ភ្នាក់ងារអវកាសអាមេរិក Nasa បន្តឃ្លាំមើលអាចម៍ផ្កាយដែលនឹងត្រូវហោះឆាបក្បែរភពផែនដីនៅថ្ងៃសុក្រនេះ
ភ្នាក់ងារអវកាសអាមេរិក Nasa នៅតែបន្តចាំឃ្លាំមើលអាចម៍ផ្កាយដ៏ធំមួយ ដែលនឹងត្រូវធ្លាក់មកឆាបក្បែរភពផែនដីនៅថ្ងៃសុក្រនេះ ក្នុងកម្រិតល្បឿន ៧,៨ គីឡូម៉ែត្រក្នុងមួយវិនាទី។ អាចម៍ផ្កាយនេះមានឈ្មោះថា ២០១២DA១៤ មានអង្កត់ផ្ចិត ប្រវែង៤៥ម៉ែត្រ ទម្ងន់ ១៣៥០០០តោន។ វានឹងធ្លាក់មកនៅម៉ោង ៧ និង២៥ នាទីម៉ោងសកល ត្រូវនឹងម៉ោង ២និង២៥នាទី ព្រឹកថ្ងៃសៅរ៍ នៅកម្ពុជា។ អ្នកវិទ្យាសាស្ត្របានរកឃើញវត្តមានរបស់វា កាលពីដើមឆ្នាំ ២០១២ កន្លងមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
សំរាប់អ្នកដែលចូលចិត្តមើលផ្កាយ នៅយប់ថ្ងៃសុក្រនេះ វេលាម៉ោង៧ និង២៥ នាទីម៉ោងសកល អ្នកនឹងអាចមើលឃើញអាចម៍ផ្កាយ ២០១២DA១៤ តាមរយៈតេឡេស្កុប ពីតំបន់អឺរ៉ុបខាងកើត ពីប្រទេសអូស្ត្រាលី និងពីទ្វីបអាស៊ី។ វាជាពន្លឺមួយរសាត់លើមេឃ។
អាចម៍ផ្កាយ ២០១២DA១៤ នេះនឹងធ្លាក់មកក្បែរផែនដីយើង ក្នុងកម្រិតល្បឿន ៧,៨ គីឡូម៉ែត្រក្នុងមួយវិនាទី។ វានឹងហោះជិតផែនដីខ្លាំងតែម្តង បើប្រៀបទៅនឹងចម្ងាយពីភពផែនដីទៅព្រះចន្ទ គឺមានជិតជាង១០ដងឯណោះ។ ប៉ុន្តែយោងតាមអ្នកស្រាវជ្រាវ វានឹងមិនបង្កជាគ្រោះបុកទម្លាយផែនដីនោះឡើយ។
ទីភ្នាក់ងារអវកាសអាមេរិក Nasa នៅតែបន្តចាំឃ្លាំមើលអាចម៍ផ្កាយនេះ។ អាចម៍ផ្កាយនេះ មានអង្កត់ផ្ចិត៤៥ម៉ែត្រ ទម្ងន់ ១៣៥០០០តោន។ វានឹងហោះឆាបតាមភាគខាងលិចនៃមហាសមុទ្រឥណ្ឌា ស្របតាមខ្សែបញ្ឈរនៃឆ្នេរកោះស៊ូម៉ាត្រា នៅឥណ្ឌូនេស៊ី។ ដូច្នេះ ប្រជាជនដែលរស់នៅក្នុងភូមិសាស្ត្រនេះ អាចនឹងឃើញអាចម៍ផ្កាយនេះបាន។
ភ្នាក់ងារអវកាស Nasa យល់ថា នេះជាឧកាសសំរាប់អ្នកវិទ្យាសាស្ត្របានសិក្សាស្វែងយល់អំពីអាចម៍ផ្កាយដែលហោះមកក្បែរផែនដីបំផុត។ ហើយក៏នឹងផ្តល់អាទិភាពដល់ការឃ្លាំមើលអោយបានប្រកិត នូវអាចម៍ផ្កាយនានាដែលហោះឆាបក្បែរគន្លងផែនដី ដើម្បីការពារសុវត្ថិភាពផែនដីរបស់យើង។
ប្រព័ន្ធរ៉ាដារបស់ភ្នាក់ងារភ្នាក់ងារអវកាស Nasa ត្រូវបានដាក់អោយចាំឃ្លាំមើលអាចម៍ផ្កាយនេះ នៅថ្ងៃ ១៦, ១៨, ១៩ និងថ្ងៃ២០ កុម្ភៈ បន្តទៅទៀត។ ប៉ុន្តែដោយសាអាចមន៍ផ្កាយ ២០១២DA១៤ មានទំហំតូច រូបភាពដែលចាប់បានប្រហែលត្រូវរួមតូចទៅតាមនោះដែរ។
តេឡេស្កុបនៅទូទាំងពិភពលោក ក៏នៅចាំឃ្លាំមើលអាចមន៍ផ្កាយនេះដែរ ដើម្បីសន្និដ្ឋានអំពីល្បឿននៃការវិលជុំវិញខ្លួនវា និងសមាសភាពរបស់វា។
គួររំលឹកថា ជាមធ្យម អាចម៍ផ្កាយទំហំប្រហាក់ប្រហែលនឹង ២០១២DA១៤ តែងហោះមកក្បែរភពផែនដីរាល់ ៤០ឆ្នាំម្តង ហើយអាចបង្កជាគ្រោះទៅបុកទង្គិចផែនដី រាល់១២០០ឆ្នាំម្តង។
អ្នកអាចមើលការផ្សាយបន្តផ្ទាល់នូវរូបភាពអាចម៍ផ្កាយនេះ តាមរយៈទំព័រហ្វេបសាយរបស់ភ្នាក់ងារអវកាស Nasa ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ