ទីក្រុងប៉ារីសបន្តចែចូវទីក្រុងញូដេលី
នៅថ្ងៃសៅរ៍ ទី៤ ធ្នូ ឆ្នំា ២០១០ នេះ លោកប្រធានាធិតីបារំាងនីកូឡា សាកូហ្ស៊ីបានផ្តើមទស្សនកិច្ចរយៈពេល ៤ថ្ងៃនៅក្នុងប្រទេសឥណ្ឌា។ នៅថ្ងៃនេះ លោកសាកូហ្ស៊ីបានទៅដល់ទីក្រុងបង់ហ្កាឡ័រនៃរដ្ឋកាម៉ាតាកា ស្ថិតនៅប៉ែកខាងជើងប្រទេស។ អមដំណើរលោកសាកូហ្ស៊ី គេឃើញមានភរិយារបស់លោក រដ្ឋមន្រ្តីយ៉ាងតិច ៧រូប និងប្រធានរោងចក្រសហគ្រាសបារំាងជាច្រើនរូបទៀត។ គោលដៅនៃទស្សនកិច្ចនឹងផ្តោតសំខាន់លើវិស័យសេដ្ឋកិច្ច ជាងវិស័យនយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ គួច គន្ធារ៉ា
ជំហានទីមួយនៅថ្ងៃនេះ គឺដំណើរទៅកាន់ទីក្រុងបង់ហ្កាឡ័រនៃរដ្ឋកាម៉ាតាកា។ គឺនៅទីនោះឯងដែលលោកសាកូហ្ស៊ីអញ្ជើញទៅទស្សនាវិទ្យាស្ថានអវកាសដ៏ធំរបស់ឥណ្ឌា។ ទីក្រុងបង់ហ្កាឡ័រដែលត្រូវបានគេចាត់ទុកជាប៉ូលសេដ្ឋកិច្ច និងវិទ្យាសាស្រ្តដ៏សំខាន់មួយនៅក្នុងពិភពលោក ដូចជាមជ្ឈមណ្ឌល Silicon Valley នៅសហរដ្ឋអាមេរិក។
បន្ទាប់ពីទីក្រុងបង់ហ្កាឡ័រ លោកសាកូហ្ស៊ីនឹងធ្វើដំណើរទៅទីក្រុងអាហ្រ្កានៃរដ្ឋអ៊ុត្តារប្រាដេសដ៍ក្នុងដំណើរទស្សនកិច្ចជាផ្លូវឯកជន ដើម្បីទស្សនាវិមាន Taj Mahal ដ៏ល្បីល្បាញមួយនៅក្នុងប្រទេសឥណ្ឌា។ វិមាន Tag Mahal ដែលសង់ពីថ្មកែវពណ៌ស និងដែលត្រូវបានគេចាត់ទុកជាអច្ឆរិយវត្ថុផ្នែកស្ថាបត្យកម្មមួយនៅក្នុងពិភពលោក។
បន្ទាប់មកនៅថ្ងៃអាទិត្យ ទី៥ ធ្នូស្អែក និងថ្ងៃច័ន្ទ ទី៦ ធ្នូ លោកសាកូហ្ស៊ីនឹងអញ្ជើញទៅទីក្រុងញូដេលីដែលនៅទីនោះ លោកសាកូហ្ស៊ីនឹងទទួលឲ្យជួបសន្ទនាដោយលោកស្រីប្រធានាធិបតីឥណ្ឌា Pratibha Patil និងលោកនាយករដ្ឋមន្ត្រី Manmohan Singh។
នៅថ្ងៃអង្គារ ទី៧ ធ្នូដែលជាថ្ងៃចុងក្រោយ លោកសាកូហ្ស៊ីនឹងអញ្ជើញទៅទីក្រុងសេដ្ឋកិច្ចប៊ុមបៃដែលនៅទីនោះ លោកសាកូហ្ស៊ីនឹងចូលរួមគោរពចំពោះវិញ្ញាណក្ខ័ន្ធអ្នកដែលបានបាត់បង់ជីវិតទំាង ១៦៦នាក់នៅក្នុងអំពើភេរវកម្មកាលពីខែវិច្ឆិកា ឆ្នំា ២០០៨ ក្នុងនោះ ក៏មានពលរដ្ឋបារំាងផងដែរ។
សេដ្ឋកិច្ច សំខាន់ជាងនយោបាយ
នេះជាដំណើរទស្សនកិច្ចលើកទី២របស់លោកប្រមុខរដ្ឋបារំាងនៅក្នុងប្រទេសឥណ្ឌា និងដែលមានរយៈពេលយូររហូតដល់ទៅ ៤ថ្ងៃ។ ដំណើរទស្សនកិច្ចលើកទី១បានធ្វើឡើងកាលពីខែមករា ឆ្នំា ២០០៨ និងដែលមានរយៈពេលតែ ៣៦ម៉ោងប៉ុណ្ណោះ។
ដំណើរទស្សនកិច្ចលើកទី២របស់លោកប្រមុខរដ្ឋបារំាងលើកនេះនឹងផ្តោតជាសំខាន់នៅលើវិស័យសេដ្ឋកិច្ច ជាងនៅលើវិស័យនយោបាយ។
អាទិភាពជាដំបូងរបស់លោកសាកូហ្ស៊ី គឺផ្តល់សន្ទុះបន្ថែមឲ្យដល់ភាពជាដៃគូយុទ្ធសាស្រ្តរវាងទីក្រុងប៉ារីស និងទីក្រុងញូដេលី។ ភាពជាដៃគូយុទ្ធសាស្រ្តដែលប្រទេសទំាងពីរបានចុះហត្ថលេខាក្នុងឆ្នំា ១៩៩៨ នៅជំនាន់លោកប្រធានាធិបតីបារំាងហ្សាក់ សៀរ៉ាក់។
នៅពេលនេះ និងអ្វីដែលលោកសាកូហ្ស៊ីត្រូវព្យាយាមសម្រេចឲ្យបានពីភាគីឥណ្ឌា គឺកិច្ចសហប្រតិបត្តិការលើវិស័យនុយក្លេអ៊ែរស៊ីវិល និងទីផ្សារសព្វាវុធ។ ទំាងអស់នេះសុទ្ធសឹងជាសំណុំរឿងដែលលោកសាកូហ្ស៊ីបានលើកយកទៅជជែកពិភាក្សាម្តងហើយ កាលពីដំណើរទស្សនកិច្ចលើកទី១ តែនៅមិនទាន់អាចជំនះភាគីឥណ្ឌាបាន។ ជាក់ស្តែងនៅក្នុងកិច្ចសហប្រតិបត្តិការនុយក្លេអ៊ែរស៊ីវិល ក្រុមហ៊ុនបារំាង Areva អាចនឹងទទួលបានកិច្ចសន្យាសាងសង់មជ្ឃមណ្ឌលប្រភេទ EPR ចំនួនពីរនៅប៉ែកខាងលិចប្រទេសឥណ្ឌា។
និយាយពីទីផ្សារសព្វាវុធវិញ ឥណ្ឌាត្រូវការកែប្រែកងនាវាចម្បំាងឲ្យទាន់សម័យទំនើប ឥណ្ឌាត្រូវការទិញយន្តហោះចម្បំាងធុនថ្មីទំនើបចំនួន ១២៦គ្រឿង និងឥណ្ឌាក៏ត្រូវការប្តូរយន្តហោះប្រដេញ Mirage ចាស់ៗរបស់បារំាងដែលឥណ្ឌាកំពុងមានក្នុងដៃ។ ក៏ប៉ុន្តែ អ្នកដែលចង់បានកិច្ចសន្យាពីឥណ្ឌា ទំាងនៅលើវិស័យនុយក្លេអ៊ែរ និងសព្វាវុធនាពេលនេះ មិនមែនមានតែប្រទេសបារំាងមួយទេ។ ប្រទេសផ្សេងទៀតក៏ចង់បានដូចគ្នាដែរ ដូចយ៉ាងអាមេរិក និងរុស្ស៊ី។ ជាក់ស្តែងនៅក្នុងវិស័យនុយក្លេអ៊ែរស៊ីវិល បារំាងត្រូវប្រឈមមុខនឹងសហរដ្ឋអាមេរិកដែលលោកប្រធានាធិបតីអូបាម៉ាទើបបញ្ចប់ទស្សនកិច្ចនៅក្នុងប្រទេសឥណ្ឌានាពេលថ្មីៗកន្លងទៅ។
ហេតុអ្វីបានជាបារំាងកំពុងសម្លឹងមិនប៉ប្រិចភ្នែក ទីផ្សារសព្វាវុធ និងកិច្ចសហប្រតិបត្តិការលើវិស័យនុយក្លេអ៊ែររបស់ឥណ្ឌា ?
បារំាងជាប្រទេសទី៣ ដែលបានលក់គ្រឿងសព្វាវុធទៅឲ្យប្រទេសឥណ្ឌា ពោលគឺស្ថិតនៅពីក្រោយប្រទេសរុស្ស៊ី និងប្រទេសអ៊ីស្រាអែល។ បច្ចុប្បន្ននេះទៀត បារំាងក៏កំពុងប្រឈមមុខនឹងប្រទេសជាច្រើនផ្សេងទៀត។
តំាងពីឆ្នំា ២០០៧ មក ពោលតំាងពីឥណ្ឌាបានប្រកាសដាក់ដេញថ្លៃ ក្នុងការទិញយន្តហោះចម្បំាងបន្ថែមចំនួន ១២៦គ្រឿងដែលមានទឹកប្រាក់ប្រមាណ ៩ ០០០លានអឺរ៉ូ និងប្តូរយន្តហោះប្រដេញ Mirage ចាស់ៗរបស់បារំាងដែលឥណ្ឌាកំពុងមានក្នុងដៃមក មានក្រុមហ៊ុនជាច្រើនកំពុងប្រដេញជើងដណ្តើមគ្នាយក។ នៅខាងអាមេរិក គឺក្រុមហ៊ុនបូអ៊ីង (Boeing) ចំណែកឯនៅខាងប្រទេសបារំាង គឺក្រុមហ៊ុន Dassault Aviation ដែលមកទល់ពេលនេះ នៅតែមិនទាន់បានលក់ទៅឲ្យប្រទេសណាមួយ នៅឡើយទេ។
បើនិយាយពីការសាងសង់មជ្ឃមណ្ឌលនុយក្លេអ៊ែរប្រភេទ EPR វិញ បារំាងសង្ឃឹមនឹងទទួលបាន ព្រោះថានៅក្នុងដំណើរទស្សនកិច្ចលើកទី១កាលពី ២ឆ្នំាមុន លោកប្រមុខរដ្ឋបារំាង និងលោកប្រមុខរដ្ឋាភិបាលឥណ្ឌាបានចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការលើវិស័យនុយក្លេអ៊ែរស៊ីវិល។ តែបើនិយាយពីទីផ្សារសព្វាវុធវិញ ប្រទេសផ្សេងទៀតមិនទុកឲ្យបារំាងជិះសេះលែងដៃតែម្នាក់ឯងឡើយ។
តែដោយឥណ្ឌា ជាប្រទេសដែលចូលចិត្តថ្លឹងថ្លែងពិចារណា និងមិនប្រញិបប្រញាប់នោះ ប្រហែលជាមិនទាន់មានកិច្ចសន្យាផ្លូវការណាមួយ នឹងត្រូវចុះហត្ថលេខានាឱកាសដំណើរទស្សនកិច្ចរបស់ប្រមុខរដ្ឋបារំាងនាពេលនេះទេ។
ទំនាក់ទំនងពាណិជ្ជកម្មរវាងបារំាង និងឥណ្ឌា
ជាមួយនឹងកំណើនសេដ្ឋកិច្ច ៨% ក្នុងឆ្នំា ២០០៩ ជាមួយនឹងពលរដ្ឋជាង ១ពាន់លាននាក់ និងជាមហាប្រទេសប្រជាធិបតេយ្យមួយនៅក្នុងពិភពលោក ឥណ្ឌាត្រូវបានប្រទេសជាច្រើនចោមរោម ចែចូវ គិតទំាងប្រទេសចិនដែលជាគូប្រជែងដ៏ធំនៅអាស៊ី។ ប៉ុន្មានថ្ងៃមុន ជាទស្សនកិច្ចរបស់លោកប្រធានាធិបតីអាមេរិក បារ៉ាក់ អូបាម៉ា ថ្ងៃនេះ ជាទស្សនកិច្ចរបស់លោកប្រធានាធិបតីបារំាងនីកូឡា សាកូហ្ស៊ី និងនៅថ្ងៃខាងមុខ ដល់វេនលោកប្រធានាធិបតីរុស្ស៊ី Dimitri Medvedev និងលោកប្រធានាធិបតីចិន Hu Jintao ម្តង។
ចំពោះប្រទេសបារំាង ក្នុងនាមជាមហាអំណាចសេដ្ឋកិច្ចទី ៥ក្នុងលោក វិនិយោគទុនបារំាងនៅក្នុងប្រទេសឥណ្ឌាស្ថិតរហូតដល់លំដាប់ថ្នាក់ទី ៩ឯណោះ។ អ៊ីចឹងហើយបានជានៅពេលនេះ និងដើម្បីតាមឲ្យទាន់ប្រទេសផ្សេងទៀត បារំាងគ្មានជម្រើសអ្វី ក្រៅពីការចូលខ្លួនទៅប្រជែងជាមួយប្រទេសផ្សេងទៀតទេ ព្រោះថាកន្លងមក ពិតមែនតែទីផ្សារឥណ្ឌាមានសក្តានុពលដូចទីផ្សារប្រទេសចិនក៏ដោយ ក៏អ្នកវិនិយោគទុនបារំាងហាក់ដូចជាមានការលំបាក ក្នុងការប្រឈមមុខនឹងដៃគូផ្សេងទៀត។
យ៉ាងណាក៏ដោយ និងដើម្បីអាចជំនះភាគីឥណ្ឌាបាន លោកប្រមុខរដ្ឋបារំាងដែលក្នុងនាមជាសមាជិកអចិន្ត្រៃយ៍ម្នាក់នៃក្រុមប្រឹក្សាសន្តិសុខអង្គការសហប្រជាជាតិ និងជាប្រធានផ្លាស់វេននៃក្រុមប្រទេស G២០ បានបញ្ជាក់ជាថ្មីនូវជំហររបស់បារំាង ក្នុងការគំាទ្របេក្ខភាពប្រទេសឥណ្ឌា ជាសមាជិកអចិន្ត្រៃយ៍ថ្មីនៃក្រុមប្រឹក្សាសន្តិសុខអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ