ទស្សនកិច្ចលើកដំបូងរបស់លោក ពូទីន ក្នុងអាណត្តិថ្មី គឺទៅទិសខាងលិច
តាំងពីគាត់ឡើងកាន់តំណែង ជាប្រធានាធិបតីរុស្ស៊ីវិញ បីសប្តាហ៍មុនម៉្លេះ ទើបថ្ងៃនេះ ដែលលោក ពូទីន ផ្តើមទស្សនកិច្ចខ្លួននៅបរទេស។ ហើយប្រទេសទី១ ជាអាទិភាពនៃទស្សនកិច្ចនេះ គឺបេឡារុស ជាសម្ព័ន្ធមិត្តដ៏ជំនិតរបស់រុស្ស៊ី ក្នុងលំហអតីតសហភាពសូវៀត។ បន្ទាប់មក គាត់នឹងបន្តដំណើរទៅកាន់ប្រទេសអាល្លឺម៉ង់ និងបារាំង ជាដៃគូចម្បងរបស់រុស្ស៊ី នៅសហភាពអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
ជាលទ្ធផលទស្សនកិច្ច នៅក្រុង Minsk លោកប្រធានាធិបតីពូទីននឹងចុះហត្ថលេខា ជាមួយសមភាគីបេឡារុស គឺលោក Loukachenko លើ “សេចក្តីថ្លែងការណ៍រួម” ដែលបញ្ជាក់ពីការតាំងចិត្តដូចគ្នារបស់ប្រទេសទាំងពីរ ឆ្ពោះទៅស៊ីជម្រៅថែមទៀត សមាហរ័ណកម្ម និង សហប្រតិបត្តិការ លើគ្រប់វិស័យ។ ព័ត៌មាននេះ ត្រូវបានប្រកាសទៅពួកអ្នកកាសែត ដោយជំនួយការរបស់ប្រមុខរដ្ឋរុស្ស៊ី លោក Youri Ouchakov ដែលធ្លាប់ធ្វើជាឯកអគ្គរដ្ឋទូតរុស្ស៊ីនៅ ស.រ.អា. អស់ប្រមាណ ១០ឆ្នាំ។
តាមតំណាងនេះនៃវិមានក្រេមឡាំង ការដែលលោក ពូទីន ជ្រើសយកបេឡារុស ជាដំណាក់ទី១ នៃទស្សនកិច្ចរបស់គាត់ គឺសឲ្យឃើញពីលក្ខណៈពិសេសនៃសហប្រតិបត្តិការពហុវិស័យ ជាសម្ព័ន្ធមិត្តនឹងគ្នារវាងរុស្ស៊ី និង បេឡារុស។ គួររម្លឹកថា គឺតាំងពីឆ្នាំ ១៩៩៥មក ដែលទីក្រុង Minsk និង Moscou ដាក់ទិសច្របាច់ប្រទេសខ្លួនជាពូជស្លាវដូចគ្នាឲ្យចូលគ្នាជា “រដ្ឋសហភាពរុស្ស៊ី-បេឡារុស”។
ជាការកត់សម្គាល់ ទោះបីបស្ចិមលោក តែងទិតៀនរបបលោកប្រធានាធិបតី Loukachenko ជារបបផ្តាច់ការ ដែលនៅសល់តែមួយគត់នៅទ្វីបអឺរ៉ុប និងថែមទាំងដាក់ទណ្ឌកម្មនយោបាយទល់នឹងពួកមន្ត្រីជាន់ថ្នាក់ខ្ពស់ៗ ប្រមាណ២០០នាក់នៃរបបនេះ ទាំងហាមមិនឲ្យគេធ្វើដំណើរចូលបណ្តាប្រទេសសហភាពអឺរ៉ុបក្តី ក៏បេឡារុសមានន័យយុទ្ធសាស្ត្រសំខាន់ណាស់ ជារបងការពារប្រទេសរុស្ស៊ី នៅទិសខាងលិច ដោយរុស្ស៊ីមានទីតាំងយោធាប្រចាំការនៅទីនោះយ៉ាងមាំមួន។
បន្ទាប់ពីបេឡារុស ថ្ងៃស្អែកទី១មិថុនា លោកពូទីន នឹងបន្តដំណើរទៅកាន់ក្រុង Berlin ដើម្បី ជួបចរចាជាមួយលោកស្រីនាយករដ្ឋមន្ត្រីអាល្លឺម៉ង់ Angela Merkel ព្រមទាំងជួបប្រាស្រ័យ ជាមួយលោកប្រធានាធិបតីប្រទេសនេះ។ កត្តាមួយ ដែលរំលេចឲ្យឃើញថា អាល្លឺម៉ង់ជាដៃគូសេដ្ឋកិច្ចដ៏ចម្បងរបស់រុស្ស៊ី គឺការដែលរុស្ស៊ីបានសង់ និង ដាក់ឲ្យដំណើរការទៅហើយ បំពង់បង្ហូរឧស្ម័នចេញពីរុស្ស៊ី លូនតាមបាតសមុទ្របាល់ទិក ទៅដល់ប្រទេសអាល្លឺម៉ង់ផ្ទាល់ ដើម្បីបំពេញដល់តម្រូវការសេដ្ឋកិច្ចប្រទេសនេះ ដែលជាក្បាលម៉ាស៊ីននាំមុខសហភាពអឺរ៉ុប។
លុះរសៀលស្អែក ទើបលោកពូទីន អញ្ជើញទៅដល់ក្រុងប៉ារីស ដើម្បីជួបចរចាជាមួយ លោក François Hollande ជាប្រធានាធិបតីថ្មី នៃប្រទេសបារាំង។ គួរនិយាយថា រដ្ឋបុរសទាំងពីរនេះ មិនដែលជួបគ្នាដោយផ្ទាល់ម្តងណាឡើយ។ តាមដែលគេរង់ចាំ សាច់រឿងមួយក្តៅគគុកនៃជំនួបនោះ គឺលោក Hollande នឹងបញ្ចុះបញ្ចូលលោក ពូទីន ឲ្យដាក់ទណ្ឌកម្មយ៉ាងតឹងរ៉ឹងបំផុតទល់នឹងរដ្ឋាភិបាលនៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ