រុស្ស៊ី-ឥណ្ឌូណេស៊ី

ជុំវិញគ្រោះថ្នាក់ធ្លាក់យន្តហោះស៊ីវិលរុស្ស៊ី នៅ ឥណ្ឌូណេស៊ី

យន្តហោះរុស្ស៊ីធុន Superjet-100 ដែលបានបាត់ខ្លួនពីកញ្ចក់ Radarក្រោយពីវាហោះបង្ហាញម្សិលមិញ ចេញពីអាកាសយានដ្ឋានក្រុង Jakarta ទើបបាន២០នាទី ត្រូវបានគេរកឃើញទៅហើយព្រឹកថ្ងៃនេះ។ គឺវាធ្លាក់ ដោយបុកភ្នំនៅត្រង់កំពស់១,៦គ.ម.ចម្ងាយ៥០គ.ម. ពីអាកាសយានដ្ឋាននោះ។ តើអ្វីទៅជាយន្តហោះ Superjet-100 នោះ ?

ចុះផ្សាយនៅថ្ងៃ៖ 10/05/2012 - 11:50

ដោយ៖ កែវ ឆាយា

ផ្សាយពាណិជ្ជកម្ម

ឈ្មោះពេញរបស់វា គឺយន្តហោះ Sukhoi Superjet-100។ វាផលិតដោយរោងចក្រនៃក្រុមហ៊ុន Sukhoi នៅក្រុង Komsomolsk មាត់ទន្លេ Amour ឯចុងបូព៌ាប្រទេសរុស្ស៊ី ដែល ជាទូទៅ ល្បីខាងផលិតយន្តហោះចម្បាំងធុន Sukhoi។ ប៉ុន្តែ នៅឆ្នាំ២០០០ មានបង្កើតឡើង ជាសាខាមួយពិសេសរបស់វា ខាងផលិតយន្តហោះស៊ីវិលសម្រាប់ដឹកអ្នកដំណើរ។

យន្តហោះ Superjet-100 ជាយន្តហោះរុស្ស៊ីធុនថ្មីទី១ ផលិតក្រោយពីសហភាពសូវៀតរលាយទៅក្នុងឆ្នាំ១៩៩១។ វាត្រូវចូលខ្លួនទៅជំនួសយន្តហោះផលិតតាំងពីជំនាន់សូវៀត បែបយ៉ាងធុន Tu-134 និង Yak-42។

តាមតួលេខក្រសួងឧស្សាហកម្មនិងពាណិជ្ជកម្មរុស្ស៊ី គម្រោងបង្កើតយន្តហោះនេះ បានតម្រូវឲ្យចំណាយអស់ ១.១៤០លានដុល្លារ ពីក្នុងនោះចេញពីថវិការដ្ឋ គឺមានរំលែកទៅ៥៤០លានដុល្លារ។

យន្តហោះ Superjet-100 អាចផ្ទុកអ្នកដំណើរបាន៩៨នាក់ ផលិតជា២បែប ៖ គឺមួយសម្រាប់ហោះទៅចម្ងាយដល់៣.០០០គ.ម. និងទៅចម្ងាយដល់ ៤.៤០០គ.ម.។ ក្រុមហ៊ុន Sukhoi គ្រោងលក់យន្តហោះថ្មីនោះ ទៅទល់ឆ្នាំ២០២៩ ឲ្យបាន៨០០គ្រឿង ឬស្មើនឹង១៥% នៃទីផ្សារយន្តហោះពិភពលោក ខាងហោះទៅចម្ងាយខ្លីនិងមធ្យម។ តម្លៃវា ១គ្រឿងៗ គឺ ៣១,៧លានដុល្លារ។

យន្តហោះដែលធ្លាក់ទៅនោះ បានផ្តើមហោះហើរ គឺនៅកណ្តាលឆ្នាំមុន ហើយតាំងពីពេលនោះមក វាហោះបាន ៥០០លើកទៅហើយ និងបានស្ថិតក្នុងអាកាសដល់ទៅ ជាង៨០០ម៉ោង។ ការហោះលើកនេះ នៅឥណ្ឌូនេស៊ី គឺក្នុងន័យបង្ហាញគុណសម្បត្តិវា សម្រាប់ទាក់ចិត្តអ្នកទិញ។ ម៉្លោះហើយ បានជាក្នុងចំណោមអ្នកជិះ មានជាតិឥណ្ឌូនេស៊ី ដល់ទៅ៣៦នាក់ ជាតំណាងក្រុមហ៊ុនអាកាសចរណ៍ប្លែកៗ នៃប្រទេសនេះ។

មុនទៅដល់ឥណ្ឌូនេស៊ី វាបានធ្វើការហោះបង្ហាញបែបនេះ នៅប្រទេសប៉ាគីស្ថាន និងភូមា រួចបន្ទាប់មក វាត្រូវបន្តដំណើរទៅកាន់ប្រទេសឡាវ និង វៀតណាម។

តាមដែលអនុប្រធានក្រុមហ៊ុន Sukhoi ខាងធ្វើការងារជាមួយអតិថិជន លោក Igor Syrtsov បានថ្លែងគិតពីឆ្នាំ២០១០មក ក្រុមហ៊ុនបានចុះកិច្ចសន្យាដូចតទៅ គឺ ៖ សម្រាប់លក់ទៅឥណ្ឌូនេស៊ី យន្តហោះ Superjet-100 ចំនួន៤២គ្រឿង លក់ទៅម៉ិចស៊ិក១៥គ្រឿង លក់ទៅអ៊ីតាលី១២គ្រឿង លក់ទៅឡាវ គឺ ៣គ្រឿង។ បច្ចុប្បន្ន កំពុងដំណើរការក្នុងក្រុមហ៊ុនរុស្ស៊ី Aerofolt គឺមានយន្តហោះនេះ ៧គ្រឿង និង១គ្រឿង ក្នុងក្រុមហ៊ុនអាកាសចរណ៍ Armenie។

តាមមតិពួកអ្នកឯកទេសក្រុមហ៊ុនណានៅអាស៊ីដែលកំពុងតែសម្លឹងមើលយន្តហោះរុស្ស៊ីនេះនៅឡើយ គេនឹងអារកាត់ គឺក្រោយពីគេដឹងឲ្យបានច្បាស់សិន អំពីកាលៈទេសៈ និងមូលហេតុនៃគ្រោះថ្នាក់ដែលបានកើតឡើង៕