ចំណុចខ្លាំង-ខ្សោយរបស់បក្សនយោបាយនិងអ្នកបោះឆ្នោត
មុនការបោះឆ្នោតជាតិជាង២ខែ អ្នកស្រាវជ្រាវសង្គមនយោបាយនៅក្នុងប្រទេសកម្ពុជាធ្វើអត្ថាធិប្បាយ ទៅលើចំណុចខ្លាំង និងចំណុចខ្សោយរបស់គណបក្សនយោបាយ និងអ្នកបោះឆ្នោត។ អ្នកបោះឆ្នោតខ្មែរមួយចំនួន ត្រូវបានគេមើលឃើញថា សម្រេចចិត្តបោះឆ្នោតដោយខ្វះការពិចារណាច្បាស់លាស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
លោក កែម ឡី អ្នកស្រាវជ្រាវសង្គមនយោបាយឯករាជ្យនៅក្នុងប្រទេសកម្ពុជា បានអត្ថាធិប្បាយ នៅថ្ងៃអាទិត្យនេះថា ទាំងអ្នកបោះឆ្នោត ទាំងគណបក្សប្រឆាំង ទាំងគណបក្សកាន់អំណាច មានចំណុចខ្លាំង និងចំណុចខ្សោយរៀងៗខ្លួន សម្រាប់ការបោះឆ្នោតជ្រើសរើសតំណាងរាស្រ្ត នៅខែកក្កដាខាងមុខនេះ។
លោក កែម ឡី បានលើកឡើងថា គណបក្សប្រជាជនកម្ពុជាបានបង្ហាញសារនយោបាយ និងចំណុចខ្លាំងមួយចំនួន ក្នុងនោះមាន៖ ការបែងចែកដីធ្លីជូនប្រជាពលរដ្ឋ ការកែទម្រង់នយោបាយឡូតិ៍នេសាទ គោលនយោបាយមិនយកពន្ធលើដីកសិកម្ម នយោបាយនាំចេញអង្ករ១លានតោននៅឆ្នាំ២០១៥ គោលនយោបាយគាំពារជនក្រីក្រ គោលនយោបាយពង្រីកសេវាមីក្រូហិរញ្ញវត្ថុ។ល។
បើទោះបីជាគណបក្សកាន់អំណាចបានបង្ហាញគោលនយោបាយយ៉ាងនេះក៏ដោយក្តី ក៏លោក កែម ឡី បានកត់សម្គាល់ថា គណបក្សប្រជាជនកម្ពុជាមានគោលនយោបាយល្អមែន ប៉ុន្តែយន្តការនៃការអនុវត្តន៍គោលនយោបាយទាំងនោះនៅមានបញ្ហានៅឡើយ។ ហើយនេះគឺជាចំណុចខ្សោយរបស់គណបក្សកាន់អំណាច។
ងាកមកនិយាយពីគណបក្សប្រឆាំងសង្រ្គោះជាតិឯណេះវិញ លោក កែម ឡី បានបញ្ជាក់ថា គណបក្សនេះបានបង្ហាញសារនយោយគួរអោយចាប់អារម្មណ៍ទាក់ទងទៅនឹងបញ្ហាសង្គមកិច្ចមួយចំនួន ក្នុងនោះមាន ៖ ការដំឡើងប្រាក់ខែជូនកម្មករ មន្ត្រីរាជការ ការផ្តល់សេវាសុខភាពជូនប្រជាពលរដ្ឋមិនគិតប្រាក់ ការកំណត់តម្លៃសេវាកម្មសាធារណៈទាបជាដើម។ ប៉ុន្តែ បើទោះបីជាយ៉ាងនេះក្តី ក៏លោក កែម ឡី បានបន្តទៀតថា គណបក្សប្រឆាំងនៅមានចំណុចកង្វះខាតមួយចំនួន ដូចជាកង្វះខាតធនធានមនុស្ស និងកង្វះខាតយុទ្ធសាស្រ្តថ្មីៗទាក់ទងទៅនឹងការស្វែងរកសន្លឹកឆ្នោតជាដើម។
សម្រាប់អ្នកបោះឆ្នោតវិញ លោក កែម ឡី បានរិះគន់ថា ប្រជាពលរដ្ឋខ្មែរមួយចំនួននៅបន្តបោះឆ្នោតតាមការសម្រេចចិត្តរបស់មេគ្រួសារ។ អ្នកបោះឆ្នោតមួយចំនួនមិនចេះវាយតម្លៃគណបក្សនយោបាយអោយបានត្រឹមត្រូវ។ អ្នកបោះឆ្នោតមិនតាមដានព័ត៌មាន ដើម្បីធ្វើការសម្រេចចិត្តអោយត្រឹមត្រូវ។ និយាយជារួម អ្នកបោះឆ្នោតខ្មែរមួយចំនួនបោះឆ្នោតដោយខ្វះការពិចារណាគ្រប់ជ្រុងជ្រោយ។
លោក ហង្ស ពុទ្ធា នាយកប្រតិបត្តិនៃអង្គការសង្កេតការណ៍បោះឆ្នោត Nifec កត់សម្គាល់ឃើញថា ប្រជាពលរដ្ឋខ្មែរមួយចំនួននៅបន្តបោះឆ្នោតតាមសមាជិកគ្រួសារដដែល។ ហើយអ្វីដែលជាការកត់សម្គាល់សម្រាប់ការបោះឆ្នោតនៅឆ្នាំនេះ គឺឪពុកម្តាយមួយចំនួនលែងមានឥទ្ធិពលលើកូនចៅទៀតហើយ។ ផ្ទុយទៅវិញ កូនចៅដែលជាបញ្ញាវន្តចាប់ផ្តើមមានឥទ្ធិពលលើការសម្រេចចិត្តរបស់ឪពុកម្តាយវិញ សម្រាប់ការបោះឆ្នោតនៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ