អូតង់វាយលុកទៅលើ Tripoli បំពង់បង្ហូរប្រេងកាតមួយត្រូវបំផ្លាញ
អូតង់បានបើកការវាយលុកជាថ្មីទៀតយ៉ាងកាចសាហាវបំផុតនៅយប់ថ្ងៃ ព្រហស្បតិ៍ឆ្លងមកថ្ងៃសុក្រទី៥សីហានេះ ។ នេះ ជាការចោទប្រកាន់ របស់ទូរទស្សន៍រដ្ឋលីប៊ី។ រដ្ឋាភិបាលរបស់លោក Mouammar Kadhafiបានបរិហារ ថា "ពួកបះបោរ បានធ្វើឲ្យអន្តរាយ បំពង់បង្ហូរប្រេងកាតដែលផ្គត់ផ្គង់រោងចក្រចម្រាញ់ប្រេង តែមួយគត់របស់លីប៊ី"។ ទីក្រុងទ្រីប៉ូលី នៅព្រឹកព្រលឹមថ្ងៃសុក្រនេះ ត្រូវទទួលរងការផ្ទុះយ៉ាងខ្លាំងក្លាជាច្រើនលើកពីការ ទម្លាក់គ្រាប់របស់យន្តហោះអូតង់។ នេះបើយោងតាម អ្នកកាសែតម្នាក់របស់ទីភ្នាក់ងារព័ត៌មានបារាំង AFP។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ទូទស្សន៍រដ្ឋលីប៊ី បានអះអាងថា” ទីតាំងស៊ីវិល និងយោធានៅ Khellat Al-Ferjan,ជាយទីក្រុង Tripoli ប៉ែកអាគ្នេយ៍ ជាផ្ទាំងស៊ីបរបស់ពួកឈ្លានពានអាណានិគមនិយមបរទេស»។
ចំណែក អនុរដ្ឋមន្ត្រីក្រសួងការបរទេសលីប៊ី លោក Khaled Kaaim នៅឱកាសសន្និសីទសារព័ត៌មានមួយនៅយប់ថ្ងៃព្រហស្បតិ៍៤សីហា បានគូសបញ្ជាក់ថា “ ខាងពួកបះបោរវិញ បានធ្វើវិឆ្ឆេទកម្ម បិទក្បាលវាល់វ៍បំពង់បង្ហូរប្រេងកាតដោយ បានទម្លាក់ បេតុង ពីលើយ៉ាងសន្ធឹកសន្ធាប់ នៅ Al-Rayanina ជាហេតុបណ្តាលឲ្យ ខ្វះខាតអគ្គិសនីប្រើប្រាស់នៅរដ្ឋធានី Tripoli និង នៅតំបន់ជុំវិញទីក្រុងនេះ »។
ប្រជាជនល៊ីបី ជាច្រើន ដែលរស់នៅជាយទីក្រុងបានរៀបរាប់ប្រាប់ទីភា្នក់ងារព័តមានបារាំងAFP ថា « អគ្គិសនី ត្រូវបានកាត់ផ្តាច់ ជាញឹកញាប់ និងជាច្រើនម៉ោង។ មិនតែប៉ុណ្ណោះ ពួកគេ ត្រូវជួបប្រទះនឹងការខ្វះខាត ឧស្ម័នសំរាប់ប្រើប្រាស់ក្នុងផ្ទះបាយ បូកបន្ថែមប្រេងឥន្ធនៈទៀតផង »។
លោក Khaled Kaaim បានបរិហារផងដែរអំពី « អំពើប្លន់យកតាមសមុទ្រនូវនាវាដឹកជញ្ជូនប្រេងកាតមួយគ្រឿងរបស់រដ្ឋលីប៊ីនៅរសៀលម្សិលមិញដែលផ្ទុកប្រេងកាតចំនួន ៣ម៉ឺន៩ពាន់តោន។
យោងតាម នាយទាហានម្នាក់របស់ចលនាបះបោរ«ប្រតិបត្តិការរឹបអូសនាវាដឹកប្រេងកាតនេះ ធ្វើឡើងដោយមានជំនួយពីអូតង់» អូតង់ ដែលបច្ចុប្បន្ន មាននាវាចំនួន ១៧គ្រឿង ដាក់ពង្រាយនៅសមុទ្រ Méditerranée ដើម្បីឲ្យលីប៊ីធ្វើការគោរពចំពោះការដាក់ទណ្ឌកម្មរបស់អសប ស្តីពី ការហាមដឹកអាវុធ » ។
អនុរដ្ឋមន្ត្រីការបរទេសលីប៊ី អះអាងទៀតថា"ដោយសារ ខ្វះខាតអគ្គិសនីប្រើប្រាស់ ថ្នាំពេទ្យ និងស្បៀងអាហារ ក្នុងបរិមាណដ៏ច្រើន ត្រូវខូចអស់ » ដោយលោកវិនិច្ឆ័យថា" អូតង់ ពិតជាមានចេតនាបង្កវិបត្តិមនុស្សធម៌នៅលើទឹកដីលីប៊ី"។
មិនតែប៉ុណ្ណោះ របបកាដាហ្វី បានចោទអូតង់ថា បានសម្លាប់ស្តី្រមួយរូបនិងកូនៗពីរនាក់របស់គាត់នៅក្នុងការវាយប្រហារមួយរបស់អូតង់ប្រឆាំងទៅលើលំនៅឋានមួយនៅប៉ែកខាងលិចទីក្រុង Zliten៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ