ព្យុះហៃយ៉ាន់បន្តដំណើរទៅវៀតណាម អាចស្លាប់ជាង១០០០នាក់ នៅហ្វីលីពីន
ព្យុះហៃយ៉ាន់ដែលបានមកដល់ហ្វីលីពីន នៅថ្ងៃសុក្រម្សិលមិញនេះ បានសម្លាប់មនុស្សយ៉ាងហោច១០០នាក់ នៅក្រុងតាក្លូបង់ ភាគកណ្តាលប្រទេស។ យោងតាមអង្គការកាកបាទក្រហម ចំនួនមនុស្សស្លាប់អាចមានដល់១២០០នាក់ឯណោះ។ ព្រឹកនេះ ទាហានហ្វីលីពីនបានបញ្ជូនយន្តហោះចុះទៅជួយក្រុងរងគ្រោះនេះ។ នៅថ្ងៃសៅរ៍នេះ ព្យុះហៃយ៉ាន់បន្តដំណើរឆ្ពោះទៅសមុទ្រចិនខាងត្បូង មុននឹងទៅដល់វៀតណាម នៅថ្ងៃអាទិត្យស្អែក។ ព្យុះនេះក៏អាចនឹងបង្កជាភ្លៀង និងខ្យល់ខ្លាំង នៅភាគឥសានកម្ពុជា ជាប់ព្រំប្រទល់ជាមួយវៀតណាមផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១១
នៅថ្ងៃសៅរ៍នេះ ព្យុះហៃយ៉ាន់ស្ថិតក្នុងចំណាត់ថ្នាក់លេខ៥ ជាចំណាត់ថ្នាក់ខ្ពស់នៃគ្រោះមហន្តរាយនោះ បានបន្ថយឥទ្ធិពលរបស់ខ្លួនមួយកម្រិត នៅហ្វីលីពីន។ អាជ្ញាធរក្រុងម៉ានីលបានព្យាយាមទាក់ទងអាជ្ញាធរក្រុងតាក្លូបង់ ភាគកណ្តាលប្រទេស ព្រោះនៅទីនោះ មានចំនួនអ្នកស្លាប់ច្រើន។ កាលពីថ្ងៃសុក្រម្សិលមិញ មុននឹងប្រព័ន្ធទំនាក់ទំនងត្រូវបានកាត់ផ្តាច់ អាជ្ញាធរក្រុងតាក្លូបង់ បានប្រាប់ថា មានទឹកជំនន់ខ្លាំងនៅក្នុងក្រុង។ នៅថ្ងៃសៅរ៍នេះ ព្យុះហៃយ៉ាន់បានបោកបក់ក្នុងក្រុងសាន់ ហូសេ ភាគខាងលិចហ្វីលីពីន ជាមួយល្បឿនប្រមាណ៤៤០គីឡូម៉ែត្រក្នុងមួយម៉ោង ។
អ្នកព្យាករណ៍ឧតុនិយមខ្លះបារម្ភខ្លាចថា ថ្ងៃសៅរ៍នេះ ព្យុះនេះអាចបង្កើនកំលាំងបោកបក់ខ្លាំង ពេលវាធ្វើដំណើរឆ្ពោះទៅសមុទ្រចិន។ ព្យុះហៃយ៉ាន់ នឹងទៅដល់វៀតណាម នៅថ្ងៃអាទិត្យស្អែកនេះ។ ព្យុះនេះក៏អាចនឹងបង្កជាភ្លៀង ខ្យល់បោកបក់ខ្លាំង នៅភាគឥសានកម្ពុជា ជាប់ព្រំប្រទល់ជាមួយវៀតណាមផងដែរ នៅថ្ងៃ១០ និង១១វិច្ឆិកានេះ។ អាជ្ញាធរវៀតណាមបានដាក់សញ្ញាប្រកាសអាសន្នក្នុងប្រទេស ហើយកំពុងតែជម្លៀសប្រជាជនខ្លួន។
រៀងរាល់ឆ្នាំ ព្យុះប្រមាណជាង២០តែងវាយប្រហារហ្វីលីពីនជានិច្ច។ កាលពីឆ្នាំ២០១១ ប្រទេសនេះបានគ្រោះដោយព្យុះ វ៉ាស្ហ៊ី ដែលកាលណោះ ព្យុះនេះបានសម្លាប់មនុស្ស១២០០នាក់ បំផ្លាញផ្ទះសម្បែងមួយម៉ឺនខ្នង និងធ្វើអោយប្រជាជន៣សែននាក់ភៀសខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ