អង្គការពាណិជ្ជកម្មពិភពលោកបានរកឃើញកិច្ចព្រមព្រៀងជាប្រវត្តិសាស្រ្ត
ចុះផ្សាយនៅថ្ងៃ៖
ស្តាប់ - ០៦:១៣
អង្គការពាណិជ្ជកម្មពិភពលោកទើបបានបិទបញ្ចប់កិច្ចប្រជុំរយៈពេល ៥ថ្ងៃរបស់ខ្លួននៅកោះបាលី ប្រទេសឥណ្ឌូណេស៊ី។ ជាកិច្ចប្រជុំដែលចូលរួមដោយរដ្ឋមន្រ្តីក្រសួងពាណិជ្ជកម្មនៃបណ្តាប្រទេសសមាជិកអង្គការពាណិជ្ជកម្មពិភពលោក ទំាង ១៥៩។ កម្មវត្ថុនៃកិច្ចប្រជុំគឺដើម្បីស្វែងរកកិច្ចព្រមព្រៀងមួយស្តីពីការធ្វើសេរីកម្មនៃការដោះដូរពាណិជ្ជកម្មពិភពលោក។ បន្ទាប់ពីបានជជែកគ្នាយ៉ាងប្រទាញប្រទង់ក្នុងរយៈពេលប៉ុន្មានថ្ងៃនេះមក កិច្ចព្រមព្រៀងជាប្រវត្តិសាស្រ្តមួយទើបតែបានរកឃើញនាព្រឹកថ្ងៃសៅរ៍ ទី៧ ធ្នូនៅនាទីចុងក្រោយ។
គ្រប់គ្នាចាត់ទុកកិច្ចព្រមព្រៀងនោះថា មានលក្ខណៈជាប្រវត្តិសាស្រ្តសម្រាប់អង្គការពាណិជ្ជកម្មពិភពលោក និងសម្រាប់សមាជិកទំាង ១៥៩ប្រទេស។ ជោគជ័យជាប្រវត្តិសាស្រ្ត ព្រោះតំាងពីអង្គការពាណិជ្ជកម្មពិភពលោកបានចាប់កំណើតក្នុងឆ្នំា ១៩៩៥ ពោលជិត ១៩ឆ្នំាកន្លងមក អង្គការមួយនេះមិនដែលសម្រេចបានកិច្ចព្រមព្រៀងពាណិជ្ជកម្មជាលក្ខណៈអន្តរជាតិណាមួយនៅឡើយទេ។ ភាពជាប់គំាងនៅក្នុងកិច្ចប្រជុំជាបន្តបន្ទាប់ត្រូវបានគេសម្គាល់ឃើញថា មកពីមានការខ្វែងគំនិតគ្នាជារឿយៗរវាងប្រទេសសមាជិក ពិសេសក្រុមប្រទេសដែលកំពុងមានសេដ្ឋកិច្ចរីកលូតលាស់ និងក្រុមប្រទេសអភិវឌ្ឍ។
សូមរម្លឹកជូនឡើងវិញថា កិច្ចប្រជុំនៅក្នុងក្របខណ្ឌនៃអង្គការពាណិជ្ជកម្មពិភពលោកដើម្បីស្វែងរកកិច្ចព្រមព្រៀងមួយស្តីពីការធ្វើសេរីកម្មនៃការដោះដូរពាណិជ្ជកម្មក្នុងពិភពលោក ត្រូវបានចាប់ផ្តើមលើកដំបូងតំាងពីឆ្នំា ២០០១ ក្នុងទីក្រុងដូហា ប្រទេសកាតា។ តំាងពីពេលនោះមក កិច្ចប្រជុំត្រូវបានរៀបចំធ្វើឡើងជាបន្តបន្ទាប់ តែបានទទួលបរាជ័យជានិច្ច។ នៅក្នុងកិច្ចប្រជុំនៅកោះបាលី ប្រទេសឥណ្ឌូណេស៊ី គ្រប់គ្នាហាក់ដូចជាគ្មានសង្ឃឹមថានឹងទទួលបានជោគជ័យទេ ព្រោះថា នៅថ្ងៃប្រជុំចុងក្រោយនាថ្ងៃសុក្រ ទី៦ ធ្នូ ភាពចម្រូងចម្រាសនៅបន្តមានរវាងប្រទេសឥណ្ឌា និងសហរដ្ឋអាមេរិកជុំវិញរឿងនយោបាយឧបត្ថម្ភធនលើវិស័យកសិកម្ម។ បន្ទាប់មកទៀត ការខ្វែងគំនិតគ្នាក៏ផ្តើមមានរវាងប្រទេសគុយបា និងសហរដ្ឋអាមេរិកទាក់ទងនឹងរឿងទ័ណ្ឌកម្មសេដ្ឋកិច្ចដែលអាមេរិកបានដាក់លើគុយបាតំាងកន្លះសតវត្សកន្លងមក។
កិច្ចព្រមព្រៀងបាលីនឹងផ្តល់សកម្មភាពសេដ្ឋកិច្ចគិតជាប្រាក់ ៩៦០ ០០០ពាន់លានដុល្លារ និងបង្កើតបាន ២១លានការងារ
កិច្ចព្រមព្រៀងនោះត្រូវបានចែកចេញជា ៣ផ្នែក ទី១៖ វិស័យកសិកម្ម សមាជិកទំាងអស់បានព្រមព្រៀងគ្នាក្នុងកាត់បន្ថយប្រាក់ឧបត្ថម្ភធនលើផលិតផលកសិកម្មនាំចេញ។ នេះជាប្រធានបទមួយដែលមានការខ្វែងគំនិតគ្នាយ៉ាងខ្លំាងនៅក្នុងចំណោមប្រទេសសមាជិក ព្រោះថា មានប្រទេសខ្លះបានជួយឧបត្ថម្ភយ៉ាងច្រើនសម្បើមដល់ប្រជាកសិកររបស់ខ្លួនដើម្បីធ្វើយ៉ាងណា ជួយបង្កើនការនំាចេញផលិតផលកសិកម្មរបស់ប្រជាកសិករក្នុងតម្លៃមួយថោក ធៀបនឹងផលិតផលកសិកម្មរបស់ប្រទេសសមាជិកផ្សេង។
ទី២៖ ជំនួយសម្រាប់អភិវឌ្ឍន៍ កិច្ចព្រមព្រៀងបានចែងពីការមិនយកពន្ធដារលើផលិតផលដែលនំាចូលពីប្រទេសក្រីក្រ។ នេះជាលទ្ធភាពចំាបាច់មួយដើម្បីជួយលើកស្ទួយសេដ្ឋកិច្ចរបស់ប្រទេសក្រីក្រទំាងនោះ។
ទី៣៖ សម្រួលការដោះដូរពាណិជ្ជកម្មពិភពលោក មានន័យថា រៀបចំឲ្យមានវិធានការពន្ធដារជាលក្ខណៈស្តង់ដារមួយសម្រាប់ការនំាទំនិញចេញ ចូលរវាងប្រទេសជាសមាជិក ពោលគឺកាត់បន្ថយ ឬមួយក៏លប់ចោលរនំាងពន្ធគយមួយចំនួនដែលកំពុងមានយ៉ាងស្មុគស្មាញនាពេលសព្វថ្ងៃ។
បើយោងតាមវិទ្យាស្ថានសេដ្ឋកិច្ចអន្តរជាតិ Peterson ដែលមានទីស្នាក់ការក្នុងទីក្រុងវ៉ាស៊ីតោនឲ្យដឹងថា កិច្ចព្រមព្រៀងនៅកោះបាលីនឹងអាចជួយបង្កើនសកម្មភាពសេដ្ឋកិច្ចពិភពលោកដែលគិតជាទឹកប្រាក់មានរហូតដល់ទៅ ៩៦០ ០០០ពាន់លានដុល្លារ ព្រមទំាងអាចជួយបង្កើតការងារចំនួន ២១លានការងារ ក្នុងនោះមាន ១៨លានការងារនៅក្នុងប្រទេសកំពុងអភិវឌ្ឍន៍។
ជោគជ័យផ្ទាល់ខ្លួនរបស់លោក រ៉ូប៊ែរតូ អាសេវេដូ
លោករ៉ូប៊ែរតូ អាសេវេដូដែលជាជនជាតិប្រេស៊ីលទើបតែបានចូលកាន់តំណែងជាអគ្គនាយកអង្គការពាណិជ្ជកម្មពិភពលោកជំនួសលោកប៉ាស្កាល់ ឡាមី ជាជនជាតិបារំាង។ ដូច្នេះ អ្វីដែលលោករ៉ូប៊ែរតូ អាសេវេដូសម្រេចបាននៅពេលនេះ ពិតជាជោគជ័យរបស់អង្គការពាណិជ្ជកម្មពិភពលោក និងក៏ជាជោគជ័យផ្ទាល់ខ្លួនរបស់រ៉ូប៊ែរតូ អាសេវេដូដែរ ព្រោះថា តំាងពីជាង ១០ឆ្នំាមកហើយដែលអង្គការពាណិជ្ជកម្មពិភពលោកទទួលបរាជ័យជាបន្តបន្ទាប់ក្នុងការស្វែងរកកិច្ចព្រមព្រៀងស្តីពីការបើកចំហព្រំដែនក្នុងការដោះដូរពាណិជ្ជកម្មពិភពលោក។
កិច្ចប្រជុំនៅកោះបាលី ក៏មិនខុសគ្នានឹងកិច្ចប្រជុំមុនៗទេ គឺមានការប្រទាញប្រទង់គ្នាខ្លំាងណាស់នៅក្នុងចំណោមប្រទេសសមាជិក។ សូមជម្រាបជូនថា ដើម្បីអាចឲ្យកិច្ចព្រមព្រៀងមួយអនុម័តជាឯកច្ឆ័ន្ទបាន លុះត្រាណាតែមានការយល់ព្រមពីសមាជិកទំាងអស់ ពោលទំាង ១៥៩ប្រទេស។ បើមានប្រទេសណាមួយជំទាស់ គឺមិនអាចទៅរួចទេ។ ដូច្នេះវាជារឿងមួយស្មុគស្មាញមែនទែនសម្រាប់រូបលោករ៉ូប៊ែរតូ អាសេវេដូ ព្រោះថា ប្រទេសសមាជិកនីមួយៗសុទ្ធតែមានផលប្រយោជន៍ និងអាទិភាពខុសគ្នាដែលចំាបាច់ត្រូវតែរកផ្លូវកណ្តាលមួយសម្រាប់ដើរបានទំាងអស់គ្នា។
តែលោករ៉ូប៊ែរតូ អាសេវេដូមិនបានបន្ធូរដៃទេ នៅចំពោះមុខការជំទាស់របស់ឥណ្ឌា និងគុយបា។ ការព្យាយាមអត់ធ្មត់របស់លោករ៉ូប៊ែរតូ អាសេវេដូមកពីលោកយល់ថា ជោគជ័យនៅកោះបាលី ជាការផ្តល់ខ្យល់អុកស៊ីសែនឲ្យអង្គការពាណិជ្ជកម្មពិភពលោក។ ផ្ទុយទៅវិញ បរាជ័យនៅកោះបាលី នឹងធ្វើឲ្យវត្តមានរបស់អង្គការមួយនេះលែងមានន័យអ្វីដែលធ្វើឲ្យគេជឿទុកចិត្តទៀតបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ