នាយករដ្ឋមន្រ្តីឥណ្ឌា លោក ម៉ាន់មូហាន់ ស៊ិញ បានធ្វើដំណើរដល់ប្រទេសបង់ក្លាដែសនៅថ្ងៃអង្គារទី ៦ កញ្ញា ២០១១។ កិច្ចព្រមព្រៀងលើវិស័យសេដ្ឋកិច្ច និងការកំណត់ខ្សែព្រំដែននឹងត្រូវមេដឹកនាំរបស់ប្រទេសទាំងពីរចុះ ហត្ថលេខា ក្នុងទស្សនកិច្ចរយៈពេលពីរថ្ងៃ របស់នាយករដ្ឋមន្រ្តីឥណ្ឌា។ រដ្ឋមន្រ្តីការបរទេសបង់ក្លាដែសចាត់ទុកទស្សនកិច្ចរបស់នាយករដ្ឋមន្រ្តី ឥណ្ឌា ជាព្រឹត្តិការណ៍ប្រវត្តិសាស្រ្ត។
ចុះផ្សាយនៅថ្ងៃ៖ កែប្រែថ្ងៃទី៖
នេះជាលើកទីមួយ ចាប់តាំងពីឆ្នាំ ១៩៩៩ ដែលនាយករដ្ឋមន្រ្តីឥណ្ឌាធ្វើទស្សនកិច្ចទៅ បង់ក្លាដែស។ វាជារឿងកម្រ ដែលថ្នាក់ដឹកនាំប្រទេសជិតខាងគ្នា ឥណ្ឌា បង់ក្លាដែស កម្រនឹងធ្វើទស្សនកិច្ចគ្នាទៅវិញ ទៅមក។ បើមើលទៅលើប្រវត្តិទំនាក់ទំនងប្រទេសទាំងពីរ គឺឥណ្ឌាដែលបានអន្តរាគម ជួយពួកបំបែកខ្លួនប៉ាគីស្ថានខាងកើត ឲ្យបង្កើតប្រទេសបង់ក្លាដែសឯករាជ្យមួយ ផ្តាច់ចេញពីប៉ាគីស្ថាន ក្នុងឆ្នាំ ១៩៧១។
ក្នុងស្ថានភាពជាក់ស្តែង ប្រទេសអាស៊ីខាងត្បូង ទាំងពីរមិនសូវទុកចិត្តគ្នាទេតាំងពីដើមមក។ ទំនាក់ទំនងរវាងប្រទេសទាំងពីរតែងតែជួបការរកាំរកូសនឹងគ្នា ជាពិសេសញ្ហាដែលកើតឡើង នៅព្រំដែន។
ឥណ្ឌាតែងតែបញ្ចេញប្រតិកម្មខ្លាំងៗ ពេលខ្លះ ហិង្សា ដាក់ប្រជាជនបង់ក្លាដែស ដែលបានឆ្លងដែន ខុសច្បាប់ ចូលទៅក្នុងទឹកដីឥណ្ឌា។ ក្នុងកែវភ្នែកឥណ្ឌា ប្រជាជនបង់ក្លាដែសសុទ្ធសឹងជាពួកឈ្មួញទុច្ចរិត និងជនខិលខូចដែលបង្កបទឧក្រិដ្ឋក្នុងទឹកដីឥណ្ឌា។
ចំណែកបង់ក្លាដែសវិញតែងតែមើលទៅឥណ្ឌា ជាប្រទេសយក្សអាងអំណាច ឃើញតែប្រយោជន៍ខ្លួន។ ទីក្រុងដាកាតែងតែចោទថា ឥណ្ឌាធ្វើជំនួញតែម្នាក់ឯង ដោយបំបាក់អ្នកជំនួញរបស់ប្រទេសជិតខាង ហើយជារៀងរាល់ឆ្នាំ គឺពួកទាហានឥណ្ឌាដែលជាអ្នកបាញ់សម្លាប់ប្រជាជនស៊ីវិលបង់ក្លាដែស រាប់រយនាក់ នៅពេលមានការប្រទះអាវុធដាក់គ្នាម្តងៗ នៅតាមព្រំដែន។
បង់ក្លាដែសក៏បានរិះគន់ឥណ្ឌាដែលបានក្តោបក្តាប់ទឹកទន្លេតែម្នាក់ឯង មិនចែករំលែកជាមួយប្រជាជនបង់ក្លាដែស ដែលរស់នៅតាមព្រំដែនប្រទេសទាំងពីរ។ រាល់គម្រោងគ្រប់វិស័យដែលឥណ្ឌាបានធ្វើជាមួយបង់ក្លាដែស ជាគម្រោងដែលឥណ្ឌាតែងទទួលបានប្រយោជន៍ច្រើនជាងបង់ក្លាដែស។
នៅក្នុងពេលនាយករដ្ឋមន្រ្តីឥណ្ឌា មានវត្តមាន នៅបង់ក្លាដែស បញ្ហាព្រំដែនរវាងប្រទេសទាំងពីរ និងបញ្ហាដណ្តើមទឹកទន្លេគ្នានឹងត្រូវគេលើកយកមកនិយាយ។ គួរដឹងថា តាំងពីជួយបង់ក្លាដែសឲ្យបង្កើតជារដ្ឋឯករាជ្យ ផ្តាច់ចេញពីប៉ាគីស្ថាន ខ្សែព្រំដែនរវាងប្រទេសទាំងពីរមិនទាន់បានកំណត់ច្បាស់លាស់។ ហើយ នេះដែលជាប្រភពនៃជម្លោះ និងការប្រទូស្តរ៉ាយគ្នាជាញយដង នៅតាមបណ្តោយព្រំដែន។
ការដោះស្រាយបញ្ហាព្រំដែននឹងជួយដោះស្រាយបញ្ហាប្រជាជនចំណាកស្រុក។ ពោលគឺ ឥណ្ឌានឹងទទួលបានដីស្រែជាង ១០០ និងប្រជាជនរបស់ខ្លួន ដែលបច្ចុប្បន្ន កំពុងស្ថិតនៅក្នុងទឹកដីបង់ក្លាដែស។ ប៉ុន្តែ ឥណ្ឌាក៏ត្រូវប្រគល់ដីស្រែជាង៥០ និងប្រជាជនប៉ាគីស្ថានខាងកើត រស់នៅក្នុងទឹកដីរបស់ខ្លួន ឲ្យទៅ បង់ក្លាដែស ដែរ។
ទំនាក់ទំនងឥណ្ឌា និងបង់ក្លាដែសទើបតែប្រសើរក្នុងរយៈពេលប៉ុន្មានឆ្នាំចុងក្រោយប៉ុណ្ណោះ ពោលគឺចាប់តាំងពីលោកស្រីSheik Hasina Wajed បានចូលកាន់តំណែងជានាយករដ្ឋមន្រ្តីបង់ក្លាដែស កាលពីឆ្នាំ ២០០៨។ បង់ក្លាដែសបានព្រមប្រគល់កំពង់ផែរបស់ខ្លួនពីរ ដើម្បីឲ្យឥណ្ឌាប្រើប្រាស់សម្រាប់ការដោះដូរពាណិជ្ជកម្មក្នុងតំបន់។
កាលពីឆ្នាំមុន ឥណ្ឌា ក៏បានយល់ព្រមផ្តល់ប្រាក់កម្ចី ដល់ទៅមួយពាន់លានដុល្លារ ដើម្បីសាងសង់ផ្លូវថ្នល់បង់ក្លាដែស ជាពិសេស នៅក្នុងខេត្តដែលនៅជាប់ព្រំដែនរវាងប្រទេសទាំងពីរ។ កន្លងមក ឥណ្ឌាមិនដែលផ្តល់ទឹកប្រាក់កម្ចីដ៏ច្រើនបែបនេះ ទៅប្រទេសណាមួយទេ។
បង់ក្លាដែសស្ថិតនៅចន្លោះទឹកដីឥណ្ឌា ក្បែរទៅរកទឹកដីចិន CIA
៣ ហេតុអ្វីបានជាឥណ្ឌាជួយបង់ក្លាដែស
ឥណ្ឌាចាប់អារម្មណ៍ជួយបង់ក្លាដែស ដោយមូលហេតុពីរ។ ទីមួយគឺកត្តាប្រវត្តិសាស្រ្ត ដោយឥណ្ឌាជាអ្នកធ្លាប់ជួយបង់ក្លាដែសឲ្យកើតចេញជារូបរាង និងផ្តាច់ខ្លួនឯករាជ្យពីប៉ាគីស្ថាន។
កត្តាទីពីរគឺឥណ្ឌាមើលឃើញពីប្រយោជន៍ភូមិសាស្រ្តនយោបាយ។ បើតាមសេចក្តីថ្លែងការណ៍ផ្លូវការ របស់នាយករដ្ឋមន្រ្តីឥណ្ឌា ការរឹតចំណងមិត្តភាពជាមួយបង់ក្លាដែស គឺដើម្បីស្ថិរភាព និងការរីកចម្រើនតំបន់ឦសានឥណ្ឌា។ ឆ្លៀតក្នុងទស្សនកិច្ចលើកនេះ នាយករដ្ឋមន្រ្តីឥណ្ឌាចង់និយាយខ្ចីផ្លូវរថភ្លើងបង់ក្លាដែស ដើម្បីឆ្លងកាត់ប្រទេសនេះ ទៅកាន់តំបន់ភាគឦសានឥណ្ឌា ដែលស្ថិតនៅត្រើយ ម្ខាងទៀត របស់បង់ក្លាដែស និងស្ថិតនៅជាប់ប្រទេសចិន។
ការអភិវឌ្ឍន៍តំបន់របស់ខ្លួនជាប់ព្រំដែនចិន ជារឿងមួយ សំខាន់ដើម្បីទប់ទល់ការឈ្លានពានរបស់ចិន មកក្នុងទឹកដីរបស់ខ្លួន ប៉ុន្តែ ការពង្រឹងទំនាក់ទំនងឡើងវិញ ជាមួយបង់ក្លាដែស គឺជារឿងមួយដែលឥណ្ឌាចាំបាច់ត្រូវធ្វើ ព្រោះទីក្រុងញូវដេលី បានសំគាល់ឃើញចិន កំពុងបង្កើនឥទ្ធិពលខ្លួន នៅក្នុងប្រទេសជិតខាងឥណ្ឌា។ ដោយសារអវត្តមាន ជាង ១០ឆ្នាំ ឥណ្ឌាមើលឃើញថា ខ្លួនកំពុង ស្ថិតនៅដាច់ឆ្ងាយ ពីក្រោយចិន។ ចិនដែលពេលនេះ ជាដៃគូសេដ្ឋកិច្ច និងបំពាក់អាវុធ ដល់យោធា បង់ក្លាដែស។ នៅក្នុងស្ថានភាពនេះ ឥណ្ឌា ដែលខ្លាចចិនដណ្តើមឥទ្ធិពលខ្លួន នៅបង់ក្លាដែស នៅក្នុងតំបន់អាស៊ីខាងត្បូង ត្រូវតែបញ្ចេញសកម្មភាពរបស់ខ្លួន។ ជាក់ស្តែង ក្រៅតែពីប្រាក់កម្ចី មហាសាល ឥណ្ឌានៅបានយល់ព្រមផ្តល់សព្វាវុធ និងបង្ហាត់ ហ្វឹកហ្វឺនទាហានបង់ក្លាដែស៕
