Reporter sans frontière បរិហារពីការធ្លាក់ចុះសេរីភាពសារព័ត៌មានក្នុងឆ្នាំ ២០១៥
ក៏ដូចជារៀងរាល់ឆ្នាំ អង្គការអ្នកយកការណ៍គ្មានព្រំដែន Reporter sans frontière (RSF) តែងចេញផ្សាយរបាយការណ៍ស្តីពីសេរីភាពសារព័ត៌មានក្នុងលោក។ របាយការណ៍ស្តីពីសេរីភាពសារព័ត៌មានប្រចាំឆ្នាំ ២០១៥ ដែល RSF បានចេញផ្សាយក្នុងថ្ងៃពុធ ទី២០ មេសានេះឲ្យដឹងថា មានការធ្លាក់ចុះនៅគ្រប់ទ្វីបទូទាំងពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
តាំងពីឆ្នាំ ២០០២ មកម្ល៉េះដែលអង្គការអ្នកយកការណ៍គ្មានព្រំដែន Reporter sans frontière (RSF) បានចាប់ផ្តើមធ្វើចំណាត់ថ្នាក់ស្តីពីសេរីភាពសារព័ត៌មាននៅក្នុង ១៨០ប្រទេសក្នុងលោក។ ជាទូទៅ ចំណាត់ថ្នាក់ស្តីពីសេរីភាពសារព័ត៌មាននៅក្នុងទ្វីប តំបន់ ឬមួយក៏ប្រទេសនីមួយៗមានការប្រែប្រួលក្នុងទិសដៅវិជ្ជមាន ឬអវិជ្ជមានពីមួយឆ្នាំ ទៅមួយឆ្នាំ។
សេរីភាពសារព័ត៌មានសម្រាប់ឆ្នាំ ២០១៥ កន្លងទៅត្រូវបាន Reporter sans frontière កត់សម្គាល់ឃើញថា មានការធ្លាក់ចុះនៅគ្រប់ទ្វីបទូទាំងពិភពលោក ពិសេសទ្វីបអាមេរិកដែលមានឃាតកម្មសម្លាប់អ្នកការសែតនៅអាមេរិកកណ្តាល។ សម្រាប់ឆ្នាំ ២០១៥ ចំណាត់ថ្នាក់សេរីភាពសារព័ត៌មាននៅទ្វីបអាមេរិកស្ថិតក្រោមទ្វីបអាហ្រ្វិក។ នៅអាមេរិកឡាទីន អំពើហិង្សាស្ថាប័ន ឧក្រិដ្ឋកម្មរៀបចំទុកជាមុន និទណ្ឌភាព និងអំពើពុករលួយ គឺជាឧបសគ្គលើសេរីភាពសារព័ត៌មាន។ នៅអាមេរិក ក៏ដូចជានៅកាណាដា សេរីភាពសារព័ត៌មានបានធ្លាក់ចុះក្នុងឆ្នាំ ២០១៥។
ការប្រកបអាជីពជាអ្នកកាសែតនៅក្នុងបណ្តាប្រទេសដែលកំពុងមានវិបត្តិ ដូចយ៉ាងនៅអ៊ីរ៉ាក់ លីប៊ី ស៊ីរី ឬមួយក៏ប្រទេសយេម៉ែន គឺពោរពេញដោយគ្រោះថ្នាក់ខ្លាំងណាស់។ អ្វីជាការកត់សម្គាល់នៅក្នុងរបាយការណ៍ឆ្នាំ ២០១៥ ក្រុមប្រទេសដែលស្ថិតចុងប៉ូចនៅតែដដែលដូចឆ្នាំ ២០១៤ គឺចិនស្ថិតចំណាត់ថ្នាក់ទី ១៧៦ ស៊ីរីទី ១៧៧ តួកម៉េនីស្ថានទី ១៧៨ កូរ៉េខាងជើងទី ១៧៩ និងទី ១៨០ សម្រាប់ប្រទេសអេរីត្រេ។ ចំណែកសិស្សល្អនៅតែល្អ គឺហ្វាំងឡង់ដែលបន្តរក្សាចំណាត់ថ្នាក់ទី ១ រយៈពេល ៦ឆ្នាំជាប់គ្នាជាប្រទេសដែលអ្នកកាសែតអាចប្រកបអាជីពរបស់ខ្លួនដោយគ្មានការភ័យខ្លាច។ ចំណាត់ថ្នាក់ទី ២ គឺប្រទេសហូឡង់ និងប្រទេសន័រវែសស្ថិតចំណាត់ថ្នាក់ទី ៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ