហប្រធាននៃកិច្ចប្រជុំ និងជាអនុរដ្ឋលេខាធិការក្រសួងមហាផ្ទៃ បានលើកឡើងថា កិច្ចប្រជុំចម្រុះនេះ នឹងអាចសម្រេចបានភាពប្រសើរឡើង នូវការកាត់បន្ថយការលំបាកនៅកម្ពុជា។ លោកសង្ឃឹមថា កិច្ចប្រជុំរវាងតំណាងរដ្ឋាភិបាលកម្ពុជា និងសហភាពអឺរ៉ុប ពេលនេះ ជាផែនទីបំភ្លឺផ្លូវមួយ ដែលអាចធ្វើអោយប្រសើរឡើងនូវគោលដៅទៅអនាគត ររវាងភាគីទាំងពីរ ផ្នែកនយោបាយ និងសេដ្ឋកិច្ច ដែលកម្ពុជា ជាប្រទេសកំពុងតែអភិវឌ្ឍន៍។
ចំណែកលោក Rolf Timans សហប្រធានកិច្ចប្រជុំ ដែលតំណាងសហភាពអឺរ៉ុបបានលើកឡើងថា របៀបវារៈ ដែលត្រូវលើកឡើងក្នុងកិច្ចប្រជុំពេលនេះ មានសារៈសំខាន់ ដូចជាការលើកឡើងពីការគោរពសិទ្ធិមនុស្ស និងនីតិរដ្ឋនៅកម្ពុជា ជាដើម។ ដូច្នេះសហភាពអឺរ៉ុប ចង់ស្តាប់ពីវឌ្ឍនភាពរបស់ប្រទេសកម្ពុជា។
របៀបវារៈនៃកិច្ចប្រជុំរយៈពេល ៣ ថ្ងៃ រវាងគណៈកម្មាធិការចម្រុះកម្ពុជា និងសហភាពអឺរ៉ុប លើកទី៧ បានបង្ហាញថា តំណាងរដ្ឋាភិបាលកម្ពុជា និងតំណាងសហភាពអឺរ៉ុប ដែលមាន ២៧ ប្រទេស នឹងលើកឡើងពីប្រធានបទសំខាន់ៗ ដូចជា កំណែទម្រង់ច្បាប់ និងប្រព័ន្ធយុត្តិធម៌ បញ្ហាតុលាការកាត់ទោសមេខ្មែរក្រហម សេរីភាពបញ្ចេញមតិ កំណែទម្រង់ដីធ្លី យន្តការដោះស្រាយជម្លោះដីធ្លី សម្បទានដីសេដ្ឋកិច្ច កំណែទម្រង់ការបោះឆ្នោត និងសេរីភាពរបស់អង្គការសមាគម បញ្ហាសិទ្ធិមនុស្ស សិទ្ធិស្ត្រី និងបញ្ហាពលករចំណាកស្រុក។
ប្រធានបទទាំងអស់នោះ ត្រូវបានអនុវត្តនៅកម្ពុជា ក្រោមជំនួយរបស់សហភាពអឺរ៉ុប។ ប៉ុន្តែមិនមានការបញ្ជាក់ពីចំនួនទឹកប្រាក់ និងរយៈពេលនៃការអនុវត្តន៍ឲ្យបានជក់ច្បាស់ឡើយ។ ប្រធានបទនីមួយៗ គឺមន្ត្រីខាងរដ្ឋាភិបាលកម្ពុជា មកពីក្រសួងស្ថាប័នពាក់ព័ន្ធ នឹងធ្វើបទអន្តរាគមន៍ លើកបង្ហាញពីការវិវឌ្ឍន៍ មុននឹងតំណាងសហភាពអឺរ៉ុប ផ្តល់នូវចំណាប់អារម្មណ៍ និងអនុសាសន៍លើប្រធានបទទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ