កូរ៉េខាងត្បូងនិងអាមេរិកធ្វើសមយុទ្ធ ចំថ្ងៃគ្រួសារកូរ៉េទាំងពីរជួបគ្នា
កូរ៉េខាងត្បូង និងអាមេរិក បាននិយាយនៅថ្ងៃចន្ទនេះថា ពួកគេនឹងចាប់ផ្តើមសមយុទ្ធយោធារួមគ្នា នៅថ្ងៃទី ២៤កុម្ភៈខាងមុខ។ ជាពេលវេលា ដែលស្របគ្នា ទៅនឹងគម្រោង ដែលកូរ៉េខាងជើង និងកូរ៉េខាងត្បូង គ្រោងរៀបចំ អោយមានជំនួបសមាជិកគ្រួសារកូរ៉េទាំងពីរ ដែលបានបែកបាក់គ្នា ដោយសង្គ្រាមកូរ៉េ កំឡុងដើមទស្សវត្សរ៥០នោះ។ ប៉ុន្តែ ទីក្រុងព្យុងយ៉ាង បានគម្រាមជាស្រេចថា នឹងលុបចោលគម្រោងនេះ ប្រសិនបើមានការធ្វើសមយុទ្ធ រវាងកូរ៉េខាងត្បូង និងអាមេរិក មែននោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
កូរ៉េខាងត្បូង និងអាមេរិក បានចេញសេចក្តីប្រកាស ក៏ដូចជាបានព្រមព្រៀងគ្នាហើយថា ពួកគេនឹងចាប់ផ្តើមសមយុទ្ធយោធារួមគ្នាមួយ នៅថ្ងៃទី២៤កុម្ភៈខាងមុខ។ ជាពេលវេលា ដែលជាន់ទៅនឹងថ្ងៃនៃការធ្វើពិធីជួបជុំក្រុមគ្រួសារកូរ៉េទាំងពីរ ដែលបានបែកបាក់ ដោយសារសង្គ្រាម កំឡុងដើមទស្សវត្ស៥០។ ពិធីជួបជុំគ្រួសារកូរ៉េនោះ គឺនឹងត្រូវធ្វើ ពីថ្ងៃទី២០ ដល់ថ្ងៃទី២៥កុម្ភៈ នៅទឹកដីកូរ៉េខាងជើង។
ចំពោះ ការធ្វើសមយុទ្ធប្រចាំឆ្នាំ ដែលមានឈ្មោះថា Key Resolve" និង "Foal Eagle» រវាងកូរ៉េខាងត្បូង និងអាមេរិក នឹងត្រូវចាប់ផ្តើម ពីថ្ងៃទី២៤កុម្ភៈ ហើយបញ្ចប់នៅថ្ងៃទី ១៨មេសា។ វាជាសមយុទ្ធទ្វេភាគី ដែលមានទាហានអាមេរិកចូលរួមសរុប ១២.៧០០នាក់។
សមយុទ្ធយោធានេះផងដែរ ក៏ត្រូវបានធ្វើឡើង ដោយហាក់ដូចជា មិនបានខ្វល់ទៅនឹងការព្រមាន របស់កូរ៉េខាងជើងនោះឡើយ។ កូរ៉េខាងជើង ដែលកាលពីពេលថ្មីៗនេះ បានអំពាវនាវ ដល់រដ្ឋាភិបាលក្រុងសេអ៊ូល និងវ៉ាស៊ីនតោន អោយលុបចោលសមយុទ្ធប្រចាំឆ្នាំនេះ។ លើសតែពីការអំពាវនាវ កូរ៉េខាងជើង ក្រោមការដឹកនាំ ដោយមេដឹកនាំវ័យក្មេង គីម ជុនអ៊ុន ក៏ថែមទាំងបានព្រមានថា ប្រសិនបើអាមេរិក និងកូរ៉េខាងត្បូង មិនរអារ ហើយនៅតែផ្គើន ធ្វើសមយុទ្ធនេះ នោះពួកគេ នឹងអាចជូបនៅ "មហន្តរាយ ដែលនឹកស្មានមិនដល់" មួយ។ ទីក្រុងព្យុងយ៉ាង ជារឿយៗ តែងតែបានថ្កោលទោសថាការធ្វើសមយុទ្ធនេះ គឺជាទង្វើត្រៀមរៀបចំជើងព្រួល ក្នុងការវាយលុកចូលក្នុងទឹកដីកូរ៉េខាងជើង។
យ៉ាងណាក៏ដោយ ប្រធានាធិបតីកូរ៉េខាងត្បូង លោកស្រី ប៉ាក គុនហេ (Park Geun-Hye) បានជំរុញ ឲ្យទីក្រុងព្យុងយ៉ាង គោរពចំពោះកិច្ចព្រមព្រៀងរបស់ខ្លួន សម្រាប់ជំនួបគ្រួសារកូរ៉េទាំងពីរ ដែលព្រាត់ប្រាសគ្នាពីសម័យសង្គ្រាម ដែលគ្រួសារ អ្នកដែលបានបែកបាក់គ្នាភាគច្រើន មានវ័យកាន់តែជរា និងថែមទាំងមានសុខភាពទន់ខ្សោយទៀតផង។
គួររម្លឹកថា កាលពីថ្ងៃទី០៦កុម្ភៈកន្លងទៅ ក្រសួងការពារជាតិកូរ៉េខាងត្បូង បានបញ្ជាក់ជាថ្មីថា សមយុទ្ធនឹងត្រូវរៀបចំធ្វើដូចការគ្រោងទុក និងព្រមានថា គេមិនគួរយកគម្រោងរៀបចំជំនួបរវាងក្រុមគ្រួសារកូរ៉េ មកធ្វើជាចំណាប់ខ្មំាង ដើម្បីកេងចំណេញខាង នយោបាយឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ