ប្រទេសថៃហាមលក់សៀវភៅដែលរិះគន់រាជានិយមថៃ
ប្រទេសថៃ មានច្បាប់ដ៏តឹងតែងបំផុតមួយនៅលើលោក។ ច្បាប់នេះ ចែងពីការដាក់ទោសឲ្យជាប់ពន្ធនាគាររហូត១៥ឆ្នាំ លើជនណាដែលនិយាយឬសរសេររិះគន់រាជានិយមថៃ។ ជាក់ស្តែងអាជ្ញាធរថៃ ទើបនឹងប្រកាសហាមលក់សៀវភៅមួយនៅក្នុងប្រទេស ដែលនិពន្ធដោយអ្នកកាសែតសញ្ជាតិអង់គ្លេសម្នាក់។ សៀវភៅដែលសរសេរអំពី « នយោបាយរបស់ប្រទេសថៃ « ត្រូវបានអាជ្ញាធរវិនិច្ឆ័យ-ថាជាការប្រមាថមាក់ងាយចំពោះរាជានិយមថៃ »។
ចុះផ្សាយនៅថ្ងៃ៖
ស្តាប់ - ០៣:០២
សៀវភៅក្រោមចំណងជើងថា « A Kingdom in Crisis» ឬ ប្រែថា”រាជាណាចក្រកំពុងជួបវិបត្តិ “ដែលនិពន្ធដោយអ្នកកាសែតអង់គ្លេស ឈ្មោះ Andrew McGregorMarshall ទើបបានចេញផ្សាយកាលពីខែមុននៅទីក្រុង Londres ប្រទេសអង់គ្លេស។ ក្នុងសៀវភៅនេះ អ្នកនិពន្ធ បានលើកឡើងអំពី « វិបត្តិក្នុងប្រទេសថៃបច្ចុប្បន្ន បញ្ហាដែលគេពុំហ៊ាននិយាយប៉ះពាល់ស្តីពីការបន្តស្នងរាជវង្សថៃនិងពីការប្រយុទ្ធតស៊ូដើម្បីលិទ្ធិប្រជាធិបតេយ្យនៅប្រទេសថៃ។
សៀវភៅ « A Kingdom in Crisis» នេះត្រូវបានលោក Somyot-Poompanmoungប្រមុខប៉ូលិសថៃ ហាមលក់នៅក្នុងប្រទេសដោយលោកបានវិនិច្ឆ័យថា”ជាការប្រមាថមាក់ងាយរាជានិយមថៃ និងធ្វើឲ្យអន្តរាយដល់សន្តិសុខជាតិ សន្តិភាពក៏ព្រមទាំងសណ្តាប់ធ្នាប់សាធារណៈផង។
នៅក្នុងសេចក្តីជូនដំណឹងមួយ ប្រមុខប៉ូលិសថៃ បានគូសបញ្ជាក់បន្ថែមទៀតថា “ច្បាប់ស្តីពីការបោះពុម្ភផ្សាយនានានៅឆ្នាំ២០០៧- ហាមដាច់ខាតមិនឲ្យនាំចូលសៀវភៅមកពីបរទេសយកមកដាក់លក់នៅក្នុងប្រទេសថៃឡើយ”។ ដូច្នេះ“ ការរំលោភលើការហាមប្រាមនេះនឹងត្រូវផ្តន្ទាទោសឲ្យជាប់ពន្ធនាគាររ ៣ឆ្នាំ និងបង់ពិន័យប្រាក់ចំនួន ៦ម៉ឺនបាត ស្មើនឹង១៥០០ លុយអ៊ឺរ៉ូ។
ចំណែកឯអ្នកកាសែតអង់គ្លេសដែលលែងរស់នៅក្នុងប្រទេសថៃហើយនោះ បានបញ្ចេញប្រតិកម្មយ៉ាងរហ័សនៅលើប្រព័ន្ធ Twitter របស់ខ្លួនរបៀបចំអកឲ្យអាជ្ញាធរថៃវិញថា «គាត់សូមអរគុណជាអតិបរមា ចំពោះប៉ូលិសថៃ ដែលបានហាមលក់សៀវភៅគាត់» ពីព្រោះ ការហាមឃាត់នេះគឺប្រៀបបីដូចជាការផ្សាយពាណិជ្ចកម្មមួយដ៏សម្បើមអស្ចារ្យឲ្យដល់សៀវភៅគាត់។
គួររំលឹកថា ការហាមលក់សៀវភៅ« A Kingdom in Crisis» នេះពុំមែនជាករណីលើកទីមួយនោះទេ ពីព្រោះកន្លងមកមានសៀវភៅមួយចំនួនតូចដែលសរសេរលើកឡើងអំពីក្រុមព្រះរាជវង្សថៃ ដូចជាប្រវត្តិរូបរបស់មហាក្សត្រថៃក្រោមចំណងជើងថា « The King never smile» របស់អ្នកកាសែត Paul Handley ក៏ត្រូវបានគេហាមឃាត់រួចស្រេចទៅហើយនៅក្នុងប្រទេសថៃ។ ព្រះមហាក្សត្រថៃដែលមានព្រះជន្មាយុ ៨៦ព្រះវស្សាហើយនោះ ត្រូវបានពលរដ្ឋថៃគោរពប្រៀបបីដូចជាអាទិទេព និងត្រូវបានការពារយ៉ាងពិសេសដោយច្បាប់ថៃ ចែងពីការដាក់ទោសឲ្យជាប់ពន្ធនាគាររហូត១៥ឆ្នាំចំពោះជនណាដែលហ៊ានប្រមាថដល់ព្រះចេស្តាស្តេចថៃ។
ក្រុមអង្គការការពារសិទ្ធមនុស្សនៅលើលោក បានធ្វើការបរិហារយ៉ាងខ្លាំងក្លា អំពីការប្តឹងលើករណីមួយចំនួនដែលត្រូវបានតុលាការថៃ ចោទប្រកាន់ពីបទប្រមាថព្រះចេស្តាមហាក្សត្រ។ ជាអាទិ៍នៅខែសីហាកន្លងមក -តន្ត្រីករថៃមួយរូប ត្រូវបានតុលាការកាត់ទោសឲ្យជាប់ពន្ធនាគារ១៥ឆ្នាំពីបទបានសរសេរអត្ថបទមួយចំនួនដែលអាជ្ញាធរថៃ វិនិច្ឆ័យថា”ជាការប្រមាថមាក់ងាយរាជវង្សថៃ”នៅលើប្រព័ន្ធសង្គម Facebook នៅឆ្នាំ២០១០និង២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ