ទីបំផុតរឿង"នរណាសម្លាប់ ជា វិជ្ជា?" បានត្រឹមបញ្ចំាងអោយអ្នកកាសែតមើល
បន្ទាប់ពីសមត្ថកិច្ចហាមមិនអោយបញ្ចាំង វីដេអូ ឯកសារ រឿង “នរណាសម្លាប់ ជា វិជ្ជា” ជាសាធារណៈមក។ នៅព្រឹកមិញនេះ លោក រ៉ុង ឈុន សម្រេចបញ្ចាំង រឿងនេះ ក្នុងការិយាល័យរបស់លោក ដោយមានតែ អ្នកកាសែត ជាង ២០នាក់ប៉ុណ្ណោះចូលទស្សនា។ ប៉ុន្តែ លោក រ៉ុង ឈុន គ្រោងចម្លងឯកសារនេះចែកចាយដល់មហាជន ក្នុងពេលខាងមុខនេះ។ ចំណែក អ្នកនាំពាក្យក្រសួងមហាផ្ទៃបញ្ជាក់ថា លោក រ៉ុង ឈុន តែងតែចចេស ជាមួយសមត្ថកិច្ច។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់អ៊ឺម ណាវិនពីទីក្រុងភ្នំពេញ
“កូនស្រីរបស់ខ្ញុំនៅតែសួរថា ប៉ា គាត់គេងយូរម្ល៉េះ? ប្តីរបស់ខ្ញុំ គាត់ធ្លាប់បានសន្យាថា មិនអោយកូនៗគ្មានឪពុកម្តាយនោះទេ។ ប៉ុន្តែ ពេលនេះ កូនខ្ញុំក្លាយជាអ្នកគ្មានឪពុក។” នេះជាសម្តីរបស់អ្នកស្រី ជា គីមនី ភរិយាសព លោក ជា វិជ្ជា នៅក្នុងឈុតដំបូងនៃកម្រងខ្សែវីដេអូ មានចំណងជើងថា “នរណាសម្លាប់ជា វិជ្ជា?”
កម្រងឯកសារ “នរណាសម្លាប់ ជា វិជ្ជា” មានរយៈពេលជិតមួយម៉ោង។ អ្នកចងក្រងឯកសារ នេះជាជនជាតិអាមេរិកំាង ឈ្មោះ Bradley Cox ។ លោក Cox បានចុះផ្តិតរូបភាព ចាប់តំាង ពីពេលថ្ងៃដែលឃាតករបានបាញ់សម្លាប់លោក ជា វិជ្ជា ភ្លាមៗ ពិធីបុណ្យសពលោក ជា វិជ្ជា និងកិច្ចសម្ភាសន៍ជាមួយ ជនពាក់ព័ន្ធជាច្រើននាក់។
កម្រងឯកសារ “នរណាសម្លាប់ លោក ជា វិជ្ជា” នេះហើយដែលសមត្ថកិច្ចក្រុងភ្នំពេញមិនអនុញ្ញាតអោយលោក រ៉ុង ឈុន ប្រធានសមាគមគ្រូបង្រៀនឯករាជ្យ ដាក់បញ្ចាំង នៅទីសាធារណៈ ចំនួនពីរលើកកន្លងមក។
នៅព្រឹកថ្ងៃព្រហស្បតិ៍នេះ លោក រ៉ុង ឈុន សម្រេចចិត្តដាក់បញ្ចំាង កម្រងឯកសារនេះ នៅក្នុងការិយាល័យរបស់លោក ដោយមានតែអ្នកសារព័ត៌មានប្រមាណជាង ២០នាក់ប៉ុណ្ណោះ ចូលទស្សនា។
លោក រ៉ុង ឈុន បានថ្លែងថា កម្រងឯកសារ “នរណាសម្លាប់ ជា វិជ្ជា” ជាភស្តុតាងមួយដែលបង្ហាញអោយមហាជនដឹងថា “នរណាជាអ្នកសម្លាប់ លោក ជា វិជ្ជា ពិតប្រាកដ។ អ្នកសម្លាប់ ជា វិជ្ជា មិនមែនជា ប៊ន សំណាង ឬ សុខ សំអឿននោះទេ។ លោក រ៉ុង ឈុន អះអាងដែរថា លោកនឹងថតចម្លងកម្រងឯកសារនេះចែកចាយដល់មហាជនអោយបានទស្សនា ក្នុងពេលឆាប់ៗនេះ។
លោក ជា វិជ្ជា ជាអតីតប្រធានសហជីពសេរីកម្មករកម្ពុជា ត្រូវបានឃាតករបាញ់សម្លាប់ ក្នុងខែ មករា ឆ្នាំ២០០៤។
បន្ទាប់ពីបាញ់សម្លាប់ លោក ជា វិជ្ជា មិនយូរប៉ុន្មាន បុរសពីរនាក់ត្រូវបានចាប់ខ្លួន និងចោទថា ជាឃាតករបាញ់លោក ជា វិជ្ជា។ ជនជាប់ចោទទំាងពីរ គឺ លោក ប៊ន សំណាង និង លោក សុខសំអឿន។ ជនទំាងពីរនាក់នេះត្រូវបានតុលាការកាត់ទោសអោយជាប់ពន្ឋនាគារម្នាក់ៗ ២០ឆ្នាំ ប៉ុន្តែ ត្រូវតុលាការកំពូលដោះលែងអោយនៅក្រៅឃុំបណ្តោះអាសន្ន កាលពីឆ្នាំ ២០០៨វិញ។
លោកឧត្តមសេនីយ៍ ខៀវ សុភ័ក្រ អ្នកនាំពាក្យក្រសួងមហាផ្ទៃបានហៅសកម្មភាពរបស់លោក រ៉ុង ឈុន ថា តែងតែចចេសជាមួយសមត្ថកិច្ច។ លោកឧត្តមសេនីយ៍បញ្ជាក់ថា សំណុំរឿងបាញ់សម្លាប់ប្រធានសហជីពសេរីកម្មករកម្ពុជា លោកជា វិជ្ជា នគរបាលយុត្តិធម៌ បានធ្វើការងារតាមនីតិវិធី ហើយការសម្រេចយ៉ាងណាទៀត ជាអំណាចរបស់តុលាការ។
ប៉ុន្តែ ចុងបញ្ចប់សាច់រឿង “នរណាសម្លាប់ ជា វិជ្ជា” លោកស្រី ជា គីមនី ភរិយាសពលោក ជា វិជ្ជា ដែលកំពុងរស់នៅ ក្នុងប្រទេសហ្វាំងឡង់ បាននិយាយថា លោកស្រីតែងតែឆ្លើយសំនួរ កូនស្រី របស់លោកស្រីថា មូលហេតុដែលគេសម្លាប់ប៉ា ដោយសារតែប្រទេសយើងគ្មានច្បាប់ទម្លាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ