មេដវេដេវ ចង់ធ្វើជាប្រធានាធិបតីអាណត្តិទី២ ប៉ុន្តែមិនព្រមប្រជែងជាមួយពូទីនទេ
ការនេះ ឆ្លុះឲ្យឃើញ ដោយសម្ភាសន៍របស់លោកប្រមុខរដ្ឋរុស្ស៊ី មេដវេដេវ ទៅកាសែតអង់គ្លេស “The Financial Times” ដែលក្លាយទៅជាដំណឹងទី១ ផ្សាយព្រឹកមិញ ដោយគ្រប់តែកាណាល់ទូរទស្សន៍ធំៗនៅរុស្ស៊ី។ ក្នុងសម្ភាសន៍នេះ លោក មេដវេដេវ ក៏បាននិយាយប៉ះលើបញ្ហាជាច្រើន បែបយ៉ាងបន់ឲ្យលោក អូបាម៉ា ជាប់ឆ្នោតជាថ្មី ជាប្រធានាធិបតីអាមេរិក និងថាការរលាយទៅនៃសហភាពសូវៀត មិនមែនជាមហន្តរាយភូមិសាស្ត្រ-នយោបាយ ធំបំផុតឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ជាការកត់សម្គាល់ សម្ភាសន៍នេះ បានត្រូវលោកប្រធានាធិបតីរុស្ស៊ី មេដវេដេវ ឲ្យទៅកាសែតអង់គ្លេស “The Financial Times” គឺនៅឯក្រុង Saint-Petersbourg កាលពីថ្ងៃ ១៨មិថុនា ពេលដែលនៅទីនោះ ទើបចប់ទៅសម័យប្រជុំពេញអង្គនៃ “វេទិកាសេដ្ឋកិច្ចអន្តរជាតិ” លើកទី១៥ ប៉ុន្តែ បទសម្ភាសន៍ផ្ទាល់ ទើបត្រូវកាសែតនោះចេញផ្សាយនៅថ្ងៃនេះតែម្តង។
ទូរទស្សន៍រុស្ស៊ី ដោយស្រង់ឱកាសសម្ភាសន៍នោះ មកចាក់ផ្សាយ សំដែងនូវចំណាប់អារម្មណ៍ថា ទាំងលើកនេះ ក៏អ្នកកាសែតបរទេសមិនគ្រាន់តែមិនរំលងឡើយ បញ្ហាទាក់ទងនឹងការបោះឆ្នោតប្រធានាធិបតីនៅរុស្ស៊ី ក្នុងឆ្នាំ២០១២ តែក៏ភ្ជង់ការយកចិត្តទុកដាក់យ៉ាងច្រើន ពិតជាទៅលើចំណុចនេះ។ ទាំងសំណួរ ដែលអ្នកកាសែតអង់គ្លេសចោទ ក៏បន្លឺឡើងជាភាសារុស្ស៊ីដែរ។
លោក មេដវេដេវ ដោយឆ្លើយទៅលើសាច់រឿងដែលមាន សង្កត់ធ្ងន់ថាគាត់ច្រានចោលដាច់ខាត លទ្ធភាពបញ្ឈរឈ្មោះជាបេក្ខជន ដោយរួមជាមួយនាយករដ្ឋមន្ត្រី ពូទីន។ ព្រមជាមួយនេះ លោក មេដវេដេវ មិនបដិសេធឡើយថា គាត់ប្រាថ្នាកាន់តំណែងកំពូលនេះ មួយអាណត្តិទៀត ពីព្រោះប្រធានាធិបតីរូបណាក៏ដោយ “មានកាតព្វកិច្ចត្រូវតែចង់ឈរឈ្មោះចូលប្រឡូក” ជាថ្មី។
ដោយពន្យល់អំពីមូលហេតុ តើហេតុដូចម្តេចបានជា ប្រធានាធិបតី និងនាយករដ្ឋមន្ត្រី មិនអាចឈរឈ្មោះ ក្នុងពេលជាមួយគ្នា លោក មេដវេដេវ ថ្លែងថា “មូលហេតុបឋមទី១ មកពីរូបគាត់ និង លោក ពូទីន ដែលជាសហសេវិកគាត់ និងជាសមមិត្តចាស់ឆ្នាំរបស់គាត់ តំណាងឲ្យកម្លាំងនយោបាយរួមតែមួយទេតើ។ ក្នុងករណីនេះ ការប្រជែងគ្នារវាងរូបគាត់ និងរូបលោក ពូទីន គឺអាចនាំឲ្យខូចការ ខូចដល់ភារកិច្ច និងគោលដៅ ដែលយើងទាំងពីរខំសាងសមិទ្ធិនាប៉ុន្មានឆ្នាំចុងក្រោយ។
លោក មេដវេដេវ បញ្ចប់សេចក្តីថា ៖ បើខ្ញុំនិងលោក ពូទីន ឈរឈ្មោះជាមួយគ្នាគឺមិនមែនជា “សេណារីយោ” ដ៏ល្អឡើយ សម្រាប់ប្រទេសរុស្ស៊ី ដ្បិតការចូលប្រឡូក ក្នុងការបោះឆ្នោត មានន័យ មិនត្រឹមតែជំរុញដល់ការបំផុសបំផុលបរិយាកាសប្រជែងគ្នាយ៉ាងសេរីប៉ុណ្ណោះទេ តែគឺដើម្បីម្នាក់ឈ្នះ ម្នាក់ចាញ់តែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ