ជប៉ុនកាត់បន្ថយការទិញប្រេងពីអ៊ីរ៉ង់
នៅថ្ងៃព្រហស្បតិ៍នេះ ជប៉ុនបានប្រកាសកាត់បន្ថយចំនួនប្រេងដែលខ្លួនទិញនាំចូលពីអ៊ីរ៉ង់។ ជប៉ុនដែលជាប្រទេសទិញប្រេងទីបីរបស់អ៊ីរ៉ង់ បានសម្រេចកាត់បន្ថយការពឹងពាក់ថាមពលទៅលើអ៊ីរ៉ង់ ដើម្បីដាក់សម្ពាធបន្ថែមលើរបបអ៊ីស្លាមមួយនេះឲ្យបោះបង់ចោលកម្មវិធីផលិតអាវុធនុយក្លេអ៊ែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
បច្ចុប្បន្ននេះ ប្រេងឆៅ១០ភាគរយរបស់ជប៉ុន ត្រូវនាំចូលមកពីអ៊ីរ៉ង់។ ប៉ុន្តែ ទៅតាមការស្នើរបស់អាមេរិក ជប៉ុនបានយល់ព្រមកាត់បន្ថយទិញប្រេងពីអ៊ីរ៉ង់ និងសន្យាចាត់វិធានការជាបន្ទាន់ និងជាក់ស្តែង ដើម្បីកាត់បន្ថយ បន្ថែមទៀត ចំនួនប្រេងដែលខ្លួនទិញពីអ៊ីរ៉ង់។
ចម្លើយវិជ្ជមានរបស់រដ្ឋមន្រ្តីសេដ្ឋកិច្ចជប៉ុន នៅថ្ងៃនេះ បានធ្វើឲ្យរដ្ឋមន្រ្តីសេដ្ឋកិច្ចអាមេរិក Timothy Geithnerពេញចិត្តយ៉ាងខ្លាំង។ លោកGeithnerបានផ្តើមទស្សនកិច្ចនៅអាស៊ី ដោយចាប់ផ្តើមនៅក្នុងប្រទេសចិន មុននឹងទៅដល់ជប៉ុនដើម្បីស្វែងរកការគាំទ្រការទូត ដើម្បីដាក់ទណ្ឌកម្មសេដ្ឋកិច្ចទៅលើវិស័យប្រេងអ៊ីរ៉ង់។
នៅប្រទេសចិន ជាទីដែលលោកបានជួបនិយាយជាមួយអនុប្រធានាធិបតី នាយករដ្ឋមន្រ្តីចិន លោកវេន ជាប៉ាវ និងរដ្ឋមន្រ្តីសេដ្ឋកិច្ច លោក Geithnerមិនបានឮចិនហាមាត់និយាយគាំទ្រវិធានការអាមេរិកទេ។ ផ្ទុយទៅវិញ ចិនបានបញ្ជាក់ប្រាប់ទៅអាមេរិកថា គេមិនគួរឡូកឡំ បញ្ហាប្រេងចិននាំចូលពីអ៊ីរ៉ង់ ជាមួយនឹងបញ្ហានុយក្លេអ៊ែរនោះទេ។ កន្លងមកអ្នកនាំពាក្យក្រសួងការបរទេសចិនធ្លាប់បាននិយាយរិះគន់អាមេរិកដោយថា វាជារឿងមិនសមហេតុផល ដែលគេយកច្បាប់ជាតិរបស់ប្រទេសមួយ ទៅដាក់សម្ពាធប្រទេសដទៃឲ្យធ្វើតាម។
អាមេរិកមិនបានការគាំទ្រពីចិន ប៉ុន្តែ អាមេរិកបានទទួលការគាំទ្រពីសម្ព័ន្ធមិត្តជប៉ុន ដែលធ្លាប់មានប្រវត្តិរងគ្រោះដោយគ្រាប់បែកនុយក្លេអ៊ែរ។ ប៉ុន្តែ គួររំលឹកថា មុននឹងយល់ព្រមគាំទ្រអាមេរិក ក្នុងការដាក់ទណ្ឌកម្មទៅលើវិស័យប្រេងកាតអ៊ីរ៉ង់ ជប៉ុនបានទៅពិភាក្សារួចហើយជាមួយប្រទេសដៃគូផ្គត់ផ្គង់ប្រេង ព្រោះថា ដោយសារបញ្ហាឆេះរោងចក្រនុយក្លេអ៊ែរកាលពីដើមឆ្នាំ ជប៉ុនត្រូវការចាំបាច់ថាមពលប្រេង។
ថ្មីៗនេះ រដ្ឋមន្រ្តីការបរទេសជប៉ុនបានធ្វើដំណើរទៅប្រទេសកាតា អារ៉ាប៊ី សាអ៊ូឌីត អេមីរ៉ាត អារ៉ាប់រួម ដែលជប៉ុនទិញប្រេងច្រើនពីអ៊ីរ៉ង់។ ជប៉ុនចង់បញ្ជាក់ប្រាប់ទៅប្រទេសផលិតប្រេងទាំងនោះឲ្យបង្កើនការផ្គត់ផ្គង់បន្ថែម ដើម្បីទប់នឹងការខ្វះប្រេង នៅពេលជប៉ុនកាត់បន្ថយទិញប្រេងពីអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ