ទំនាក់ទំនងរវាងចិននិងប៉ាគីស្ថានផ្អែមជាងទឹកឃ្មុំ
“ទំនាក់ទំនងរវាងចិននិងប៉ាគីស្ថានមានរសជាតិផ្អែមជាងទឹកឃ្មុំទៅទៀត” នេះជាការវាយតំលៃរបស់នាយករដ្ឋមន្ត្រីប៉ាគីស្ថាន លោក Nawaz Sharif នៅថ្ងៃសុក្រនេះ លើទំនាក់ទំនងរវាងប្រទេសទាំងពីរ។ នាយករដ្ឋមន្ត្រីប៉ាគីស្ថានបានបំពេញទស្សនកិច្ចនៅប្រទេសចិន ជួបសំណេះសំណាលជាមួយនាយករដ្ឋមន្ត្រីចិន លោក លី ខឺឈាំង។ ក្នុងដំណើរទស្សនកិច្ចនេះ ភាគីចិននិងប៉ាគីស្ថានបានចុះហត្ថលេខាលើកិច្ចព្រមព្រៀងសេដ្ឋកិច្ចជាច្រើន។ ទំនាក់ទំនងពាណិជ្ជកម្មរវាងប្រទេសទាំងពីរក្នុងឆ្នាំ២០១២កន្លងមក មានជាទឹកប្រាក់ប្រមាណ១២ពាន់លានដុល្លារ ហើយនឹងអាចកើនដល់១៥ពាន់លានដុល្លារ ក្នុងរយៈពេលពីរឆ្នាំខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
នេះជាលើកទីមួយហើយ ដែលលោក Nawaz Sharif បានបំពេញទស្សនកិច្ចនៅក្រុងប៉េកាំង តាំងតែពីលោកបានជាប់ឆ្នោតជានាយករដ្ឋមន្ត្រីប៉ាគីស្ថាន ក្នុងខែឧសភាកន្លងមក។
នៅថ្ងៃសុក្រនេះ ការដែលលោក Nawaz Sharif បានវាយតំលៃថា ទំនាក់ទំនងរវាងចិននិងប៉ាគីស្ថានមានឱជារសផ្អែមលើសពីទឹកឃ្មុំនោះ គ្មានអ្វីគួរអោយងឿងឆ្ងល់នោះទេ។ ប៉ាគីស្ថានជាដៃគូការទូតនិងយោធាដ៏ជិតដិតរបស់ចិន។ ប៉ាគីស្ថានចង់អោយចិនគាំទ្រហេដ្ឋារចនាសម្ព័ន្ធ របស់ខ្លួន ដើម្បីស្វែងរកដំណោះស្រាយបញ្ហាសេដ្ឋកិច្ចជាតិ។ ចិនបានចូលរួមជួសជុលផ្លូវដ៏សំខាន់មួយឈ្មោះ Karakoram ដែលការជួសជុលនេះស្ថិតក្នុងគំរោងតំបន់ពាណិជ្ជកម្មរវាងប្រទេសទាំងពីរ។ ឆ្នាំ២០១៣នេះ ចិនបានកាន់កាប់កំពង់ផែGwada របស់ប៉ាគីស្ថាន។ ការកាន់កាប់នេះធ្វើអោយចិនអាចចូលខ្លួនទៅដល់សមុទ្រអារ៉ាប៊ី និងដៃសមុទ្រOrmuzដែលទីនោះ ជាកន្លែងសេវាដឹកជញ្ជូនប្រេងពិភពលោក។
ក្នុងឱកាសទស្សនកិច្ចរបស់នាយករដ្ឋមន្ត្រីប៉ាគីស្ថាននេះ ភាគីប៉ាគីស្ថាននិងភាគីចិនបានចុះហត្ថលេខាលើកិច្ចព្រមព្រៀងជាច្រើនដែលក្នុងនោះគេឃើញមានកិច្ចព្រមព្រៀងទាក់ទងតំបន់សេដ្ឋកិច្ច ការការពារជំងឺស្វិតដៃជើង និងបច្ចេកទេសផ្សេងៗទៀត។ ភាគីទាំងពីរក៏បានសន្យាសហការគ្នាក្នុងគំរោងទឹកប្រាក់៤៤លានដុល្លារ ដាក់ដំឡើងប្រព័ន្ធទំនាក់ទំនងតាមខ្សែកាបអុបទិក នៅរ៉ាវ៉ាល់ពិនឌី ដែលជាព្រំប្រទល់រវាងប្រទេសទាំងពីរ។
ដោយឡែក នាយករដ្ឋមន្ត្រីប៉ាគីស្ថាននិងនាយករដ្ឋមន្ត្រីចិនក៏ត្រូវលើកយកបញ្ហាទាក់ទងការគំរាមកំហែងភេរវកម្មមកពិភាក្សាគ្នាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ