អាមេរិក៖សកម្មភាពយោធាអាមេរិកប្រឆាំងកូរ៉េខាងជើងជាជម្រើសមួយ លើតុចរចា
ក្នុងទស្សនកិច្ចនៅកូរ៉េខាងត្បូង ថ្ងៃសុក្រនេះ ប្រមុខការទូតអាមេរិក លោករិច ធីលឡឺសាន់ បានលើកឡើងថា សកម្មភាពយោធារបស់អាមេរិកប្រឆាំងកូរ៉េខាងជើងជាជម្រើសមួយ នៅលើតុចរចា។ យោងតាមលោកធីលឡឺសាន់ នយោបាយអត់ធ្មត់របស់អាមេរិកត្រូវបិទបញ្ចប់ហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
នយោបាយអត់ធ្មត់របស់អាមេរិក ចំពោះសកម្មភាពនុយក្លេអ៊ែរ ចំពោះការគំរាមពីកូរ៉េខាងជើង ត្រូវបញ្ចប់ហើយ នេះបើតាមការប្រកាសរបស់រដ្ឋមន្ត្រីការបរទេសអាមេរិក លោករិច ធីលឡឺសាន់។ ថ្ងៃសុក្រនេះ រដ្ឋមន្ត្រីការបរទេសអាមេរិក បានធ្វើដំណើរទៅតំបន់ដែលលែងមានសកម្មភាពយោធា នៅតាមព្រំដែនរវាងកូរ៉េខាងត្បូងនិងខាងជើង។
ប្រឈមនឹងការគំរាមនុយក្លេអ៊ែរពីក្រុងព្រុងយ៉ាង ការប្រកាសបញ្ចប់នយោបាយអត់ធ្មត់ដែលជានយោបាយយុទ្ធសាស្ត្ររបស់រដ្ឋាភិបាលលោកអូបាម៉ា អាណត្តិមុន មិនមែនជារឿងងឿងឆ្ងល់ទេ បើយើងនិយាយពីរដ្ឋាភិបាលលោកត្រាំ។ នៅក្រុងសេអ៊ូល លោកធីលឡឺសាន់បានលើកឡើងថា ការផ្តល់លទ្ធភាពអោយក្រុងព្យុងយ៉ាងរក្សាបាននូវកម្រិតបច្ចេកវិទ្យាយោធាដូចសព្វថ្ងៃ មិនមែនជាទិសដៅសមស្របទេ។
នៅក្រុងតូក្យូ ម្សិលមិញ រដ្ឋមន្ត្រីការបរទេសអាមេរិកបានកត់សម្គាល់ពីបរាជ័យនៃការប្រឺងប្រែងនយោបាយការទូត២០ឆ្នាំ ក្នុងដំណោះស្រាយបញ្ហានុយក្លេអ៊ែរកូរ៉េខាងជើង។ លោកធីលឡឺសាន់បានសន្យាថា នឹងមានវិធីសាស្ត្រថ្មីទៀត ដើម្បីដោះស្រាយបញ្ហា តែមិនបានបញ្ជាក់ថាជាវិធីសាស្ត្រអ្វីទេ។ ថ្ងៃសៅរ៍ស្អែកនេះ រដ្ឋមន្ត្រីការបរទេសអាមេរិកនឹងបិទបញ្ចប់ទស្សនកិច្ចនៅចិន។ លោកធីលឡឺសាន់ចង់សុំចិនអោយដាក់សម្ពាធបន្ថែមទៅលើកូរ៉េខាងជើង។
ក្រុងព្យុងយ៉ាងបានសាកល្បងនុយក្លេអ៊ែរច្រើនលើកមកហើយ តាំងពីឆ្នាំ២០០៦មក ដោយមិនខ្វល់ពីទណ្ឌកម្មរបស់អង្គការសហប្រជាជាតិទេ។ កាលពីថ្ងៃ៦មីនាដើមខែ ក្រុងព្យុងយ៉ាងបានបាញ់មីស៊ីលបាលិស្ទិកច្រើនដើម ក្នុងនោះមានមីស៊ីល៣ដើមបានធ្លាក់ទៅសមុទ្រ នៅមិនឆ្ងាយពីដែនដីជប៉ុនទេ។ ថ្ងៃសុក្រនេះ អាជ្ញាធរជប៉ុននៅក្រុងឆ្នេរអូហ្កា បានរៀបចំសកម្មភាពហាត់សមប្រឈមនឹងការវាយប្រហាររបស់កូរ៉េខាងជើង។ មនុស្សជាង១០០នាក់បានចូលរួមហាត់សម ក្នុងនោះមានសិស្សបឋមសិក្សាជាច្រើននាក់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ