បណា្តញសហគមន៍ព្រៃឡង់កំពុងឃ្លាំមើលការលុបសម្បទានដីសេដ្ឋកិច្ច ក្នុងព្រៃឡង់
ប្រជាសហគមន៍នៃបណ្តាញព្រៃឡង់ ទាំង ៤ ខេត្តរួមមាន៖ ខេត្តក្រចេះ ស្ទឹងត្រែង ព្រះវិហារ និងខេត្តកំពង់ធំ និងអង្គការដែលជាមិត្តព្រៃឈើ បានប្រកាសស្វាគមន៍ដល់រដ្ឋាភិបាលកម្ពុជា ដែលបានលុបចោលក្រុមហ៊ុនសម្បទានសេដ្ឋកិច្ច ប្រមាណជាង ២០ ក្រុមហ៊ុន ក្នុងតំបន់ព្រៃឡង់។ ក៏ប៉ុន្តែសកម្មជនការពារព្រៃឡង់ នៅតែមានការព្រួយបារម្ភ ចំពោះការកាប់បំផ្លាញព្រៃឈើខុសច្បាប់ ដែលកំពុងរីករាលដាលនិងបន្តការផ្តល់សម្បទានផ្សេងទៀត ដែលបំផ្លិចបំផ្លាញនៅក្នុងតំបន់ព្រៃស្រោង។
ចុះផ្សាយនៅថ្ងៃ៖
ស្តាប់ - ០២:៥៧
សេចក្តីប្រកាសរួមរបស់បណ្តាញព្រៃឡង់ នៅថ្ងៃទី៥ ខែតុលា ឆ្នាំ២០១២ បង្ហាញថា កាលពីថៃ្ងទី២៨ខែកញ្ញាឆ្នាំ២០១២ ទីស្តីការគណៈរដ្ឋមន្រ្តី បានប្រជុំសំរេច ស្តីពី ការលុបចោលសម្បទានសេដ្ឋកិច្ចប្រមាណជាង ២០ ក្រុមហ៊ុន ក្នុងតំបន់ព្រៃឡង់។ ប៉ុន្តែមកដល់ថ្ងៃនេះ សកម្មជនព្រៃឡង់ ប្រកាសថា ក្រុមហ៊ុនសម្បទានសេដ្ឋកិច្ចក្នុងតំបន់ព្រៃឡង់ មិនទាន់ឃើញក្រុមហ៊ុនណាមួយ បានដកចេញ និងបញ្ឈប់សកម្មភាពរបស់ខ្លួននោះឡើយ។
បណ្តាញព្រៃឡង់ នៅតែបង្ហាញការព្រួយបារម្ភ ចំពោះការកាប់បំផ្លាញព្រៃឈើខុសច្បាប់ ដែលកំពុងរីករាលដាល និងបន្តការផ្តល់សម្បទានផ្សេងទៀត ដែលបំផ្លិចបំផ្លាញនៅក្នុងតំបន់ព្រៃស្រោង នៅតំបន់ព្រៃឡង់ ដែលគ្របដណ្តប់ ក្នុងខេត្តកំពង់ធំ ក្រចេះ ស្ទឹងត្រែង និងខេត្តព្រះវិហារ។
សេចក្តីប្រកាសរួម ក៏បានបង្ហាញពីឈ្មោះក្រុមហ៊ុនមួយចំនួន ដែលកំពុងធើ្វអាជីវកម្ម ក្នុងតំបន់ព្រៃឡង់ បច្ចុប្បន្ន រួមមាន៖ ក្រុមហ៊ុន C R C K Rubber Development Co., Ltd. I ( ស្រុកសណា្តន់ ខេត្តកំពង់ធំ), Heam Kok Ham Co.,Ltd ( ស្រុកសណា្តន់ ខេត្តកំពង់ធំ), Chhun Hong Rubber Better (ស្រុកសំបូរខេត្តក្រចេះ), C X P B Development (ស្រុកសំបូរ ខេត្តក្រចេះ), Timas Resources (កំពង់ធំ និងខេត្តក្រចេះ), P N T Co, Ltd (ព្រះវិហារ), Thy Nga Development and Investment Co., Ltd (កំពង់ធំ និងព្រះវិហារ), Heng You (Cambodia) Company Limited (ព្រះវិហារ), Heng Ruy (Cambodia) International Company Limited (ព្រះវិហារ), Heng Nong(Cambodia) Company Limited (ព្រះវិហារ), Teng Saravuth Campany (កំពង់ធំ), Sok Somnang Development Company។
បណា្តញសហគមន៍ព្រៃឡង់ និងមិត្តព្រៃឈើ បានសំណូមពរដល់រដា្ឋភិបាលកម្ពុជា សូមមេតា្តជួយបង្ហាញឈោ្មះក្រុមហ៊ុនពិតបា្រកដ ដែលបានសំរេចលុបចោលដីសម្បទាន ក្នុងតំបន់ព្រៃឡង់ ដើម្បីអោយសហគមន៍ព្រៃឡង់ បានចូលរួមចំណែកសហការ និងតាមដាន។
ទន្ទឹមនឹងនេះ សហគមន៍ព្រៃឡង់ ក៏សូមស្វាគមន៍ដល់សេចក្តីព្រាងអនុក្រិត្យរបស់រដ្ឋាភិបាល ដើម្បីដាក់ព្រៃឡង់ ជាតំបន់ការពាររួមគា្ន ជាមួយសហគមន៍ព្រៃឡង់ ក្នុងបំណងជំរុញឲ្យរដ្ឋាភិបាលកំណត់ព្រំប្រទល់ និងការគ្រប់គ្រងព្រៃឈើ។ សហគមន៍ព្រៃឡង់សង្ឃឹមថា រដ្ឋាភិបាល នឹងពន្លឿនដំណើរការនេះ ដើម្បីកុំឲ្យព្រៃឡង់បាត់បង់ ដោយសារតែការកាប់បំផ្លាញ ការទន្ទ្រាន និងការគំរាមកំហែងដល់ព្រៃឈើ។
សូមរម្លឹកថា ព្រៃឡង់ មានទំហំ ប្រមាណ ៣.៦០០ គីឡូម៉ែត្រក្រឡា ជាប្រភព នៃអនុផលព្រៃឈើយ៉ាងសំខាន់ សម្រាប់ប្រជាពលរដ្ឋភាគច្រើន ជាជនជាតិភាគតិចប្រមាណជាង ៦០.០០០ គ្រួសារ ក្នុងភូមិជិត ៤០០ ភូមិ ដែលស្ថិតនៅក្នុងខេត្តព្រះវិហារ កំពង់ធំ ស្ទឹងត្រែង និងក្រចេះ ដែលអ្នកខ្លះប្រកបរបរបោចវល្លិ៍ រកជ័រ និងបេះផ្លែឈើលក់ចិញ្ចឹមជីវិត។ ទន្ទឹមនឹងនេះ ព្រៃឡង់ជាជម្រកជីវសាស្ត្រចម្រុះច្រើនប្រភេទ ក៏ដូចជា ជួយទប់ស្កាត់គ្រោះធម្មជាតិ និងជួយស្រូបយកឧស្ម័នកាបូនិក ដើម្បីកាត់បន្ថយការប្រែប្រួលអាកាសធាតុទៀតផង។
កន្លងមក សកម្មជនការពារព្រៃឡង់ បានបើកយុទ្ធនាការ ជាបន្តបន្ទាប់ ចូលរុករកបទល្មើសព្រៃឈើ នៅក្នុងព្រៃឡង់ នៅខេត្តកំពង់ធំ ក្រចេះ ស្ទឹងត្រែង និងខេត្តព្រះវិហារ ដើម្បីទប់ស្កាត់បទល្មើសកាប់ឈើ ក្នុងក្រុមហ៊ុនឯកជន ដែលទទួលបានដីព្រៃសម្បទានជាច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ