ឥណ្ឌា៖ លោកម៉ាន់ ម៉ូហាន់ស៊ីងប្រកាសចូលនិវត្តន៍ និងអំពាវនាវឲ្យលោករ៉ាអ៊ូល ហ្គង់ឌីស្នងតំណែង
នៅក្នុងប្រទេសឥណ្ឌា លោកនាយករដ្ឋមន្រ្តីម៉ាន់ម៉ូហាន់ ស៊ីងបានប្រកាសឲ្យដឹងនៅថ្ងៃសុក្រ ទី៣ មករានេះថា លោកនឹងចូលនិវត្តន៍នៅក្រោយការបោះឆ្នោតជាតិដែលគ្រោងរៀបចំនាប៉ុន្មានខែខាងមុខ។ ទន្ទឹមគ្នានេះ លោកម៉ាន់ម៉ូហាន់ ស៊ីងក៏បានអំពាវនាវឲ្យលោករ៉ាអ៊ូល ហ្គង់ឌីស្នងតំណែងពីលោកនៅក្នុងករណីណាដែលគណបក្សសមាជឈ្នះឆ្នោត។
ចុះផ្សាយនៅថ្ងៃ៖
ស្តាប់ - ០២:២៤
« នៅប៉ុន្មានខែទៀតខាងមុខ ក្រោយការបោះឆ្នោត ខ្ញុំនឹងផ្ទេរអំណាចទៅឲ្យនាយករដ្ឋមន្រ្តីថ្មី » នេះជាការថ្លែងរបស់លោកនាយករដ្ឋមន្រ្តីឥណ្ឌាម៉ាន់ម៉ូហាន់ ស៊ីងនៅក្នុងសន្និសីទកាសែតលើកទីមួយក្នុងរយៈពេល ៣ឆ្នំាកន្លងទៅ។ មានអាយុ ៨១ឆ្នំា លោកម៉ាន់ម៉ូហាន់ ស៊ីងធ្លាប់បានបង្ហើបឲ្យដឹងរួចហើយថា លោកនឹងទុកកៅអីនាយករដ្ឋមន្រ្តីឲ្យលោករ៉ាអ៊ូល ហ្គង់ឌីនៅក្នុងករណីណាដែលគណបក្សសមាជឈ្នះឆ្នោតនាការបោះឆ្នោតជាតិខាងមុខ។ យោងតាមលោកម៉ាន់ម៉ូហាន់ ស៊ីង លោករ៉ាអ៊ូល ហ្គង់ឌី ជាបេក្ខជនដ៏ល្អ មានសមត្ថភាពខ្ពង់ខ្ពស់ និងថា គណបក្សសមាជប្រាកដជាជ្រើសរើសលោកហ្គង់ឌីឲ្យឈរឈ្មោះតំណាងឲ្យគណបក្សជាមិនខាន។ សូមជម្រាបជូនថា គណបក្សសមាជដែលដឹកនំាដោយម្តាយរបស់លោករ៉ាអ៊ូល ហ្គង់ឌី គឺលោកស្រីសូនីញ៉ា ហ្គង់ឌី នឹងអាចជ្រើសរើសបេក្ខជននាយករដ្ឋមន្រ្តីជាផ្លូវការនៅក្នុងកិច្ចប្រជុំគណកម្មាធិការនាយកបក្សនាថ្ងៃទី១៧ មករាខាងមុខ។
អ្វីជាការកត់សម្គាល់នោះនៅត្រង់ថា សុទិដ្ឋិនិយមរបស់លោកម៉ាន់ម៉ូហាន់ ស៊ីងហាក់ដូចជាបានផ្ទុយនឹងលទ្ធផលនៃការស្ទង់មតិដែលថា គណបក្សសមាជរបស់លោកស្រីសូនីញ៉ា ហ្គង់ឌីមានសំណាងតិចតួចណាស់ប្រឈមមុខនឹងគណបក្សប្រឆំាងដឹកនំាដោយលោកណារ៉ង់តា ម៉ូឌី គឺគណបក្សបារ៉ាទីយ៉ា ហ៉្យាណាតា។ លោកណារ៉ង់តា ម៉ូឌីដែលសព្វថ្ងៃជាចៅហ្វាយខេត្តមួយក្នុងរដ្ឋហ្គុយយ៉ារ៉ាត់ស្ថិតប៉ែកខាងលិចប្រទេស។ តែកាលពីឆ្នំា ២០០២ ពោលក្រោយពីបានចូលកាន់តំណែងចៅហ្វាយខេត្តបន្តិច លោកណារ៉ង់តា ម៉ូឌីបានជាប់ចោទពីបទបានចូលរួមនៅក្នុងការបះបោរសាសនាមួយដែលបានបណ្តាលឲ្យមានមនុស្សស្លាប់ប្រមាណជា ២ ០០០នាក់ ក្នុងនោះភាគច្រើនជាអ្នកកាន់សាសនាអ៊ីស្លាម។ តែថ្មីៗនេះ លោកណារ៉ង់តា ម៉ូឌីបានរួចខ្លួនពីសំណុំរឿងនោះ តែមានស្រ្តីម្នាក់ដែលលោកណារ៉ង់តា ម៉ូឌីប្រគល់តំណែងក្រសួងមួយឲ្យកាន់កាប់ត្រូវបានទទួលទោសជាប់គុកចំនួន ២៨ឆ្នំា។
នៅត្រង់ចំណុចនេះហើយដែលលោកនាយករដ្ឋមន្រ្តីម៉ាន់ម៉ូហាន់ ស៊ីងបានឆ្លៀតឱកាសវាយប្រហារលោកណារ៉ង់តា ម៉ូឌីដោយអះអាងថា ប្រទេសនឹងជួបគ្រោះមហន្តរាយប្រសិនបើលោកណារ៉ង់តា ម៉ូឌីធ្វើជានាយករដ្ឋមន្រ្តីនោះ និងថា លោកណារ៉ង់តា ម៉ូឌីមិនដែលបានបង្ហាញចេញនូវសមត្ថភាពជាអ្នកដឹកនំាទេ។ គួរជម្រាបជូនថា មានអាយុ ៦៤ឆ្នំា លោកណារ៉ង់តា ម៉ូឌីបានប្រើយុទ្ធសាស្រ្តវាយប្រហារគណបក្សសមាជដែលបានកាន់តំណែងតំាងពីឆ្នំា ២០០៤ មក ដោយផ្តោតសំខាន់លើកំណែទម្រង់យឺតយ៉ាវ កំណើនសេដ្ឋកិច្ចធ្លាក់ចុះ និងការផ្ទុះរឿងអាស្រូវពុករលួយជាហូរហែរនៅក្នុងគណបក្សសមាជ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ