កម្ពុជាប្រារព្ធទិវាប្រយុទ្ធនឹងជំងឺគ្រុនចាញ់ជាមួយភាពជោគជ័យ
កម្ពុជាកំពុងចូលរួមប្រារព្ធទិវាពិភពលោកប្រយុទ្ធប្រឆាំងជំងឺគ្រុនចាញ់ ថ្ងៃទី២៥មេសា ក្រោមប្រធានបទ វិនិយោគក្នុងអនាគតដើម្បីប្រយុទ្ធនឹងជំងឺគ្រុនចាញ់។ ប្រមុខរាជរដ្ឋាភិបាលកម្ពុជាបានថ្លែងសារអបអរចំពោះសមិទ្ធផលដ៏ល្អរបស់កម្ពុជា ក្នុងកិច្ចការលុបបំបាត់ជំងឺគ្រុនចាញ់ ខណៈដែលព្រះអង្គម្ចាស់ក្សត្រីAstrid របស់ប៊ែលហ្ស៊ីក កំពុងបំពេញបេសកកម្ម៣ថ្ងៃនៅកម្ពុជា ក្នុងក្របខ័ណ្ឌនៃដំណើរទស្សនកិច្ចសមិទ្ធផលកំចាត់ជំងឺគ្រុនចាញ់នៅកម្ពុជា។
ចុះផ្សាយនៅថ្ងៃ៖
ស្តាប់ - ០២:២៤
បន្ទាប់ពីត្រូវបានទទួលស្គាល់ថាជាកូនសិស្សល្អក្នុងការងារកាត់បន្ថយអត្រាឆ្លងមេរោគអេដស៏ កម្ពុជាក៏កំពុងទទួលបានការសសើរលើការកាត់បន្ថយអត្រាស្លាប់ដោយសារជំងឺគ្រុនចាញ់ដែរ។ លទ្ធផលបានបង្ហាញថា កម្ពុជាបានសម្រេចលទ្ធផលល្អលើសការរំពឹងទុក មុនគោលដៅសហស្សវត្សរ៍របស់អង្គការសហប្រជាជាតិឆ្នាំ២០១៥ទៀត។
ក្នុងឱកាសនៃទិវាពិភពលោកប្រយុទ្ធប្រឆាំងជំងឺគ្រុនចាញ់ លោកនាយករដ្ឋមន្ត្រីខ្មែរ ហ៊ុន សែន ក៏បានថ្លែងសារបង្ហាញអំពីការខិតខំរបស់រាជរដ្ឋាភិបាលមួយនេះ រហូតដល់ទទួលបានលទ្ធផលល្អ ក្នុងកិច្ចការប្រយុទ្ធប្រឆាំងនឹងជំងឺគ្រុនចាញ់។ ប្រមុខរាជរដ្ឋាភិបាលកម្ពុជាបានប្រកាសថា គ្រាន់តែក្នុងដំណាក់កាលឆ្នាំដំបូងនៃការអនុវត្តន៍ផែនការយុទ្ធសាស្ត្រជាតិ លុបបំបាត់ជំងឺគ្រុនចាញ់២០១១-២០២៥ អត្រាស្លាប់ដោយសារជំងឺគ្រុនចាញ់បានថយចុះ ពី១៥១នាក់ក្នុងឆ្នាំ២០១០ មកនៅ៩៣នាក់ក្នុងឆ្នាំ២០១១ និងធ្លាក់ដល់៤៥នាក់ក្នុងឆ្នាំ២០១២។ យោងតាមលទ្ធផលនេះ លោកនាយករដ្ឋមន្ត្រីកម្ពុជា មិនខ្លាចនឹងអះអាងបន្តទេថា ការប្រយុទ្ធនឹងជំងឺគ្រុនចាញ់របស់កម្ពុជាមានប្រសិទ្ធភាពខ្ពស់ ហើយបានចូលរួមចំណែកក្នុងការឈានទៅរកការសម្រេចគោលដៅសហស្សវត្សរ៍របស់កម្ពុជាផងដែរ។
លោកវេជ្ជបណ្ឌិត ចរ ម៉េងជួរ ប្រធានមជ្ឈមណ្ឌលជាតិប្រយុទ្ធជំងឺគ្រុនចាញ់ធ្លាប់បានអះអាងប្រាប់អ្នកសារព័ត៌មានថា យោងលើលទ្ធផលការងារនេះ កម្ពុជាអាចទៅដល់គោលដៅអត្រាសូន្យនៃអ្នកស្លាប់ដោយជំងឺគ្រុនចាញ់ នៅឆ្នាំ២០១៥ ហើយនឹងអាចលុបបំបាត់ចោលទាំងស្រុងរាល់ទម្រង់នៃជំងឺគ្រុនចាញ់ នៅឆ្នាំ២០២៥។ បើតាមការរៀបរាប់របស់លោកវេជ្ជបណ្ឌិតរូបនេះ ការចែកចាយមុងជ្រលក់ថ្នាំការពារមូសដែកគោល គឺជាវិធានការដ៏មានប្រសិទ្ធភាពមួយ។ ហើយថាក្នុងរយៈពេល៥ឆ្នាំចុងក្រោយនេះ មុងជ្រលក់ថ្នាំប្រមាណជាង៦លានមុង ត្រូវបានចែកចាយដល់គ្រួសារពលរដ្ឋក្រីក្រនៅទូទាំងប្រទេស។
គួរបញ្ជាក់ថា កម្ពុជាកំពុងប្រារព្ធទិវាពិភពលោកប្រយុទ្ធនឹងជំងឺគ្រុនចាញ់ ក្រោមវត្តមានរបស់ព្រះអង្គម្ចាស់ក្សត្រី Astrid របស់ប្រទេសប៊ែលហ្សីក ដែលត្រូវបានអញ្ជើញអោយធ្វើទស្សនកិច្ចនៅកម្ពុជា ដោយលោករដ្ឋមន្ត្រីសុខាភិបាលកម្ពុជា ម៉ម ប៊ុនហេង និងតំណាងអង្គការសុខភាពពិភពលោកប្រចាំកម្ពុជា លោក Peter Van Maaren។ ព្រះអង្គម្ចាស់ក្សត្រីចូលរួមក្នុងកម្មវិធីប្រយុទ្ធនឹងជំងឺគ្រុនចាញ់ដែលត្រូវបានរៀបចំធ្វើនៅខេត្តកំពង់ស្ពឺ នៅព្រឹកថ្ងៃព្រហស្បតិ៍នេះ ហើយនៅរសៀលថ្ងៃនេះដដែល ព្រះអង្គម្ចាស់ក្សត្រីបានចូលរួមសម្ពោធកម្មវិធីមួយរបស់អង្គការសុខភាពពិភពលោក ដែលមានឈ្មោះថា កម្មវិធីឆ្លើយតបបន្ទាន់ក្នុងមហាអនុតំបន់មេគង្គ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ