ព្រះអង្គម្ចាស់ នរោត្តម រណឫទ្ធិ អាចក្លាយជាប្រធានគណបក្សនយោបាយវិញ
ព្រះអង្គម្ចាស់ នរោត្តម រណឫទ្ធិ ដែលបានប្រកាសចូលនិវត្តពីនយោបាយកាលពីចុងឆ្នាំ២០០៨នោះ អាចនឹងក្លាយទៅជាប្រធានគណបក្សនយោបាយឡើងវិញនៅក្នុងសប្តាហ៍ក្រោយនេះ។ បើវាជាការពិត ព្រះអង្គម្ចាស់ គឺជាប្រធានគណបក្ស នរោត្តម រណឫទ្ធិ ចាប់ពីថ្ងៃដែលគណបក្សជាតិនិយមធ្វើសមាជវិសាមញ្ញប្តូរឈ្មោះ និងរូបសញ្ញាគណបក្សនៅថ្ងៃទី១១ខែធ្នូខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
នៅថ្ងៃទី១១ខែធ្នូសប្តាហ៍ក្រោយនេះ គណបក្សជាតិនិយមដែលប្រមូលផ្តុំដោយអ្នកស្មោះស្ម័គ្រនឹងព្រះអង្គម្ចាស់ នរោត្តម រណឫទ្ធិ នោះ នឹងរៀបចំសមាជវិសាមញ្ញមួយ ដើម្បីប្តូរឈ្មោះគណបក្សនេះ មកជាគណបក្សនរោត្តម រណឫទ្ធិវិញ។ លោកប៉ែន សង្ហា អ្នកនាំពាក្យគណបក្សជាតិនិយមបានថ្លែងអោយដឹងនៅថ្ងៃព្រហស្បតិ៍ទី២ធ្នូនេះថា សមាជគណបក្សជាតិនិយមនោះនឹងទទូចអនុម័តប្រកាសយាងព្រះអង្គម្ចាស់ នរោត្តម រណឫទ្ធិ ធ្វើជាប្រធានគណបក្សនរោត្តម រណឫទ្ធិនោះតែម្តង។
នៅតែការសម្រេចព្រះទ័យរបស់ព្រះអង្គម្ចាស់ នរោត្តម រណឫទ្ធិ តែប៉ុណ្ណោះដែលគេនៅមិនទាន់ដឹង។ លោក នរាណារិទ្ធ អាណន់ដាយ៉ាត ប្រធានខុទ្ទកាល័យរបស់ព្រះអង្គម្ចាស់នរោត្តម រណឫទ្ធិនៅមិនទាន់អាចបញ្ជាក់អំពីការសម្រេចព្រះទ័យចុងក្រោយរបស់ព្រះអង្គម្ចាស់ នរោត្តម រណឫទ្ធិ បានឡើយ។ លោកអះអាងថា រហូតដល់ពេលនេះ ព្រះប្រធានរបស់លោក មិនដែលបានមានបន្ទូលលើកឡើងអំពី ការយាងទៅដឹកនាំគណបក្សនេះឡើយ។
បើយោងតាមសកម្មភាព និងព្រឹត្តិការណ៍កន្លងមកនោះ វាទំនងណាស់ថា ព្រះអង្គម្ចាស់ នរោត្តម រណឫទ្ធិ កំពុងស្ថិតនៅក្នុងគន្លងឆ្ពោះទៅរកតួនាទីជាប្រធានគណបក្សនរោត្តម រណឫទ្ធិ ឡើងវិញ។ ព្រះអង្គម្ចាស់ នរោត្តម រណឫទ្ធិ ដែលបានប្រកាសចូលនិវត្តពីឆាកនយោបាយកាលពីយប់ថ្ងៃទី២ខែតុលាឆ្នាំ២០០៨ នៅចំពោះមុខអ្នកសារព័ត៌មាន ហើយក្រោយមកត្រូវបានព្រះមហាក្សត្រតែងតាំងជាប្រធានក្រុមឧត្តមប្រឹក្សាផ្ទាល់នៃព្រះមហាក្សត្រ ឋានៈស្មើនាយករដ្ឋមន្ត្រីនោះ ស្រាប់តែបានបង្ហាញភក្ត្រ នៅក្នុងចំណោមសមាជិកគណបក្សជាតិនិយមក្នុងពេលកន្លងមក។
សមាជវិសាមញ្ញដែលគណបក្សជាតិនិយមគ្រោងនឹងរៀបចំនៅពេលខាងមុខនេះ កើតឡើងដោយសារ ថ្នាក់ដឹកនាំគណបក្សនេះពន្យល់ថា សមាជិកមូលដ្ឋានរបស់ខ្លួនបានធ្វើញ្ញត្តិទទូចចង់អោយព្រះអង្គម្ចាស់ នរោត្តម រណឫទ្ធិ យាងត្រឡប់មកដឹកនាំគណបក្សនេះវិញ។ មន្ត្រីរបស់គណបក្សជាតិនិយម និងមន្ត្រីដែលនៅជិតព្រះអង្គបានអះអាងថា ក្រោយពេលដែលសមាជរបស់គណបក្សជាតិនិយមប្រកាសការសម្រេចរបស់ខ្លួន ប្តូរឈ្មោះ និងនិម្មិតសញ្ញាគណបក្សហើយនោះ ព្រះអង្គម្ចាស់ នរោត្តម រណឫទ្ធិ នឹងមានវត្តមាននៅក្នុងពិធីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ