លោកស្រីគ្លីនតុនអញ្ជើញទៅអាស៊ី-ប៉ាស៊ីហ្វិកដោយហេតុតែមានភាពតានតឹងជាមួយចិន
លោកស្រីរដ្ឋមន្ត្រីក្រសួងការបរទេសអាមេរិកហ៊ីលឡារីគ្លីនតុន នៅថ្ងៃប្រហស្បតិ៍ម្សិលមិញ បានធ្វើដំណើរទៅកាន់កោះ Cook ដែលឋិតនៅមហាសាគរប៉ាស៊ីហ្វិក។ នេះជាដំណាក់ទី១នៃដំណើរទស្សនកិច្ចចំនួន១០ថ្ងៃ ដែលបន្ទាប់មកទៀតលោកស្រីត្រូវអញ្ជើញទៅប្រទេសឥណ្ឌូនេស៊ី ចិន និង រុស្ស៊ី ដើម្បីចូលរួមជំនួបប្រជុំកំពូលអាស៊ី-ប៉ាស៊ីហ្វិក Apec ។ ទាំងនេះក្នុងស្ថានភាពដ៏តានតឹងជាមួយប្រទេសចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
បើយោងតាមអ្នកឯកទេស សហរដ្ឋអាមេរិកចង់បង្កើនសមត្ថភាពក្នុងវិស័យទូតនិងយោធានៅក្នុងតំបន់អាស៊ី-ប៉ាស៊ីហ្វិក ដែលគេចាត់ទុកថា ជាតំបន់ក្បាលម៉ាស៊ីនជួយអូសទាញឲ្យមានសន្ទុះកំណើនសេដ្ឋកិច្ចពិភពលោក។ ដំណើរទស្សនកិច្ចរបស់លោកស្រីរដ្ឋមន្ត្រីក្រសួងការបរទេសអាមេរិកហ៊ីលឡារីគ្លីនតុននេះ ក៏បានត្រូវគេចាត់ទុកថា ជាការឆ្លើយតបទៅនឹងឥទ្ធិពលរបស់ទីក្រុងប៉េកាំងដែលមានអានុភាពកាន់តែខ្លាំងឡើងៗនៅក្នុងតំបន់ ជាពិសេសពាក់ព័ន្ធនឹងជម្លោះដែនដីនៅសមុទ្រចិនខាងត្បូង។
លោកស្រីគ្លីនតុនត្រូវចូលរួមប្រជុំនៅកោះ Cook នៅថ្ងៃសុក្រនេះ ជំនួបកំពូល ហ្វ័ររូមនៃបណ្តាកោះនៅមហាសាគរប៉ាស៊ីហ្វិក Forum des îles du Pacifique ( FIP ) ដែលមានប្រទេសនិងដែនដីចំនួន១៦ចូលរួម មានជាអាទិ៍ប្រទេសអូស្ត្រាលី ប្រទេសនូវែលហ្សេឡង់ ដែលជាសម្ព័ន្ធមិត្តរបស់សហរដ្ឋអាមេរិក។
ថ្ងៃចន្ទខាងមុខនេះ លោកស្រីរដ្ឋមន្ត្រីក្រសួងការបរទេសអាមេរិកហ៊ីលឡារីគ្លីនតុននឹងអញ្ជើញទៅប្រទេសឥណ្ឌូនេស៊ី ដែលជាប្រទេសកាន់សាសនាអ៊ីស្លាមធំជាងគេក្នុងលោក បើគេគិតតាមចំនួនប្រជាជន ហើយក៏ជាប្រទេសមួយដ៏សំខាន់នៅក្នុងតំបន់អាស៊ី-អាគ្នេយ៍។
នៅថ្ងៃអង្គារនិងនៅថ្ងៃពុធ គេនឹងរង់ចាំទទួលលោកស្រីគ្លីនតុននៅទីក្រុងប៉េកាំងដើម្បីចរចាពីបញ្ហាសំខាន់ៗមួយចំនួនពាក់ព័ន្ធនឹងទំនាក់ទំនងចិន-អាមេរិក ហើយ លោកស្រីរដ្ឋមន្ត្រីក្រសួងការបរទេសអាមេរិកហ៊ីលឡារីគ្លីនតុន ក៏អាចមានជំនួបពិភាក្សាជាមួយលោកប្រធានាធិបតីចិន ហ៊ូ ជិនតាវ ផងដែរ។
គួរបញ្ជាក់ថា ទំនាក់ទំនងរវាងសហរដ្ឋអាមេរិកនិងប្រទេសចិនមានសភាពតានតឹង ដោយហេតុតែមានបញ្ហាសិទ្ធមនុស្ស បញ្ហាប្រទេសស៊ីរី ជម្លោះដែនដីនៅសមុទ្រចិនខាងត្បូង ហើយនិងការឈ្លោះដណ្តើមកោះនៅសមុទ្រចិនខាងកើតជាមួយប្រទេសជប៉ុន ដែលជាប្រទេសសម្ព័ន្ធមិត្តដ៏សំខាន់របស់សហរដ្ឋអាមេរិកក្នុងតំបន់។
នៅថ្ងៃទី៦កញ្ញា លោកស្រីគ្លីនតុនត្រូវអញ្ជើញទៅកោះទីម័រខាងកើតដែលបានទទួលឯករាជ្យ ផ្តាច់ខ្លួនចេញពីប្រទេសឥណ្ឌូនេស៊ី។ បន្ទាប់មកទៀត លោកស្រីនឹងអញ្ជើញទៅប្រទេសព្រុយណេ។
ចុងក្រោយបំផុត លោកស្រីរដ្ឋមន្ត្រីក្រសួងការបរទេសអាមេរិកហ៊ីលឡារីគ្លីនតុន នឹងត្រូវអញ្ជើញទៅទីក្រុង Vladivostok នៃប្រទេសរុស្ស៊ីនៅថ្ងៃទី៨និង៩កញ្ញា ដើម្បីចូលរួមជំនួបកំពូល Apec ហើយលោកស្រីក៏គ្រោងមានជំនួបចរចាជាមួយលោក Sergueï Lavrov រដ្ឋមន្ត្រីក្រសួងការបរទេសរុស្ស៊ី ស្ដីពីបញ្ហានៅប្រទេសស៊ីរីផងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ