ថ្នាក់ដឹកនាំរុស្ស៊ី និងឧត្ថមស្នងការសិទ្ធិមនុស្សរបស់អសបចេញមុខគាំទ្រWikileaks
តាំងពីប្រធានាធិបតីប្រេស៊ីល លោក លូឡា (Lula)រហូតដល់នាយករដ្ឋមន្រ្តីរុស្ស៊ី លោកពូទីន( Poutine) ព្រមទាំងអ្នកទទួលខុសត្រូវជាន់ខ្ពស់របស់អង្គការសហប្រជាជាតិទទួលបន្ទុកសិទ្ធិមនុស្ស ការគាំទ្របុព្វហេតុរបស់Jullian Assange ស្ថាបនិកវិបសៃត៍ Wikileaksចេះតែកើនឡើងជាលំដាប់ រហូតមកដល់ថ្ងៃព្រហស្បតិ៍ម្សិលមិញ។ ស្ថាបនិកវិបសែត៍ Wikileaksដែលកំពុងជាប់ឃុំបណ្តោះអាសន្ន នៅក្នុងគុកប្រទេសអង់គ្លេស ចាប់ផ្តើមល្បីឈ្មោះ ចាប់តាំងពីហ៊ានចេញផ្សាយឯកសារ និងកំណត់ហេតុសំងាត់របស់ការទូតអាមេរិក ក្នុងរយៈពេលប៉ុន្មានខែចុងក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
កំណត់ហេតុសំងាត់របស់ការទូតអាមេរិកចុះផ្សាយដោយ Wikileaks បានបង្ហាញថា លោកVladimir Poutine ជាមេដឹកនាំដែលបានបណ្តោយឲ្យពួកមន្រ្តីប្រព្រឹត្តអំពើពុករលួយ និងជួយពួកបណ្តាញមេក្លោងទុច្ចរិតរុស្ស៊ី។ នៅថ្ងៃព្រហស្បតិ៍ម្សិលមិញនេះ នាយករដ្ឋមន្រ្តីរុស្ស៊ីបាននិយាយវាយបកទៅវិញថា ប្រទេសលោកខាងលិចគ្មានសិទ្ធិអ្វីមកបង្រៀនរុស្ស៊ីពីលទ្ធិប្រជាធិបតេយ្យទេ។ តែបើសិនប្រទេសលោកខាងលិចពូកែខាងគោរពលទ្ធិប្រជាធិបតេយ្យមែន គេមិនត្រូវចាប់ Jullian Assange ស្ថាបនិក Wikileaks ដាក់គុកនោះទេ។ ដូចជានាយករដ្ឋមន្រ្តីរុស្ស៊ី ប្រធានាធិបតីប្រេស៊ីលដែលជិតផុតអាណត្តិ គឺលោកលូឡា បានថ្លែងកាលពីថ្ងៃម្សិលមិញថា លោកគាំទ្រការងាររបស់Jullian Assange។
ឧត្តមស្នងការសិទ្ធិមនុស្សរបស់អង្គការសហប្រជាជាតិវិញ ក៏បានសំដែងការព្រួយបារម្ភរបស់ខ្លួនពីការរឹតត្បិតកាន់តែខ្លាំងទៅលើសេរីភាពព័ត៌មាន។ នោះគឺក្រៅតែពីស្ថាបនិកត្រូវគេចាប់ដាក់ឃុំ វិបសៃត៍ Wikileaksក៏កំពុងរងគំនាបខ្លាំងពីខាងក្រុមហ៊ុនឯកជនមួយចំនួនដែរ។ ក្រុមហ៊ុនទាំងនោះ ដូចជា Master Card ឬPaypalជាដើម ដែលធ្លាប់តែផ្តល់សេវាទូទាត់ប្រាក់ជាមួយ Wikileaksបានសម្រេចបញ្ឈប់ លែងផ្តល់សេវាជួយបញ្ជូនលុយពីម្ចាស់អំណោយមួយចំនួនទៅឲ្យអ្នកបង្កើត Wikileaks។ ជាលទ្ធផល នៅពេលនេះ វិបសែត៍ Wikileaksកំពុងជួបវិបត្តិហិរញ្ញវត្ថុខ្លាំង។ ក្រៅតែពីមានការវាយប្រហារមកលើប្រព័ន្ធអ៊ិនធ័រណេតរបស់ខ្លួន Wikileaks ដែលមានស្ថាបនិកកំពុងជាប់ឃុំ នៅប្រទេសអង់គ្លេស កំពុងជួបវិបត្តិហិរញ្ញវត្ថុយ៉ាងខ្លាំង។
ទោះជាលែងមានការជួយពីខាងក្រុមហ៊ុនផ្គត់ផ្គង់អ៊ិនធ័រណេត និងពួកធនាគារ Wikileaksមិនបានឯកោរទេ។ ចំនួនអ្នកគាំទ្រ Wikileaksមានកាន់តែច្រើនឡើងៗ។ អ្នកប្រើប្រាស់អ៊ិនធ័រណេតមួយចំនួន ដែលមានជំនាញខាងព័ត៌មានវិទ្យាបានធ្វើការសងសឹកជំនួសលោកJullian Assange ដោយបានវាយប្រហារទៅលើប្រព័ន្ធអ៊ិនធ័រណេតរបស់ប្រព័ន្ធទូទាត់ប្រាក់ ដូចជា Master Card និងPaypal ពោលគឺក្រុមហ៊ុនទាំងឡាយណាដែលពួកគេចាត់ទុកជាសត្រូវរបស់ Wikileaks។
នៅថ្ងៃសុក្រនេះដែរ ប្រជាជនអូស្ត្រាលីរាប់រយនាក់បានដើរធ្វើការតវ៉ា នៅតាមផ្លូវ និងបាននាំគ្នាផ្តិតមេដៃដើម្បីឲ្យរដ្ឋាភិបាលរបស់ខ្លួនអន្តរាគមជួយលោក Assangeដែលមានសញ្ជាតិអូស្ត្រាលី។ រដ្ឋមន្រ្តីការបរទេសអូស្ត្រាលីបញ្ជាក់ថា គេនឹងជួយផ្នែកផ្លូវច្បាប់ដល់ស្ថាបនិករបស់Wikileaksនៅចំពោះមុខច្បាប់ប្រទេសស៊ុយអេដ។ អូស្រ្តាលីមិនបានបញ្ចេញប្រតិកម្មច្រើនជាងនេះ។ កន្លងមក នាយករដ្ឋមន្រ្តីអូស្ត្រាលីធ្លាប់បានចាត់ទុកការចេញផ្សាយឯកសារសំងាត់ដោយWikileaksថា ជាការមិនទទួលខុសត្រូវមួយ ពីព្រោះការផ្សាយបញ្ចេញឈ្មោះក្នុងឯកសារដោយWikileaksអាចធ្វើឲ្យប៉ះពាល់ដល់សុវត្ថិភាពរបស់ប្រភពដែលបានធ្វើការងារជាមួយកងទ័ពសម្ព័ន្ធមិត្ត នៅអាហ្វហ្កានិស្តង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ