គណបក្សសង្គ្រោះជាតិទាមទារតំណែងប្រធានរដ្ឋសភា
លោកសម រង្ស៊ី ប្រធានគណបក្សសង្គ្រោះជាតិបានប្រាប់វិទ្យុបារាំងអន្តរជាតិ នៅថ្ងៃនេះថា ដើម្បីឲ្យមានតុល្យភាពអំណាច ទាល់តែគណបក្សសង្គ្រោះជាតិទទួលបានតំណែងប្រធានរដ្ឋសភាដើម្បីដឹកនាំស្ថាប័ននេះ។ លោកសម រង្ស៊ី បញ្ជាក់ថា បើការទាមទារនេះមិនបានផលទេ គណបក្សសង្គ្រោះជាតិនឹងធ្វើកូដកម្មទូទាំងប្រទេស នៅថ្ងៃទី៦តុលានេះ។ ប៉ុន្តែ លោកនាយករដ្ឋមន្ត្រី ហ៊ុន សែន បានប្រកាសរួចហើយថា គេមិនអាចប្រគល់តំណែងប្រធានសភាទៅឲ្យគណបក្សដែលមានសំឡេងភាគតិចឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
ការទាមទារតំណែងប្រធានរដ្ឋសភាពីសំណាក់គណបក្សសង្គ្រោះជាតិ គ្មានអ្វីជាអាថ៌កំបាំងទៀតឡើយ។ លោក សម រង្ស៊ី ប្រធានគណបក្សសង្គ្រោះជាតិ បានប្រាប់វិទ្យុបារាំងអន្តរជាតិនៅថ្ងៃសៅរ៍នេះថា ការប្រគល់តំណែងអនុប្រធានសភាមួយ ប្រធានគណៈកម្មការ៤ និងអនុប្រធានគណៈកម្មការ៥ ដូចដែលគណបក្សប្រជាជនកម្ពុជាអះអាងនោះ មិនគ្រប់គ្រាន់ទេ តែទាល់តែគណបក្សសង្គ្រោះជាតិទទួលបានតំណែងប្រធានរដ្ឋសភា និងតួនាទីភាគច្រើនក្នុងគណៈអចិន្ត្រៃយ៍ទើបមានតុល្យភាព។
លោកសម រង្ស៊ី បានសង្កត់ធ្ងន់ទៀតថា ប្រសិនបើគណបក្សប្រជាជនជាអ្នកគ្រប់គ្រងរដ្ឋាភិបាលផង គ្រប់គ្រងសភាផង និងប្រព័ន្ធតុលាការផងដូចមុនដដែលនោះ គណបក្សសង្គ្រោះជាតិនឹងមិនចូលប្រថាប់ត្រាឲ្យគណបក្សនេះទៀតឡើយ។ ប៉ុន្តែ គណបក្សប្រជាជនកម្ពុជាបានបញ្ជាក់ជំហររួចហើយថា ខ្លួនមិនអាចប្រគល់តំណែងប្រធានសភាឲ្យគណបក្សសង្គ្រោះជាតិបានទេ។
នៅក្នុងកិច្ចប្រជុំគណៈរដ្ឋមន្ត្រីលើកដំបូង កាលពីថ្ងៃពុធ លោកនាយករដ្ឋមន្ត្រី ហ៊ុន សែន បានបញ្ជាក់យ៉ាងដាច់ណាត់ថា គ្មានប្រទេសណាមួយនៅលើលោកនេះ អាចប្រគល់តំណែងប្រធានសភាទៅឲ្យគណបក្សដែលមានសំឡេងភាគតិចនោះឡើយ។ ម្យ៉ាងទៀត បើតាមលោកនាយករដ្ឋមន្ត្រី ហ៊ុន សែន រដ្ឋសភា និងរដ្ឋាភិបាលនឹងជាប់គាំងប្រសិនបើគេប្រគល់តំណែងប្រធានរដ្ឋសភាទៅឲ្យគណបក្សប្រឆាំង ពីព្រោះប្រធានសភាមានសិទ្ធិបដិសេធមិនលើកយកសេចក្តីព្រាងច្បាប់ណាមួយ មកជជែកនៅក្នុងសភា។
ប៉ុន្តែ លោកសម រង្ស៊ី មិនបានចាត់ទុកគណបក្សសង្គ្រោះជាតិជាគណបក្សដែលមានសំឡេងភាគតិចទេ ពីព្រោះលោកចោទគណបក្សប្រជាជន ថាបានលួចបន្លំសន្លឹកឆ្នោត។ ការទាមទារយកតំណែងប្រធានសភាក៏មិនមែនជាលក្ខខណ្ឌតែមួយគត់របស់បក្សប្រឆាំងដែរ។ គណបក្សនេះក៏នៅតែរក្សាជំហរទាមទាររកយុត្តិធម៌ជូនម្ចាស់ឆ្នោតដដែល។ គណបក្សសង្គ្រោះជាតិនៅតែបញ្ជាក់ជំហរយ៉ាងម៉ឺងម៉ាត់ និងបន្តដាក់សម្ពាធទៅលើគណបក្សកាន់អំណាច តាមរយៈការប្រើប្រាស់កម្លាំងមហាជន។ នៅក្នុងកិច្ចប្រជុំគណៈអចិន្ត្រៃយ៍របស់ខ្លួន កាលពីល្ងាចថ្ងៃសុក្រទី២៧ កញ្ញា ម្សិលមិញ គណបក្សសង្គ្រោះជាតិបានសម្រេចថា នឹងធ្វើមហាបាតុកម្ម ឬកូដកម្មទូទាំងប្រទេស នៅក្រោយបុណ្យភ្ជុំបិណ្ឌនេះ ប្រសិនបើការទាមទាររបស់ខ្លួនមិនបានសម្រេចផលទេ៕
(កិច្ចសម្ភាសន៍ទាំងស្រុងជាមួយលោក សម រង្ស៊ី នឹងមានផ្សាយជូនល្ងាចនេះ)
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ