Human Rights Watch ជំរុញឲ្យលោក អូបាម៉ា លើកឡើងពីការរំលោភសិទ្ធិមនុស្សនៅកម្ពុជា
អង្គការសិទ្ធិមនុស្ស Human Rights Watch ដែលមានមូលដ្ឋាននៅទីក្រុងញូវយ៉កបានជំរុញឲ្យលោក អូបាម៉ា ក្នុងពេលធ្វើដំណើរមកកាន់កម្ពុជាដើម្បីចូលរួមកិច្ចប្រជុំកំពូលអាស៊ាននៅថ្ងៃទី១៩ និងថ្ងៃទី២០ វិច្ឆិកាខាងមុខ គឺលោកប្រធានាធិបតីអាមេរិកដែលទើបជាប់ឆ្នោតជាថ្មីត្រូវលើកឡើងពីបញ្ហារំលោភសិទ្ធិមនុស្សនៅកម្ពុជា រួមមានការសម្លាប់ក្រៅប្រព័ន្ធតុលាការជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០១
អង្គការឃ្លាំមើលសិទ្ធិមនុស្ស Human Rights Watch បានលើកឡើងនូវករណីសម្លាប់ពលរដ្ឋកម្ពុជាជាង ៣០០នាក់ពាក់ព័ន្ធនយោបាយនៅក្នុងរយៈពេល ២ ទស្សវត្សរ៍ ក្រោមការដឹកនាំរបស់លោកនាយករដ្ឋមន្ត្រីហ៊ុន សែន។ ក្នុងរបាយការណ៍ថ្មីមួយដែលមានចំណងជើងថា “ប្រាប់ពួកគេថា ខ្ញុំចង់សម្លាប់ពួកគេ៖ ក្នុងរយៈពេល ២ទស្សវត្សរ៍នៃភាពគ្មានទោសពៃរ៍ ក្រោមការដឹកនាំរបស់លោកហ៊ុន សែននៅកម្ពុជា” អង្គការឃ្លាំមើលសិទ្ធិមនុស្សបានភ្ជាប់អំពើឃាតកម្មទាំងនោះ ទៅនឹងមន្ត្រីជាន់ខ្ពស់រដ្ឋាភិបាល និងទាហានកម្ពុជាជាច្រើននាក់ ដោយថា រាល់អំពើឃាតកម្ម គឺមិនត្រូវបានគេស៊ើបអង្កេតឲ្យបានពេញលេញឡើយ។ ព្រឹត្តិការណ៍ផ្ទុះអាវុធកាលពីឆ្នាំ១៩៩៧ ដែលបានសម្លាប់មនុស្ស ១៦នាក់ ក៏ត្រូវបានអង្គការសិទ្ធិមនុស្សលើកឡើង ដោយថា ករណីនោះ បើយោងតាមអង្គការសហប្រជាជាតិ និងក្រុម FBI របស់អាមេរិក គឺមានជាប់ទាក់ទងនឹងកងអង្គរក្សរបស់លោកនាយករដ្ឋមន្ត្រីហ៊ុន សែន។
អង្គការ Human Rights Watch បានទាមទារឲ្យប្រធានាធិបតីដែលទើបជាប់ឆ្នោតជាថ្មី លោកអូបាម៉ាដែលនឹងមកចូលរួមកិច្ចប្រជុំកំពូលអាស៊ានបូព៌ានៅទីក្រុងភ្នំពេញនាថ្ងៃទី១៩ វិច្ឆិកា ត្រូវតែលើកឡើងពីការកែទម្រង់ និងបញ្ចប់នូវវប្បធម៌និរទណ្ឌភាពដែលជាប់ពាក់ព័ន្ធនឹងមន្ត្រីរដ្ឋាភិបាលក្នុងពេលលោក អូបាម៉ាជួបនឹងលោកនាយករដ្ឋមន្ត្រីហ៊ុន សែនដែលបានឡើងកាន់តំណែងតាំងពីឆ្នាំ១៩៨៥។ផ្ទុយទៅវិញ Human Rights Watch បានលើកឡើងថា បើសិនជាលោកអូបាម៉ាមិនបានលើកឡើងអំពីការរំលោភសិទ្ធិមនុស្ស បូករួមទាំងការស្នើឲ្យកម្ពុជាលុបបំបាត់ការរួចទោសនោះទេ គឺដំណើរទស្សនកិច្ចរបស់លោក អូបាម៉ាមកកាន់កម្ពុជា ហាក់ដូចជាលើកទឹកចិត្ត និងគាំទ្រឲ្យរដ្ឋាភិបាលកម្ពុជាកាន់តែបន្តនូវអំពើរំលោភបំពានទាំងនោះ។
ករណីសម្លាប់សកម្មជន ដោយសាររឿងដីធ្លី សកម្មជនព្រៃឈើ អ្នកកាសែតក៏ត្រូវបានលើកឡើងផង។ ដូច្នេះ Human Rights Watch ថា លោកអូបាម៉ាគួរតែគូសបញ្ជាក់ឲ្យបានច្បាស់ៗថា អាមេរិកដឹងនូវអ្វីដែលកើតមាននៅកម្ពុជា ហើយកម្ពុជាគួរតែកែសម្រួល ដោយដោះស្រាយនូវរាល់បញ្ហាទាំងនោះ។ សមាជិកព្រឹទ្ធសភាសហរដ្ឋអាមេរិកជាច្រើននាក់ក៏បានជំរុញឲ្យលោកអូបាម៉ាលើកឡើងពីបញ្ហាសិទ្ធិមនុស្សនៅកម្ពុជាក្នុងដំណើរទស្សនកិច្ចរបស់លោកផងដែរ។
យ៉ាងណាក៏ដោយ នៅក្រៅវេទិកាតុមូលជួបនឹងអ្នកកាសែត និយាយពីរឿងអាស៊ាននៅព្រឹកមិញ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរដ្ឋាភិបាលបានច្រានចោលនូវរបាយការណ៍រំលោភសិទ្ធិមនុស្សនៅកម្ពុជារបស់អង្គការ Human Rights Watch ហើយថា ការលើកឡើងនោះ ពួកគេគ្រាន់តែចង់ឲ្យឮសំឡេង នៅពេលមានកិច្ចប្រជុំធំៗ ដូចជាកិច្ចប្រជុំ G8 និងកិច្ចប្រជុំ G20 ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ